Там где пташкы співали,
Зозуля кукала,
А мати с дівками
В поли працувала.

Отец косил луку,
Сынове грабали,
Як надышол подорожный —
Мило го витали.

Витай в Христі брате,
Што нове зо світа?
Повічте нам, як то буде,
Якы будут літа?

Я вам повім, любы братья,
Што ся с нами стане,
Же на нашой родной землі
Мало кто остане.

Там где отец духовный
Проповідь голосил,
И до згоды, до любви
Парафиян просил.

Там отец духовный
Кропилом покропил,
Лемко собі заспівал,
За келишок хопил.

Там где дьякы співали
Всіма голосами,
А люде ся молили —
Боже буди с нами.

Где музыка заграла:
Гуслі, кларнет и цимбалы,
Всі пішли до танцу,
Аж и діти малы.

Он єй тримал попід пахы,
И до себе тиснул,
Она йому штоси шепла,
А он собі свистнул.

По весілю сващины,
А пак притулины,
Тогды каждый ся притулил
До свойой Марины.

Там где кума до кумы
Часто приходила,
Як виділа там другого
Куму огварила.

Назар Клапач,
Нью Йорк, Н. Й.