Сегодня майже каждый из нас в Америкі платит на социальне обеспечение, котрым завідує федеральне правительство. Головно тут росходится о ассекурацию на стары рокы для робочых, котрым мине 65 літ, и обеспечение для близкой родины робочого в случаю його смерти перед осягнением 65 літ.

Тота державна ассекурация была введена в житье с початком 1937 року, при Президенті Рузвельті, и єсть обовязкова, но и так рекорды показуют, што ище и теперь — в 1953 року случаются выпадкы, где робочий або його родина мают право получати пенсию або запомогы на основі закона о социальном обеспечении, но не получают их, бо не подали заявления, предписанного законом. Коли робочий має ассекурацию в даякой запомоговой организации або в приватной ассекурацийной компании, то всі в родині знают о том, бо йому пришлют грамоту або полису, и он платит місячно ци там квартально на тоту ассекурацию. Так в случаю смерти такого робочого його жена, діти або друга родина зараз глядают за полисом и подают заявление до офису запомоговой организации або ассекурацийной компании по тоту ассекурацию. А тут при федеральном социальном обеспечении не выдают ниякых грамот, ани не кажут платити місячны взносы, лем сами стягают с пейды робочого там, где он робит, и дают на тоту ассекурацию, так што дуже часто жена робочого и його діти ани не знают, же их отец платил на то, и же они мают право получати пенсии або запомогы.

В приватной ассекурации вы записуєте свое “посмертне” на кого хочете из вашой родины. Но в той федеральной ассекурации ниякого записуванья не треба, бо закон сам установляє, кто має право получити запомогу. Робочому, котрый подпадат под тоту ассекурацию, не выдают грамоты, лем выдают йому номер социального обеспечения. За то тот номер єсть дуже важный и для самого робочого и для його родины. То так, як грамта от запомоговой организации на вашу приватну ассекурацию. Тот номер треба добре хранити, а также от часу до часу треба провірити, ци там в головном офисі той федеральной ассекурации вашы рекорды суть правильно записаны.

Мы сказали выше, што майже каждый из нас платит на социальне обеспечение. А то значит, што майже каждый має державну ассекурацию. Кто робит для другого, для компании ци приватной особы за “пейду”, то йому уж там на роботі из пейды оттягают означенный процент и посылают федеральному правительству на имя и номер того робочого. А кто робит сам про себе в даяком приватном бизнесі, то он платит на свое социальне обеспечение разом с доходовым податком раз на рок. Выключены из того федерального обеспечения лем фармеры, котры мают свои власны фармы, священникы и больша часть профессиональных людей, як докторы, адвокаты и др., котры працуют сами для себе, а не служат за пейду. Так само робочы в гдеякых благотворительных институциях и разны категории державных служащых выключены из социального обеспечения.

Головну массу народа, охваченного социальным обеспечением, составляют робочы и служащы в индустрии и бизнесі. Напримір, в 1950 року было около 60 миллионов такых робочых и служащых, котрым стягали с пейды процент на социальне обеспечение.

От 1950 року до конца 1953 на социальне обеспечение стягали с пейды 1.5%, то значит 1 доллар и 50 центов от 100 долларов. Но кампания або приватный бизнесмен, для котрого такий робочий робил, мусіли додати такий самый процент и кажды три місяцы заслати полну сумму разом с выказом всіх своих робочых коллектору федеральных податков, котрый потом пересылал тоты выказы и грошы до головной канцелярии социального обеспечения. В тых выказах робочых от каждой компании єсть подано имя каждого робочого, його номер социального обеспечения и загальна сумма пейды, яку каждый робочий выробил за три минувшы місяцы. Так на подставі тых выказов от компаний там в головной канцелярии социального обеспечения можут записати точно каждому робочому в Америкі на його имя и його номер, скилько он заробил в том кварталі, а так тримати рекорд, скилько он заробит за ціле житья. Там не пишут, скилько он платит на тоту ассекурацию, лем скилько пейды он заробил, бо потом його пенсия и запомогы для його родины рахуются не от того, скилько он уплатил на социальне обеспечение, а от того, скилько он заробил пересічно в каждом місяці. И пейду записуют полну, яка была перед стягнением доходового податку (“Инком текс”) и другых поплатков.

Починаючи с 1 января 1954 року тым робочым будут стягати на социальне обеспечение 2% пейды, и так само компании и другы роботодатели будут доплачати от себе такий самый процент. Так буде продолжатися аж до 1960 року, а потом знова процент буде повышеный.

Но никому не записуют больше пейды, як 3,600 долларов на рок и лем от пейды до 3,600 долларов стягают процент на социальне обеспечение. Если, напримір, даякому робочому выйде цілой пейды 4 тысячы долларов на рок, то до социального обеспечения йому запишут лем 3,600 долларов и с того лем компания має право стягнути му процент на социальне обеспеченние, а с остальных 400 долларов не може стягати процент. Так до конца 1953 робочому могли стягнути найвеце 54 доллары на тоту федеральну ассекурацию (то-єсть один и пол процента от $3,600.00) и компания так само платила 54 доллары рочно. Но в 1954 року будут уж стягати 2%, так найвеце можут стягнути 72 доллары рочно от такого робочого, котрый заробит 3,600 долларов на рок, а и компания мусит стилько доложити. Як видиме, то єсть велика ассекурация, бо и в приватной ассекурации, як бы платил по 144 доллары рочно, то выйде добре обеспечение.

