Chants65

ТАМ НА ГОРІ ЗЕЛЕНИНА

Там на горі зеленина,
Жала єй Катерина,
Жала, жала, нажала си,
Пришли ку ней два югасы.

Што ты робиш, Катерина,
Наша то єст зеленина,
Взяли от ней перстін за то,
И коничка за сто златых.

Береш коня, бер-же и мя,
И сам не знаш, где ты згынеш,
Ци на горах, ци в долинах,
Ци ту на тых зеленинах.

Ци там на кошицкой гірці,
Ци при шумній фраирці,
Ци на деревянім мості,
Ци при молодой невісті.




Мам я пищалочку
На дванадцет дірок,
Не хоче пискати
Для парадных дівок.

Буду сой співати,
Буду сой пискати,
Любят мене дівкы,
Хоц єм не богатый.

Як єм сой записакл
Вчера на убочы,
Вшиткы парадниці
Звытріщали очы.

Пискай, пищалочка,
З раненька по росі,
Піде голос дівкам
Парадным по носі.

Як я сой запискам
В лісі на поляні,
Почує дівчатко
Аж в селі Сочані.

Бо моя пищалка
З явора зроблена
А моє дівчатко,
Як ружа червена.

Михаил Бугель.



ЗОЗУЛЕНЬКА

Зозуленька, де ты была,
Коли велька лія была?
Ку-ку-ку! Ку-ку-ку!
Сідила я на буку.

Чом ты с бука не злетіла.,
А под стріху бы ты сіла,
Піря была-с не змочила.
Ку-ку-ку! Ку-ку-ку!

Я сідила на буку,
И на хмары позерала,
Як ся из них вода льяла —
Ровну землю заливала.

Ку-ку-ку! Ку-ку-ку!
Сідила я на буку,
Я ся дойджу не бояла,
Бо я гніздо закрывала.

Яєчка я выгрівала,
Ку-ку-ку! Ку-ку-ку!
Сідила на буку зато я.
Діти выховала.

Зозуленько, где ты была,
Же-с так долго не кукала?
Сідила я на высокой вежі,
Чекала я нич пройдут жолнеры.

ChantsEnd

[BACK]