Велику утрату потерпіла наша организация Лемко-Союз, и вообще наш лемковский народ с смертьом Александра Шкирпана, любимого народного діятеля в нашой колонии города Стамфорда, Конн. Александер Шкирпан родился 20 марта 1900 року в селі Маластов, Горлицкого повіта, на Лемковині. Понеже Александер с молодых роков показувал способности и любов до наукы, родиче отдали його в лемковску бурсу в Горлицах, где он ходил в гимназию. Но продолжати науку долго не мог, бо в 1914 року выбухла Перва Світова война. Старшых студентов австрийскы власти заточили в концентрацийный табор Талергоф в Австрии, а молодшы студенты вернулися в свои родны села, но многы из них не застали своих родичов дома, особливо отцов, бо они были забраны в Талергоф. Но получена наука отбилася уж на интеллигентности його характера, и прогрессивных поглядов, чым он славился всью свою жизнь. Послі окончения войны, для Александра не было занятия при бідной селянской родині, так он як и многы тысячы молодых лемков вышол в Канаду в 1927 року. Там он женился на єдносельчанкі, Елені Ротко и потом разом поселилися в городі Стамфорд, Конн., США. Тут он прожил до остатных дней свого житья. Они набыли собі малый, але уютный дом, в котром выховали двоє дівчат Даянку и Джюлиет и сына Николая. Теперь, коли при дорослой родині, в родинном гнізді было бы так счастливо жити, пришла несподівана година 26 мая 1958 року, котра забрала от жены и дітей любимого мужа и отца, а организации Лемко-Союза дорогого, почтимого и активного члена. Александер Шкирпан был тихого характера и с каждым вірного приятельства. От самых початков свого прибытия в Америку, он был примірным членом Лемко-Союза, КРА Центра, в Юнкерс, Н. Й., читательом и дописовательом тазеты “Лемко”. Все отзывался щедро жертвами на народны ціли и охотный к каждой роботі свого отділа Лемко-Союза. Утрата його, належит до єдных из громадных убытков в наш ом емигрантском житью. |
