Лемко-Союз в 58 Році Свого Існуваня — Михайло Логойда

Ніт сумніву в том, што на 20-те столітя, яке вступат в свій финальный етап, котре вызначатся небывалым прогресом, научно-техничном революциом, смілыми одкрытиями крылатой людской думкы, величезными політычными і обществено-економічными змінами, дынамичным рухом мас за досягненя сих змін, трошечки причынился і Лемко-Союз, заснованый канадскыма і американскыма лемками в 1929 року. Сталося так для того, же в основі програмы Лемко-Союза лежит прогрес — та незадержима дорога до полного освобождения людины од вызыску і национального гнету, за міжнародне братерство вшыткых трудящых, вшыткых народів. Світла ціль Лемко-Союза се дружба, братерство і мир меж народами, благородна ідея творчого співробітництва вшыткых народів світу, здійсненя социальной справедливости на всей земной кулі і смілый марш до щестя і повной побіды творчых сил людства.


John Adamiak
Голрвный председатель Лемко-Союза
Иван К. Адамяк


Здійсненя той благородной програмы заохочувало кращых сынов і дочок канадскых і американскых лемков до активности, до самопожертв, до вступу в ряды нашой народно-просвітительной организации, жебы организовано бороти ся за освіту і кращу, щасливішу будучніст.

Потреба на народно-просвітительну организацию, яком являтся Лемко-Союз, заснованый 9-го січня 1929 року в Виннипегу (Канада) Теодором Коханом, Владимиром Цисляком, Нестором Волчаком, Иваном Похном, Теодором Пейком, Симеоном Добровольскым, Николаем Кобеляком, Константином Криницкым, Иваном Вандзиляком, Ярославом Рейда и Тимком Ришком, обосновано 58-літным існуваньом, любовйом і довірием, з якым односятся до ней як крайовы, так і тут народжены лемки. Піддержка Лемко-Союза выходцами з обох сторон Карпат і до меньшой міры іх тут народжеными дітьми есть очевидным, коли взяти під увагу тот факт, што в США перестало выходити поважне число карпаторускых газет і нісколько карпаторускых запомоговых организаций розв’язало ся, тохди як «Карпатска Русь», орган Лемко-Союза появлятся тыжнево, а наша народна организация, як і 58 років тому назад, так і гнеска, иде увіреными кроками вперед, продолжат осуществляти народну програму, учыт людий цінити свою народну культуру і дальше организує выходцов из Карпат і іх тут народженых дітей в борьбі за ліпше завтра, розброєня і тревалый мир.

Незважаючы на ростучый наступ темных сил — якы бы любили застановити прогрес і навернути часы макартизму, наша организация, отділы і єй члены продолжают организаційно-просвітительну діяльніст, прикладаючы всі сили для збівшеня нашых рядів молодежом, придбаньом новых чытачів для газеты, жебы такым способом продолжити наше етнічне існуваня в США і Канаді. 30-го серпня і 1-го вересня в прекраснім Лемко резорті, який был надбаный з инициативы Лемко-Союза, одбыв ся 33-ый Головный зізд нашой народной организации, котрый приняв резолюцию, в котрой, як і в попередных 32-ох зіздах, накреслена програма активности нашой организаціі. В принятой 33-ым Головным зіздом резолюции говорит ся, што гнеска діяльніст Лемко-Союза тримат ся на патриотизмі і ентузиазмі групы старшых і молодежы, но што заинтересованіст молодежы в культурі народа, із якого они вышли, як то показуют Лемко фестивалі, велика! Для того, жебы забеспечыти і дальшый розвиток нашой народной организации обовязково треба одновити в отділах Лемко-Союза мистецку діяльніст, бо посредництвом той діяльности можно буде «найти дорогу до сердец навет тых лемков, котры не знают ни материнской мовы, ни за своє походженя, так як родна пісня, нашы традиции, культура і история сут ключом до сердец навет далекого потомка нашого лемковского племени».


16thCongress
Делегаты 16-го Головного Зізду Лемко-Союза,
Клівленд, О., вересен 1, 2 і 3, 1951 р.


В резолюции показуе ся на то, што насталы трудны часы в связи з затриманьом здобытых нами інституций, як карпаторускым американскым центром і лемко-резортом. По рішеню зізда треба буде зробити нами далеко больше в сей справі, бо загубити іх далеко легше, як затримати. В резолюции 33-го Головного зізда говорит ся, што народны домы і лемко резорт были придбаны не лем для нас, но и для нашых дітий і потомков, жебы ім полегшыти задачу затриманя при житю нашу етнычность в США і Канаді.


20thCongress
Делегаты 20-го Головного Зізду Лемко-Союза
Монро, Н.Й., 5—7 вересня 1959 р.


Нам, як і нашым попередникам — основателям Лемко-Союза, треба вести тіж борьбу і внутри нашой етничности проти тых, што бы любили под видом «згоды» приєднати нас до украинскых буржуазных националистів, гитлеровскых колаборантів, зрадників свого народа, ворогів славянства, котры готовы співпрацувати з кым попало проти руского народа і його державы.

33-ый Головный зізд показав, што в рядах нашой организации находит ся достаточне чысло людей і молодшой организации, котры готовы взяти на себе одповідальніст керівництва нашом народном организациом, нашым Лемко-Союзом, жебы она росла і моцніла, жебы увеличила ся приплывом членов молодшого поколіня, котры поведут нашу организацию по дорозі здійсненья вшыткых точок нашой програмы, штобы спасти нашу етничну групу од загыбелі.


Михайло Логойда



[BACK]