Послі трудной, але успішно завершеной операции, помер єден из пионеров организации отділа Лемко-Союза ч. 21 в Торонто в Канаді, Григорий Кузмич, день перед тым, як мал оставити шпыталь. Помер он на 69 року свого житья при свойой родині в Клифтон, Н. Дж. Григорий Кузмич походил зо села Снітница, Грибовского (теперь Горлицкого) повіта на Лемковині. Перший раз прибыл он в Америку перед I Світовом войном до Пассайку, где прожил около 6 літ. Ту он и оженился на дівчині с роду Токарскых зо села Суровиц, Сяноцкого повіта. Вернули они до краю с єдным хлопчиком Иваном. В краю у них родилися ище єден сын Владимир и дочка Мария. Григорий повернул за океан, але тым разом до Торонта в Канаді в 1927 року, а в 1934 року перебрался знов до Пассайку в Соєдиненны Штаты. Тут он пережил войну, а діти пережили войну в краю, бо жена умерла в 1940 р. Григорий оженился о четырі рокы послі того с вдовом Мариом по мужу Федорчак, у котрой было двох сынов. Першом из дітей по войні досталися за океан донька Мария, котра была забрана німцами до таборов на роботы. Она приіхала до міста Чадам, Онт., где отдалася за білорусского человіка по имени Цыганик. Слідуючым прибыл в Америку сын Иван зо женом и с троими дітьми. Найстарший сын Ярослав, т. є. внук Григория, уж служит в Американской Армии, решту посіщают школу. Остатным приіхал сын Владимир в 1960 року зо женом и єдным сыном. Така коротка родинна история Гр. Кузмича. В народной истории пок. Г. Кузмичу слідовало бы открыти нову страницу так, як он жил тилько родинным житьом сколько и народным, його слідує записати до першых пионеров, котры основали и будували Лемко-Союз от начала. Он належал до членов-основателей Лемко-Союза ч. 21, в Торонто, Онт., котрый органиозвался при нападі организованой банды, котра розпорошила публику основательного собрания и выперла всіх на улицу. Но при енергичной діятельности такых, як Григорий Кузмич, отділ в Торонто взрос до єдного из найсильнійшых отділов нашой организации. Коли переселился в Соєдиненны Штаты, стал членом містного отділ а и трудился в нем вірно за всі часы, брал уділ в окружных и головных съіздах, а в послідном уряді сполнял ролю Ген. Секретаря, а при теперішном он сполнял ролю члена Контрольной Комиссии. Сынов своих не пустил на пусты бездорожья — они сут членами Л. С. Помер Гр. Кузмич дня 19-го ноября, похороны отбылися 23 ноября с церкви св. Троицы. Отвидіти помершого, а потом приняти участь в похоронах пришли многочисленны друзья, родина и члены организации. С Канады пришла дочка Мария с мужом и краян и близкий друг Василь Корбич зо женом из Торонто, Онт. Вдові Марии с цілом родином выражаме глубоке соболізнование по утраті любимого члена родины. Членам Л. С. и друзьям Кузмича тоже выражаме глубоку скорб и просиме всіх подняти народный обовязок на свои плеча, котрый до того часу нюс Гр. Кузмич, за што му буде вічна память меже нами. |
