Открытие Карпаторусского Американского Центра в Юнкерс, Н. Й., состоялось 28 мая 1939 року. Так в нынішньом 1954 року мине 15 літ от той памятной даты, як мы вступили до выконченной и модерно зарядженной свойой Народной Будовы, открыли в ней ресторан и начали устроювати регулярно всякы народны предприятия и забавы. А потом в місяці июлі того самого року были переведены до нашого Центра типография и редакция газеты “Лемко”.

Будинок Карпаторусского Американского Центра в Юнкерс, Н. Й., в 1953 року: Вид с боку — со стороны Мидленд евню.

Початкы нашой Народной Будовы были дуже трудны, бо готовых грошей у нашых организаций не было, то мы будували свой Центр на пожичкы и добровольны жертвы. А то были часы послі великой депрессии, то пожичку и жертву не было легко достати меже нашыми членами. Так в день открытия Народной Будовы на ней остались громадны долгы. Но за тых 15 літ наш Центр завдяки самопосвятной роботі передовых членов в Юнкерс и поблизкых місцевостях и честной господаркі вышол на вольну дорогу, бо выплатил приватны пожичкы и моргичы и має в кассі достаточно готовкы, штобы сплатити и организацийны пожичкы, якы ище остались. И от всіх приватных пожичок наш Центр выплатил членам и процент 4% за всі рокы.

Велика галя нашого Центра: Приготовляются на весільну забаву.

Штобы показати, якы трудности мал наш Центр на початках, послі открытия, мы приведеме тут гдеякы цифры из первого финансового справоздания, яке уряд Центра предложил на членском собрании в маю 1940 року. То было справоздание от основания корпорации Карпаторусского Центра до 30 апріля 1940. В нем показаны всі росходы на будову, а в доходах показано всьо, што корпорация Центра получила от членов в виді жертв и пожичок, а также заробила на пикниках и другых предприятиях.

Но до того отчета корпорацииКарпаторусского Центра требы додати отчет Русско-Лемковского Клуба в Юнкерс, от котрого Карпаторусский Центр перебрал землю и початок будовы. С тым Карпаторусский Центр перебрал и такы долгы и обязательства:

Но разом с тым Карпаторусский Центр перебрал от Русско-Лемковского Клуба в Юнкерс банкову книжку, на котрой было $431.52. То значит, што перебранны обязательства составляли $11,568,48. В том было 2,100 долларов членскых взносов и жертв, котры не треба было вертати, и $9,468.48 моргичу и прямых пожичок, котры треба было вертати. И зараз в первом року послі открытия Центр вернул отділу Русской Секции ИРО 1,000 долларов из той пожичкы.

Так тото перве финансове справоздание Карпаторусского Центра в маю 1940 року показувало такий стан пожичок на будові Центра:

Як видиме из того справоздания, ситуация в 1940 року не была весела. На банковой книжкі осталось лем 178 долларов и 96 центов, а тут было поверх 53 тысяч долгу, и в том выше 2 тысяч контракторам за роботу и материал. До того треба было платити в том часі около 2 тысяч “риел естейт” тексу до міста и проценту от моргичов и приватных пожичок около 1,500 долларов рочно. А больше ниякой пожичкы ни поддержкы не можна было в тых часах ни от кого достати. Лемко-Союз дал свои послідны готовы грошы в будову Центра уж попередно, то не мог больше помочи. Правда, были люде и в Юнкерс и в другых місцевостях, котры мали готовы грошы, но боялись дати, бо виділи, што ціла тота будова сильно задолжена, а не знати было, ци будут доходы, штобы выйти из тых долгов.

Наш Центр в Юнкерс: Місце на пикникы.

