Гнес громадянство старовинного галицкого міста Львова має можливость оглядати прекрасны акварельны творы вызначного народного майстра Лемковины, Никифора Дровняка с Крыниці.

Минуло рівно 30 роков от першой великой выставкы творов митця-самоука, яка была во Львові. От того часу до гнес выросло немало интеллигенции и художников, то треба было ознайомити их з творчостьом Никифора, тепер уж широко знаного художника.

Обставины так уложилися, што гнес художник прожыват на Лемковині в Польші, прото звязок з ним не перерыватся.

Выставку Никифоровых картин организовали Львовске отделение Спілкы архитекторов Совітской Украины разом з Львовскым музейом украинского мистецтва. До того немало причинился зас найбольший прихыльник таланту великого самоука, художник Роман Турин.

На той выставкі експонувалося 35 найкрасшых творов знаменитого самодіяльного митця як з 30-х роков, так из повоєдного периоду, што знаходятся в музейной и приватных збірках Львова.

В скарбницу народной культуры творчость Никифора ввошла ище на початку 30-х роков, коли открыто великый талант самоука, коли по-належному оцінено його творчость, коли организовано выставку його робот в Парижу (1932) и в Львові (1938 р.).

— Открытие гнешньой выставкы робот Никифора — в вступном слові бесідувал голова Львовского отділения Спілкы архитекторов Сов. Украины, М. Вендзилович, — то визначна подія в богатогранном житю Львова. Тому передувала велика и складна организаторска робота, яку провели наша громадскость, интеллигенция и діятели культуры. Гнес, — бесідувал дальше бесідник, — творчость Ниикфора здобыла собі популярность в Польші, Франции, Болгарии, Англии, Америкі, Италии и иншых краинах світу.

Выставка здобыла собі великий успіх и выкликала зацєкавленость суспільства, доказом того был богатолюдный вернісаж 12 мая 1968 р., а также велика кількость зрітелей выставкы.

Львовяне активно реагуют и приймуют мистецтво Никифора, што свідчыт про высокы, естетичны смакы нашой громадскости. — Адже творчость Никифора гнес розглядатся поряд з творчостьом знаменитого французского митця-аматора, урядовца Руссо, незвычайного грузинского народного майстра Піросманашвілі и иншых всесвітовых митцов-самоуков.

Одкрываючи выставку, выступил зо своими спогадами про Никифора, художник Р. Турин, який першый указал на талант лемковского митця. Турин в свойой промові подкреслил великым оригинальным талантом, што в його картинах-примитивах в якысой мірі отбилася особиста доля художника-самоука, што його творам притаманны чудовы кольоровы поєднания, богатый рисунок и композиция, своєродка перспектива, в якых наивность примітива переходит в философску узагальненость образного мысления. Вшытко тото прикметы, што дозволят отнести творы Никифора до правдивого мистецтва. Дуже Р. Турин росповіл про його довголітню дружбу с тым милым и простым митцьом.

Выставка захоплювала всіх, хто любит и шанує народне мистецтво, во вшыткых його проявах, ріжновидностях, хто прагне якнайглубше познати його всі стороны и стили.

В свойом вступном слові старший науковый сполроботник Львовского историчного музею, знавец Лемковины Иван Красовский зазначыл, што всьо своє творче житя Никифор постійно поєднувал з житьом, з якого черпат натхнения и темы для своих акварелей.

На выставкі експонувалося: пейзаж, портрет, интерьєр, виды міст и вилл, а так само улюблены и родны криницкы и прикарпатскы краєвиды з их смугами — полями, з их клітками — лісами. Природу Никифор малює безпосередньо, то єст так, як приймує.

Никифор учился сам малювати. Спостерегал декоративну красу в просторой лемковской хыжы, обставленой утилитарными и художными вытворами народных умільцов; вывчал побыт, звычаи и ритуалы будньов краю, сприймал кольор, рисунок — побудову; сам проходил добру науку. Тому його малярство не знає ниякых академичных вплывов. Свідчыт оно про высокы достижения формы и выразу, самобытнього мистецтва — наивного примитиву.

Выставка творов Никифора поучна и переконуюча — доводит професор А. Гнатишак. Ту глядач не залышатся легко-думаючим, а захоплюєся, дискутує, выражат свои погляды, словом, душевно пережыват.

Слід зауважыти так само, што художник К. Звіринский барз добрі оформил выставку. Кольор рамок, нибы дополнювал и перекликувался з фиолетово-синьом и коричнево-золотом колористичном композициом малюнку.

Сама експозицня так само добрі побудована в выставочной сали старовинной архитектуры.

Кромі того, на выставкі експонувалося литература про митца российском, украинском и иншыми мовами, што допомагало смотрящому шырше познайомление з світовом популяризациом творчости великого митца Лемковины.