Золотый юбилей супружества: Андрей и Пелягия Гащиц.

Золоты юбилеи супружества устроюются в ріжных формах, залежно от условий, в якых юбилянты жиют. Юбилянтам, котры тісно связаны с организациом, устроюют несподіванну гостину члены организации. Юбилянтам, котры мают широку родину, устроюют юбилеи діти або приятели. А суть и такы, котры тримают в тайні дату свого юбилею, и устроят сами торжество, зробивши несподіванку родині або приятелям, котрых любят. До тых належат читатели нашой газеты Андрей и Пелягия Гащиц из Когус, Ньюйоркского штата. Андрей Гащиц родом из села Липне, Горлицкого повіта, на Лемковині, а його супруга Пелягия, из роду Китчак, из села Вышовадка, Ясельского повіта.

50-літие супружества Андрея и Пелягии Гащиц припало на 11-го июня 1955 року, а понеже то была суббота, то свой праздник они устроили в неділю 12 июня. На свой золотый праздник они запросили близку родину и приятелей с близка и далека, а не пояснили, чого их просят. На тото торжество пришли гости аж из Кливланду, в Огайо, а то Павел Наговский и Мария и Антон Шашко. На юбилей они ишли со смутком, бо думали, што певно дакто в родині серьозно хворый. Розумієся, што послі такой несподіванкы на торжестві Гащицов всі весело забавилися, проспівали много весільных співанок и обновили родинну связь и любовь меже собом, послі чого юбилянты счастливо перешли порог на нове 50-літие, вдячны свойой судьбі и крепкому здоровью, котрым были наділены.