В Памят Григорія Крутилы
Krutila
Григорий Крутила зо женом
Євгенійом на 50-річнім ювілею
супружого жытья

В 1985 році наша організація потерпіла тяжку, утрату, коли на 102 році жытя смерт забрала Григорія Крутилу, закладателя чоловічого отділа чис. 28 Лемко-Союза в Юнкерс, Н. Й., довголітнього выдатного активіста, чытача «Лемка», потім «Карпатской Руси», од самого появленя газеты.

Покіный народив ся в Лосю на Лемковині в 1883 році. В пошуку кращой долі молодым хлопцом приїхав до Америкы, в місто Прайедейл, Питтсбургской околиці. 16-річным підростком юж працувал углекопом. За 10 років тяжкой роботы в штатах в 1914 році переселив ся в місто Юнкерс, Н. Й., де в 1915 році ся оженив.

Упокоівший ся одзначав ся великом любовйом до свого руского народа, він быв переконаный в тім, же през організацію, яком есть Лемко-Союз, наш народ може выбороти собі кращу долю. Покійный Григорій Крутила вірив в народну просвіту і тому як трудом, так і жертвами причынився до побудовы Карпаторуского Американского Центра, першой народной будовы лемків в Сполученых Штатах Америкы. Послі побудовы Центра він приходив каждой суботы і неділі робити, бо вірив, же трудит ся для народного добра.

Память о Григорію Крутилі залишыла ся в серцях всіх, кто знал тоту трудолюбиву, чесну і тиху людыну.




[BACK]