Вершы Петра Циркы
Peter Sirka
Лемко Майнер (Петро Цирка)

МЫСЛИ МАЙНЕРА

Раз пытался лемко попа,
Што то за причина,
Же статуя Свободы
Не хлоп, а женщина.
Таж вы, отче, сами в церкви.
Нам оповідали,
Што мы з раю через Єву
У біду попали.
Теперь Євам статуи ліпят
И красно малюют,
А што тоты за маляре —
Казаня не чуют.
А до того ище дают
На голову вінец.
Ци не знают, же для хлопа
Свободі он конец.
Та и попам больше
Не дают женитись,
Бы были свободны,
Покля будут жити.
Не надармо баба стоит
В Ньюйоркском заливі
И хлопов чатує,
Як в літі, так в зимі.
И то не посмотрит
Вам просто до очи,
Звернула их в гору —
Хце с неба помочи.
За Свободу взяти хлопа
И дати му файку,
А до правой рукы —
Здорову нагайку.
Най бы выгнал тоты пані
У безлюдны тундры,
Най бы си там іли ябка,
Кедь суть такы мудры.
Та уж буде дост на мене
Ту того писати,
Зима иде, угля треба —
Тра майнерувати.

РІЖНЫ ИНТЕРЕСЫ

Жила красива Марися,
Служила у пана,
Пан ся до ней залюбил
В неділю вчас з рана.
Люде зараз доповіли
До Пановой пані,
Та уважат на Марисі,
Як єй грубне в стані.
Та зачала до пана
Так бесідувати:
Не можу я на Марисю
Дрес допасувати.
А пан пані отповідат:
Як єй не пасує дрес,
То Марисі, а не пані,
Тот єсть интерес.
Я єй зараз прожену,
Бо то так не ладні,
То знов твой єсть интерес —
Гварит пан до пані.
Я так чула, — гварит пані,
Што пан в том причина,
То знов єсть мой интерес,
Не твоя дівчина.
И обоє мали свои
Ріжны интересы,
Лем Марисін найгірший —
Не пасуют дресы.

ТАК НЕ ДОБРІ И ТАК ЗЛЕ
(Стародавна повіданка вершом)

Жил у дворі собі пан
И слугу тримал,
А тот слуга Парасю
Красну жену мал.
И направду была то
Красива Парася,
Як на зло паниско
До ней закохался.
Тай прибератся Парася,
Больше не сумує,
Грошей у ней все полно
Пан єй всьо купує.
Але слуга помалы
Сам доміркувался,
Же то пан єй дає грошы,
Бо в ней закохался.
Но боится на пана
Тото выкричати,
Бо пан може го зато
Зо двора прогнати.
Добрі было бы
Пані россказати,
Але не зна, як бы то
Тото роспочати.
Тай взял мітлу в рукы,
Так єдного рана,
Близко панского покою
Замітати ганок.
И на право и на ліво
Мітлом вымахує —
Так не добрі и так зле —
На голос диктує.
Пані близко в поко
Слугы выслухала,
Отворила окно зарас
И ся го спытала:
Што таке ты повтаряш? —
Пані ся пытає:
“Так не добрі и так зле” —
Што то означає?
Я бы повіл тото пані,
Але я ся бою,
Бо як повім, страчу службу,
А не повім, не маю спокою.
Ты не бойся, а росповіч,
И не стратиш службу,
А як буде дашто добре —
Тя вынадгороджу.
И росповіл всьо пані,
Што пан вырабляє,
Што он його жену
Парасю кохає.
Пані хмурно посмотала,
Но нич не сказала,
Зараз слугу зо собов
До покою взяла.
Пана дома не было —
Десь пішол на коню,
Слуга занял його місце
У панском покою.
Пані пана одогнала
От Парасі скоро,
Сама собі зо слугом,
Пан не зна ничого.
Теперь слуга веселый,
Старунку не знає,
Паню любит — пані його —
Ище грошы дає.
И на право и на ліво
Мітлов вымахує:
И так добрі, и так не зле —
Свище, приспівує.

ЛЕМКО И ЦИГАН

Иде циган за дорогом,
Лемко луку косит,
Тай не сміло циган лемка
Закурити просит.
Ци не мате, пане-газдо,
Дашто закурити,
Я бы пристал аж и за то
Вам дакус косити.
Циган думат, што лемка
Он так вырыхтує,
Як достане дугану,
Дальше повандрує.
Але лемко не с тых был —
Не дал ся здурити.
Подь гев, цигай, кедь хочеш
За дуган косити.
А я піду домів
И выправю Ганю,
Жебы пішла до корчмы
Принести дугану.
Косит циган, уж полудне,
Лучы пригрівают,
Иде газда и повідат —
Дугану не мают.
А бодай вас поразило,
А и вашу Ганю,
Накосился, натрапился —
Не достал дугану.
Шмарил косу до травы,
Дуже позлостился,
Потыркотал, вказал зубы
И дальше пустился.

Лемко Майнер
(Петро Цирка).
Вилкес Барре, Па.



[BACK]