На центрі был моргич на 20 тысяч долларов. Тот моргич правление Центра получило ище перед закончением будовы от двох членов Теодора Пыртея в Юнкерс и Йосифа Былицы (ныні уж покойного) в Елизабет. А приватных пожичок было много от нашых членов в разных частях Америкы, котры давали на пожичку, скилько могли. Но больше не можна было нигде достати. Так вся судьба нашой Народной Будовы залежала цілковито от того, як пойде бизнес в ресторані Центра, и от предприятий. На счастье, в том критичном моменті мы мали в правлении Центра людей, котры не заломились под тым тягаром, не стратили духа. То были предсідатель Центра Иван Малютич и кассир Владимир Гончарик, ныні уже покойный. На початках, коли были наглячы выплаты, а грошей в банку не было, то они часто давали тымчасово на пару місяцев свои грошы, штобы биллы Центра были заплачены.

Ресторан нашого Центра: Вид на праву сторону с головного входу.

Ресторан и галя Центра начали приносити добры доходы, и так можна было сплачати тот громадный долг, який был на Центрі. Доходы не все были одинаковы. Найвысший доход был в 1946 року — зараз по войні. Тогды ресторан и галя принесли 16 тысяч чистого доходу. Такий доход дає можность покрыти всі росходы Дома и отложити добру сумму на уплату пожичок або до резервы. Но доходы упадали и до 5 и 4 тысяч рочно, а того уж совсім мало даже на уплату податков, ассекурации, процентов, поправок и другых росходов, связанных с будовом. Но в минувшых двох роках доходы поднялись, и Центр має достаточно готовкы, што може зараз выплатити всі остальны долга и мати чисто выплаченный маєток.

Центр выплатил моргичы членам и приватны пожичкы, але взял моргич от Лемко-Союза на 10 тысяч. Финансове справоздание правления Центра на собрании членов в минувшом року (в маю 1953) показувало такий стан пожичок:

Тото саме финансове справоздание показує, што в банку Центр мал в маю 1953 року около 10 тысяч долларов и на беспроцентовых пожичках студентам $6,406.50.

Як видиме, то єсть великий розділ меже ситуациом в маю 1953 року и тым станом, який был в маю 1940 року, коли долгу было выше 53 тысяч, а готовкы в банку осталось лем 178 долларов.

Ресторан нашого Центра: Вид на праву сторону Бары.

Нашы люде при Карпаторусском Центрі научились много. Одны научились вести бизнес и потом открыли свои приватны бизнесы. Иншы познали, што вести бизнес то не така уже велика штука, но треба пильнувати и знати найтися всяди так, штобы никто вас не ошукал. А при таком народном маєтку, як наш Центр, то головне, штобы были все регулярны доходы, бо утриманье такого будинку коштує великы суммы. Самого “риел естейт” тексу треба платити около 3 тысяч долларов рочно. Зато членам на собраниях треба все слідити за финансовыми справозданиями и интересоватися, як стоит финансово Народна Будова. Много нашых народных домов в Америкі попродало лем через то, што члены занедбали справу. Люде думали, што то дост поставити або купити Народный Дом, и он буде стояти, бо он из каменя и цеглы, то може вытримати и сотку літ. Но так можна было вытримати в старом краю, где податкы были дуже низкы. А в Америкі, як показала практика, далеко лекше поставити або купити дом, як утримати го. Нам треба научитися смотріти на справу так, як смотрят и приватны американскы фабриканты и другы бизнесмены. Они як видят, што человік знав роботу и приносит доходы, то будут го тримати и шанувати, хоц лично го не любят. А свого близкого фамилианта, даже брата выжене зараз с роботы, як видит, што при нем тратит на бизнесі. Так и мы в нашых народных ділах стараймеся всяди ставити на роботу такых людей, котры найлучше го того надаются. А ци они надаются, то познаме найлегче из того, як діло йде при них, якы доходы приносит.

И теперь, коли мы споминаме 15-у годовщину нашого Карпаторусского Американского Центра в Юнкерс, мы хочеме выразити благодарность всім тым членам и организациям, котры своими жертвами, пожичками и трудом помогли выбудувати нашу Народну Будову, а и всім тым, котры потом взяли в рукы готову Народну Будову и своим трудом, знанием и поддержком помогли не тилько утримати єй, но и подняти на высоту, на якой она ныні находится.