“Где ся птах вылягне, там все тягне!”

Таку стародавну лемковску народну пословицу выразил член Другой поіздкы членов Лемко Союза до родного краю Тимофтей Косар, перед корреспондентами львовскых и києвскых газет. И тота пословица дуже ся им полюбила. Они повторили єй во львовскых и києвскых газетах.

Для нас лемков на емиграции тота пословиця то не лем красне выражение любви до всього родного. Мы гдекотры, за тридцет, сорок и пятдесят роков проживаючи не все в злых условиях пережили тоту пословицю на практикі, и каждый с нас потвердит, што то щира жытьова правда. Предкы нашы, котры уложили и затримали тоту пословицю тоже мусіли єй выпробовати на практикі в часі свойой вандровкы за хлібом. А ходили они за ним барже што по цілом світі, в Мадярию, Францию, Белыию, Югославию, а потом пустилися за океан в Америку, Канаду и Аргентину. Хыбаль неє днеска даякой части світа, кромі полудневой Африкы, гдебы не были нашы лемкы, и все ище ктоси найдеся, што жиє в тых далекых от свойой родины місцях земного шара. Всяди ходили лемкы, где лем провадили их животворны пути.

Правда, што идти там где нас тягне не все можеме, єсли там для нас неє місця, або способу до житя, и мы хочеме або не хочеме, остаєме там где таке місце для нас єст и где можеме найти своим трудом способ до нашого и нашых поколіний житья. Но любов до того місця где мы ся вылягли, або выляглися нашы предкы мы сохраняме в нашых сердцах на все. Доказом того што оно так єст може послужити и тота правда, што на місцях новой, прибраной нам отчизны мы горнемеся докупы, организуєме, твориме нашы вспомагательны братской помочи общества, культурны организации для захована духовных традиций будуєме свои школы и церкви. То што мы сбудовали за 50 або 70 роков всяди там где нас єст больша громада то уж невычеркненый с истории факт.

Хоц як мы обкладамеся своими культурными и духовными доробками и наслідством нашых предков, то и того нам ище не выстарчат, и скеро маме можность, то ище идеме оглядати своє родинне гніздо, ведеме там своих, ту рождонных супругов и дітей, штобы они наочно виділи родинный край, штобы он не остался невидженом для них фантазиом, а при том желаме им передати хоц часть той любви до родного краю, котру мы так долго носиме на дні нашых сердец.

Минат 20 роков по закончению ІІ Світовой войны, и благодаря миру, котрый хоц с трудом удался задержати во світі от пару роков настала можность посіщати родный край, а молодежи край своих родителей, діда або бабы. И скоро така можность наступила многы из нас не ждали, а полетіли отвидіти свой край, в котром в часі войны, Першой и Другой творилися неописаны звірства и мукы народа. Найперше начали отвиджати родный край єдиницы а потом цілы трупы.

Повод групповым поіздкам дал наш Лемко-Союз. В 1963 року до краю выбралася 48 членна группа под руководством редактора г. ”Карпатска Русь“ Николая Цисляка. Упомянута группа членов Л. С. отвиділа Варшаву, Центральну Польшу, Краков і свою родну Лемковину, котра змінилася до непознаня. Но группа выполнила при том благородну миссию принявшы участие в торжественном открытию памятника партизанам Лемковины, котры боролися и погибли в борьбі с німецкым оккупантом. Боролися они за то, штобы послі нобіды найти в славянской родині свою свободу и лучше, счестливше житья.

Памятник остане свідком народной борьбы на тысячлітия. Он стоит на почетном місци в Устью Русском. Но што сталося с самыми жителями Лемковины послі войны то уж другый вопрос, коли даже сама прекрасна и всіма лемками люблена назва села Устя Русского, в ненависти славянской переименовали на Устье Горлицке. Село Ропица Русскй, на Ропицу Гурну итд. А то сут зародкы новой националистичной ненависти котры коли поширятся, межут довести до недоброго. Прогресс социальной ровности єст добрый, но при национальной несправедливости його небуде.

Кромі родной Лемковины, котру хоц в бідных условиях мы єй оставили але в культурных перемінилася в одиченого волка, заросла дичином. А напевно не за такый розвиток свого краю боролися нашы партизаны, не за таку програму працували зме собераючи жертвы на помоч и побіду Красной Армии и єй союзников. Вшыткы порозуміли, што Лемковщина жде новой справедливости, што она была з ней ограблена.

Группа тота отвиділа тоже старый княжий город Львов, в котром встрітили єй соткы лемков переселенцов осівшихся во Львовской, Тернопольской и Ивано Франковской областях, и тоже звиділа старинный Києв, матер городов русскых. Вшыткы были задоволены што мали можность отвидіти редный край, и видіти го в такых обставинах в якых он єст, а не в изображению другых, котры отвиджают родный край.