Выше мы говорили, скилько стягают робочому из його пейды на социальне обеспечение, а теперь скажеме, што може полупити робочий и його родина из той ассекурации.

И в приватной запомоговой организации треба платити пару місяцев, а часом и цілый рок, штобы мати право на ассекурацию. Так єсть и в той державной ассекурации. Штобы быти забеспеченным и мати право на пенсию и на запомогы для членов родины, якы установлены законом о социальном обеспечении, то треба выробити што найменьше 6 кварталов, то-есть 18 місяцев, на такой роботі, где стягают с пейды на социальне обеспечение, и заробити в каждом из тых кварталов не меньше, як 50 долларов пейды. Тут рахунок иде не на тыждни ани місяцы, лем на кварталы, бо як сказано выше, выказы на социальне обеспечение посылаются квартально, все за три місяцы. Так робочий, котрый выробил уж на социальне обеспечение 6 кварталов, рахуєся “вполні обеспеченным”, и єсли бы он в том часі помер, або уж дошол до 65-го року житья, то йому або членам його родины належатся всі права до запомогы. Но такых выпадков єсть дуже мало, штобы робочий выробил 6 кварталов и зараз помер, або дошол до 65 року житья. Звычайно єсть так, што робочий выробит пару літ постоянно, потом не робит, або найде даяку роботу, где он стягают на социальне обеспечение. В такых выпадках треба, штобы он мал хоц половину “покрытых” кварталов за тот час, який уплыл от первой його роботы на социальне обеспечение до його смерти або до 65 року житья. Напримір, минуло 5 літ літ от того часу, як робочий начал робити на такой роботі, где стягают на социальне обеспечение, а то єсть 20 кварталов. Если в том часі робочий мал што найменьше 10 кварталов, покрытых социальным обеспечением, то он має полне право запомогы. Но єсли у него буде лем 9 такых кварталов, то он стратил право.

Як видиме, тут можна набыти право до социального обеспечения и потом стратити. Коли вы выробили 6 кварталов, то мате право, но єсли потом вы долго не робили на роботі, покрытой социальным обеспечением, так што получится на вашом рахунку больше порожных кварталов, як “покрытых”, то вы стратили свое право до социального обеспечения. Но и тут єсть установлена граница. Если вы выробили 40 кварталов на роботі, покрытой социальным обеспечением, то вы уж обеспечены на ціле житье и не стратите тото право, хоц потом и не будете робити на социальне обеспечение. 40 кварталов, то єсть 10 літ, так кто робил за порядком 10 літ на роботі, покрытой социальным обеспечением, або хоц и не робил за порядком 10 літ, но робил дольше с перерывами и выробил 40 кварталов, то он уж забеспеченый на все. Значит, єсли он дойде до 65 літ, то буде получати місячну пенсию, а єсли бы помер перед 65-ым роком житья, то члены його родины мают право до запомогы из його социального обеспечения.

То само относится и до тых, котры працуют сами для себе и платят на социальне обеспечение раз на рок разом с доходовым податком. Им так само рахуєся на кварталы, но “покрытым” кварталом рахуєся тот, в котром они мали што найменьше 100 долларов чистого доходу, от якого уплатили “инком текс” и процент до социального обеспечения. Тоты самостоятельны бизнесмены платили до теперь 2.25% от их чистого доходу с бизнесу, а от початку 1954 року будут платити 3%. Найвысша сумма доходу, с якого они платят социальне обеспечение, єсть так само 3,600 долларов рочно, як и у робочых. А найменьший чистый доход у такого приватного бизнесмена мусит быти 100 долларов на квартал, або 400 долларов на рок, бо єсли єсть меньший, то не рахуєся до социального обеспечения, и такий квартал не єсть “покрытый”.

Запомогы из той державной ассекурации при полном обеспечении суть такы:

1. Місячна пенсия для обеспеченного робочого на стары рокы, то-єсть послі осягнения ним 65 літ.

