В неділю 5 сентября 1954 года в Карпаторусском Американском Центрі в г. Юнкерс, Н. Й., выходцы из двох лемковскых сел, Ганчовы и Ріпок (Горлицкого повіта) устроили по строкрайовому обычаю объєдиненный кермеш. Выбрали кермешовый комитет, котрый повідомил всіх краянов, розголосил предприятие в газетах и запросил также выходцев из сусідных сел и всіх симпатиков, штобы пришли забавитися и погоститися разом с Ганчовянами и Ріпчанами. Так кермеш прошол дуже успішно. В дійствительности то выглядало больше на вселемковский кермеш, а не тилько кермеш односельчан из двох сел.

Народу собралась громадна сила. Комитет приготовлялся на 300 гостей, и на стилько народа заставили столы в великой галі Центра, бо по роспроданным наперед тикетем и полученным письмам выглядало, што не буде больше. Но потом начали приходити краяне из поблизкых и дальшых місцевостей, што ани не дали знати о собі наперед Комитету, што будут на кермешу. Так треба было роскладати лика, то місця было. Но с обідами для гостей вышло не так легновы столы. Добре, што галя веко, бо то на скору руку немож приготовити. Комитет и менаджеры от кермешу Т. Фецица и Игнатий Дурняк старались, што было в их силах, обстаратися в послідню минуту, штобы задоволити всіх, но и так часть гостей не могла быти обслужена, як належится.

Погода была прекрасна — был солнечный теплый день, як в середині літа, так може тота красна погода притягла на Кермеш много краянов, котры перед тым и не думали іхати и не давали о собі знати.

На Ганчовско-Ріпчанском Кермешу в Карпаторусском Американском Центрі в Юнкерс, Н. Й., 5 сентября 1954 года. (На фотографии видно лем часть гостей).

То был Кермеш, якого в Ганчові и в Ріпках напевно николи не было. В старом краю на кермеш приходили лем родина и знакомы из поблизкых сел, а тут в неділю 5 сент. 1954 Ганчовяне и Ріпчане мали на свойом Кермешу народ с цілой Лемковщины и много гостей с Пряшевщины.

На Кермеш были запрошены и пришли настоятель русского православного прихода в Юнкерс прот. Йос. Пиштей и редактор газеты “Правда” о. Роман Саміло из Филадельфии. За банкетом они оба выголосили прекрасны бесіды, в котрых поздравили Ганчовянов и Ріпчанов с их церковно-народным торжеством и подчеркнули, што в Америкі мы всі ровны граждане и маме такы свободы и привилегии, як и всі другы американцы, то не треба боятися, што дакому не любится ныні даже саме имя “русский”. Мы можеме быти добрыми американскыми патриотами и вірными гражданами, но притом хранити свои русскы народны традиции и сміло говорити, што любиме свой великий русский народ, його язык и культуру.

Люде забавились, як рідко коли. Напевно тот Кермеш останеся у всіх надолго в памяти, Краяне приіхали даже из далекых околию — из Канады, из Огайо, фармеры с верхньой части Нью-йоркского штату. Як звычайно в нашом американском житью — многы из них живут так далеко одны от другых, што долгы рокы не можут встрітитися. А Кермеш собрал их разом, то не могли наговоритися и нарадуватися встрічом.

Из Бейонну, Н. Дж., кермешникы приіхали на автобусі и были так задоволены, што казали, же на слідующий кермеш приідут от них три автобусы народа.

Члены Комитета Ганчовского и Ріпчанского Кермеша: (сліва направо) Даниил Дурняк, Петро Онущак, Теодор Дошна, Игнатий Дурняк, Иван Штекля, Иван Вандзиляк, Григорий Яцевич, Иван Дурняк и Тимко Фецица.

На самом банкеті были покликаны до слова найперше краяне из Ганчовы и Ріпок. Они высказовали свою радость, што так много собралось народа, и припоминали, як то в старом краю отбывались у них кермешы. За Бейонн говорил Симеон Демай, котрый был одным из инциаторов кермешу и належал до кермешового комитету. За Ріпкы говорили Иван Малютич и Антон Каня, так само члены кермешового комитета. Иван Штекля, из Стемфорд, предсідатель комитета, открыл торжество и передал руководство Даниилу Дурняку из Юнкерс. Был отспіваный американский гимн, а так прот. Пиштей змовил молитву. И началась гостина. Обід приготовили ганчовянскы газдыни под руководством Марты Сливка. Они мали найбольше роботы, бо обслужити таку массу народа то не было легке діло. Заряд цілым кермешом был на руках менаджеров Тимка Фецицы и Игнатия Дурняка. Они разом с членами комитета положили много труда, штобы обеспечити такий величавый успіх предприятия. Но треба признати, што зробили добру роботу — писали в газетах и прозом и вершами и росписувалися приватно с краянами по цілой Америкі.

На кермешу проведено сбор на Пресс-Фонд: было собрано 90 долларов, котры розділено по ровной части на газеты “Карпатску Русь” и “Правду” в Филадельфии.

Люде могли забавитися до поздной ночы, бо на другий день припадал праздник Труда — “Лейбор Дей”, то не треба был спішитися до роботы. Вечером заграла оркестра до танцу, и зараз велика галя нашого Центра наполнились танцующыми парами. Треба замітити, што на кермешу было много и молодежи. Може на инше предприятие они бы и не пришли, а на кермеш пришли, и напевно всі мали “гуд тайм”.

На кермеш пришли краяне из разных парафий, не тилько православных, но и униатскых. Всі припомнули собі, што в старом краю кермеш праздновали разом як один народ, то и тут в Америкі не треба ділитися при такой оказии.