Бывший Головный Предсідатель Лемко-Союза Теодор Рудавский и його супруга Мария.

Хочеме пару слов написати и поділитися с Вами радостьом, котру зме мали 7-го октября 1967 р. в Карпаторусском Центрі в Юнкерс, Н. Й. совмістно с нашыма молодыма юбилянтами, широко знаныма и высоко поважаныма, а то не єст никто инший, як нашы Теодор и Мария Рудавскы.

Теодор и Мария Рудавскы вступили до стану супружества 10-го октября 1942 року. До теперішнього часу пережили 25 літ в любві, згоді и взаимной пошані. Юбилянты Рудавскы выховали двоє дітей, с котрыма ся дуже гордят. Старший сын Теодор женатый, теперь служит в американской армии в Кореи. А их дівчина Зоня посіщат университет “Рида Колледж” в Трентон, Н. Дж.

Теодор и Мария Рудавскы знаны не лем в родині и сусідстві, але добрі знаны, як далеко и широко єст Лемко-Союз, а то не лем в США и Канаді, але и в горах Карпатах на Лемковині. Их добре діло помогат нашому народу на цілом світі. Теодор был за 4 рокы головным предсідательом Лемко-Союза, теперь єст членом Центрального Комитета Лемко-Союза и посередником между Лемко-Союзом и ООН. Робит много в отділі и организации. Где лем што потрібно до помочи, то Рудавскых там не бракує: ци то в Лемко-Парку, ци при нашей фильмі “Лемковске весіля”, и т. д. обоє все готовы до роботы.

Зато Теодор и Мария Рудавскы заслужили собі велику гостину от свого народа, а то не лем на єден день, як сме им зробили, але на три дни, як то было давно на нашых селах на Лемковині.

Через наш календарь желаме Вам, Теодор и Мария Рудавскы, счастья, здоровья, всього найлучшого на многая и благая літа! Жебы сте ся дочекали не лем золотого, але и дияментового юбилею! Боже Вас благослов!

Треба упомянути и о том, што на том великом юбилею, котрый несподіванно организованый и устроєнный, были не лем родина, приятели, члены организации Лемко-Союза, читатели газеты “Карпатска Русь”, але тоже были и представители из Объєдиненных Наций, из Украинской постоянной миссии. Между гостями был писатель Юрий Збанацкий, який выголосил милу и красиву бесіду к юбилянтам и гостям. Между другыми бесідниками, хотя коротку, но дуже теплу бесіду сказал всім нам знаный народный лидер между карпатороссами и украинцами на емиграции Михаил Логойда. Дальше наш Гол. Предсідатель Лемко-Союза Теодор Ив. Горощак во свойой бесіді призвал гостей, же як кто хоче и любит жертвовати на пресс-фбнд газеты, то коло дверей єст столик, а там люде запишут вашу жертву. Коротку бесіду, але дуже теплу сказала Ольга Єдинак, котра призвала нашых людей, а в первой степени нашых жен и молоду емиграцию вступати в отділы Лемко-Союза. При конци всіх бесід редактор Стефан Мих. Кичура подякувал всім гостям за таке массове принятие участи на том славном нашом юбилею. Он подякувал писателю Збанацкому за його бесіду и за то, што пришол он сам и с цілом группой дипломатов, штобы отдати честь 25-рочному прожитому супружескому житью нашых юбилянтов. Было ище пару бесідников, а между ними обоє юбилянты. Теодор Рудавский сердечно подякувал всім гостям, а найперше тым, котры тым занялися и оповіл о том, як йому “перешли без розум” с том несподіванком, о котрой он ничого не знал.

Тяжко єст своє чувство описати, коли вашы знакомы близшы и дальшы приготовлят в вашу честь таку милу несподіванку, яка была зроблена мені и мойой жені 7-го октября т. р. в Карпаторусском Центрі в Юнкерс, Н. Й., а то 25-рочный юбилей нашой женячкы.

Приде всьо на мысель и под увагу: и тото, же головном причином устроєния такой несподіванкы єст, же вы стоите и трудитеся для нашых народных организаций. Дуже приємно!

Хочу от себе и от свойой жены выразити щиру и сердечну подяку всім присутным на нашом юбилейном предприятию, як тоже складаме сердечну подяку комитету, котрый тым предприятием занялся и трудился. И мило и приємно, же оно вышло так успішно.

Така зділана нам мила несподіванка останеся в нашой памяти на долгы и долгы рокы.

Ищы раз дякуєме.