Другу подобну группу Лемко-Союза о два рокы, то єст в 1965, попровадил Иван Адамяк бывший предсідатель Лемко-Союза. Группа отвиділа Польшу, Лемковину, город Львов, но вмісто Києва, отвиділа славну столицу русского народа Москву. По причині дальше продолжающогося мира во світі и улекшаных условий, группа завершила важну миссию. Єй пришли привитати правительственны урядникы Украины. Проводнику группы Ивану Адамяку было продставлено передати првыт по радио от Лемков в Соєдиненых Штатах и Канаді для лемков переселеньцов в Совітском Союзі.

Так само в том часі остала навязана тіснійша связь, бо группу пришли привитати кромі молодой лемковской интеллигенции, ище нам широко-извістный труженик и бывший редактор газеты ”Лемко“ Дмитрий Вислоцкий проживающий теперь во Львові. Розносилися до того часу уперты слухы, што Дмитрий Вислоцкий (Ваньо Гунянка) здрадил нашу организацию и працує против ней. Но показуєся што он за цілий тот долгый 20 рочный час был сердцрм и душом с нами, но не мог, лем по йому знаных причинах признатися до того. Послі отъізда II группы визиторов он выразно написал обшырну статью в Києвской газеті, што он єст сердцем и душом с родным народом. А то должно успокоити тых, котры боялися за подупадок народного духа у Ваня Гунянкы.

Кромі той важной миссии, яку выполнила друга группа екскурсантов Лемко-Союза до Краю, руководитель єй Иван Адамяк принюс неоціненный експонат для Талергофского Памятника в Лемко Парку — землю из могилы молодого мученика Ивана Гринишина, убитого німцами за то што он укрыл русского солдата, котрому грозила смерть из рук німецкой розвідкы.

На тот, 1966 год, иде подготовка организации третьой з ряду группы членов Лемко-Союза, а быти може отразу двох, або и трьох групп, под новыми руководителями. Сут предложения, штобы кажда группа взяла свою дорогу, єдна подобну Першой группі, друга Другой а третья штобы взяла новый курс на Пряшевщину и была присутна на фестивалю самодіяльных кружков зо всіх сел Пряшевщины, а быти може и Лемковский ансамбль співу и танцу з Білянкы, з Польской стороны и ансамблі с Подкарпатской Руси, або официально названой Закарпатской области. О тых поіздках ище предвчасно писати, бо то залежит сколько и до котрой группы зголосится охотников. Но важно тото, што связ с родным крайом, с родным народом нам всіми силами треба поддержувати бо родинна связ, приятельство наше с крайом єст єдинственным способом, єсли хочеме обогатіти себе духовно ту на эмиграции и поддержати морально свой народ в його віковой борьбі за свои права, котры нашому народу належатся яко людям и на котры он собі заслужил своим культурным бытом и тяжком борьбом в обох світовых войнах, на што сут документальны доказы.

Але не треба забывати што и отдільны туристы до краю мают ведике значение и выполняют тоту важну ціль нашой связи с родным крайом и народом. На протягу року, читали зме дописы в ”Карпатской Руси“ от такых отдельных визиторов, котры вернулися с новым духом подкріпленым встрічами. Меже иншими треба вспомнути Теодора Фучилу, доброго патриота для свого народа и труженника в Лемко-Союзі. Он вернулся с новостями котры радуют го, но и с такыми котры тронули його чувства до слез, особливо тогди, коли он у виділ знищене своє родне село и цілий лемковский край. Он назвал то страшном трагедиом нашого народа и подобно, так як и другы нашы члены призыват лучше пильнувати нашой молодежы, интересувати єй родным крайом, учити єй родного языка и они, яко учены наша интелегенция враз с лемковском интелегенциом котрой што раз больше и в родных краях в Европі, должна буде выступити в обороні так спльондруваного родного краго и спасти його достоинство и честь на котре он собі заслужил.

Тоты ціли связи з родинным крайом мы в Лемко-Союзі проповідували с самого початку и пробували держати тісну связь. Но тоты связи были прерываны, войнами и всяком реакциом по обох сторонах океана, котра пробувала розбити нашы и так слабы силы, розділити нас и стерти з лиця земли. Такой маленькой народной газеты яком была в початках ”Лемко“ а потом ”Карпатска Русь“ боялися державы и не допускали єй нашому народу. Но тоты часы утиску и неволи минают. Мудры люде твердят, што не богатство робит человіка свободным а наука. Днеска жадне правительство не може игнорувати научных сил, бо світ поднюсся в наукі. Што раз больше ученых выходит не с даякой высокой классы але и с бідных народных масс, и они являются гварантиом нашого освобождения, они поддвигнут справу лемков перед світом. И они то зроблят. Лемкы в краю еставили по собі с давных віков, тилько доброго и культурного зробили в остатны десятирочия, што наше учене потомство не має чого стыдатися. Оно може лем гордитися и гордится тым, што йому припаде така благородна роль спасти обречене на погибель племя, племя с котрого они сами походят.

Мы віриме, што они не позволят буквально скрутити своє родне лемковске племя.