Лемковскы Танечны Мелодии (Співанкы) — Иванович


ИДУ ГОРАМИ
(Лемко-Вальс)

Иду горами,
Иду лісами,
А як я тя заволам
Одозвий ся мі.

Одозвий ся раз
Серденьку мому,
А най же я прийду ближе
К личеньку твому.

На горі сосна,
Сім рочків росла,
Сідит под ньом мила моя
Смутна, жалостна.

Чом ты бануєш,
За кым жалуєш,
Повіч, же мі мила моя,
Ци за мя підеш?



ЗА ГОРЫ ЛІСЫ
(Лемко-Вальс)

За горы лісы,
Миленька, где ты си?
Што мы ти вязали
С пантличком власы.

Пантличком власы,
Пантличком білом,
Што мы ся любили
Кажду годину.

Кажду годину
Та и минуту,
День-в-день през тыждень,
Та и в субботу.

Встань мила горе,
Бо уж день білый,
Пойдеме до гаю
Рвати лелии.

МИЛА МОЯ МИЛА
(Лемко-Полька)

Мила моя мила
Лем ти єдна вина,
Близко воды бываш —
Ножкы не омываш.

Як бы-с дальше была,
Личко бы-с не мыла,
Личко по тыждньови,
Ножкы по рочкови.

Дякую ти мила
За твою доброту,
Што-с мі отверяла
Дверечка в субботу.

Дверечка в субботу,
В неділю облачок,
Остань мила здрава,
Бо я уж воячок.



КАЗАЛ МОЙ ОТЕЦ
(Лемко-Полька)

Казал мені мой отец,
Абы-м оженился,
По корчмичках не ходил
И не волочился.

Казала мі мамуся
И наказувала,
Ожень ты ся сыночку,
Ой як буду рада.

Казал мені мой отец
Давныма часами,
Покай же ся, сыну мой,
Бо пойдеш с торбами.

Я отца не послухал,
Ани свойой маткы,
Волочуся, где хочу,
Як напьюся водкы.



АНИЧКО-ДУШИЧКО

Аничко-душичко, где ты была,
Же ты так чизмичкы оросила,
Была я в гаичку, жала я травичку,
Роса была, роса была.

А я там на горі овес косил,
Я свои чиземкы не заросил,
А я там грабала, на тебе чекала-м,
Душо моя, душо моя.

Аничко-душичко, где ты была,
Же ты свою красу утратила?
Там коло Дунаю, где рыбкы плавают —
Душо моя, душо моя.

Иванович.


[BACK]