Коли Пелягия Сипляк повернула из поіздкы на Лемковину и Совітский Союз минувшого літа, то єй ждала несподіванка. Єй діти враз с мужом Михаилом Сипляк приготовили за тот час торжество 50-рочного юбилею супружества. Праздник отбывался 10 августа в домі єдной дочкы и зятя Мр. Мрс. Говард Белсер, котры проживают в прекрасном свойом домі в Индепенденс, Огайо, недалеко Кливланду.

Торжество 50-літного юбилею Михаила и Пелягии Сипляк отбывалося в саді коло дому, бо погода была прекрасна. На юбилей зышлося велике число народа, старшых краянов и родины и молодежи знакомой и родины, а меже ними была дружина их правдивого весіля 50-роков тому Иван Гоч и Филип Грацонь, бывшы дружбове, и Анна Морган и Анна Грацонь дружкы и Текля Сипляк свашка. Присутны были и всі три сестры Пелагии Сипляк, бо они жиют в Кливланді.

На юбилею был присутный и настоятель прав. катедры, до котрой Сиплякы належат, где женилися, и слідуючого дня была отслужена благодарственна отправа. На юбилею присутна была и широко извістна народна роботница Акиля Варна, котра меже присутными собрала 34 доллары на пресс-фонд газеты “Карпатска Русь”, котрой Сиплякы сут предплатниками от самого початку и щиро, яко члены Л. С., поддержуют єй. Желаме нашым дорогым краянам юбилян там много літ прожити в счастью и здоровью.