Высота пенсии опреділятся на основі “среднього місячного заробку”. То значит, там в канцелярии социального обеспечения додают разом весь ваш заробок, який вы мали от початку, як вас записали на социальне обеспечение, аж до 65-ого року вашого житья, потом тоту сумму ділят на число місяцев в том самом часі, и так находят, скилько вам выйде на каждый місяц. Если вы робили постоянно аж до 65 літ житья и получали все таку саму пейду, то ваш средний місячный заробок буде такий самый, який вы получали на роботі. Но єсли вы были много місяцев без роботы, або остатны рокы перед 65-ым роком вашого житья зарабляли мало, то ваш “средний місячный заробок” буде меньший, бо загальну сумму вашого заробку, записанну на вашом рекорді в канцелярии социального обеспечения, будут ділити и на тоты місяцы, в котрых вы не робили. Взяти такий примір: робочий выробил 10 літ на роботі, покрытой социальным обеспечением, и зараблял по 200 долларов місячно. Если бы тому робочому можна было выйти зараз на пенсию, то його “средний місячный заробок” был бы 200 долларов. Но йому было лем 55 літ, то на пенсию не мог податися. А до того ище он стратил роботу в фабрикі и купил собі фарму, на котрой дожил до 65 літ. Он выробил колись 40 кварталов покрытых социальным обеспечением, то он єсть обеспеченый по закону о социальном обеспечении на всю жизнь. Он має право податися на пенсию, но при обрахунку той пенсии його средний мічсячный заробок буде не 200 долларов, а тилько 100 долларов.

Закон о социальном обеспечении, принятый при Президенті Рузвельті в 1936 року, был зміненый и дополненый в 1950 и 1952 роках. Теперь найвысша місячна пенсия для отдільной особы в віку выше 65 літ може быти 85 долларов. Таку пенсию получит тот, у котрого средний місячный заробок в рекордах социального обеспечения выйде на 300 долларов. У кого средний місячный заробок єсть 200 долларов, буде получати пенсии по 70 долларов місячно. У кого єсть лем 35 долларов среднього місячного заробку, або меньше, буде получати по 25 долларов місячно.

Коли вы мате социальне обеспечение и дожиєте до 65 літ, то можете зараз податися на пенсию. Но тогды треба вам лишити роботу, або найти таку роботу, котра не подпадат под социальне обеспечение. Но по новому закону пенсионер послі 65 літ може получати свою пенсию и робити дальше там, где стягают социальне обеспечение, єсли не буде зарабляти больше, як 75 долларов місячно. А коли такому пенсионеру мине 75 літ, то закон уже не звертат увагы на його заробок — он буде доставати пенсию, хоц бы зараблял и по 300 долларов місячно.

Но о пенсию из соц. обеспечения треба самому подати заявление, бо канцелярия соц. обеспечения не пришле вам ниякого повідомления, што вам доходит 65 літ и можете достати пенсию. Вам треба зайти до найблизшого бюра соц. обеспечения и доказати свой вік. Найлучше мати метрику. У кого ніт метрикы ани ниякых другых документов на доказ віку, то може поставити свідков, котры го знают. Розумієся, треба принести и вашу картку с номером соц. обеспечения.

2. Жена пенсионера має так само право на пенсию из социального обеспечения мужа, хоц сама николи в житью не робила на роботі покрытой соц. обеспечением. Но и она достане тоту пенсию аж послі того, як єй мине 65 літ. Закон признає єй половину того, што получає муж. Так єсли муж получає найвысшу пенсию, дозволенну законом соц. обеспечения — 85 долларов місячно, то жена буде получати 42.50, а разом обоє — 127.50. А єсли бы у них была малолітна самотна дітина в віку ниже 18 літ, то и такой дітині закон признає пенсию на основі соц. обеспечения родича — так само половину того, што получає тец. Но разом одна фамелия не може получати больше як 168.80 місячно.

Но жена пенсионера, єсли она сама робила и выробила свое социальне обеспечение, то по 65 роках може получити пенсию на свой власный номер социального обеспечения, єсли выйде, што на свое социальне обеспечение она получит больше.

В такых выпадках, коли жена робила на социальне обеспечение, а муж не робил, то он може получити пенсию на основі соц. обеспечения жены, но мусит доказати, што не має средств до житья и залежит от поддержкы свойой жены. Тото ограничение не стосуєся до жены, котра получає пенсию на основі соц. обеспечения мужа, ани до малолітных дітей. Они можут мати свои маєткы и доходы, но таку пенсию из державной ассекурации мужа або отца можут получати.

3. Если полнообеспеченный муж помре, безрозлично коли, ци перед осягнением 65 літ житья, ци послі, як уже сам начал получати пенсию, то вдова по нем и малолітны діти маю право полупати місячну запомогу.

Вдова без малолітных дітей получит запомогу послі осягнения 65 літ житья и буде получати три четверти той пенсии, на яку мал право померший муж в момент смерти. Вдова с малолітными дітьми получит вдовью пенсию без огляду на свои вік и буде получати єй так делго, доки наймолодшой дітині не исполнится 18 літ. Если всі діти выросли, а вдова не має ище 65 літ, то місячна пенсия по умершому мужу буде єй прервана. Но послі 65-го року житья тота вдова має право получати наново тоту пенсию. Однако, єсли вдова выйде замуж, то тратит зараз право до пенсии по первом мужу.

Малолітны діти помершого отца, котрый был полнообеспеченным, получают місячну пенсию, а то по половині той пенсии, на яку мал бы право их отец в момент смерти. Кажда дітина получає таку пенсию аж до 18 року житья. Так єсли осталась вдова с малолітными дітьми, то всі они получают свою пенсию. Взяти такий примір: муж умер в молодом ище віку, но он мал уже полне обеспечение в той державной ассекурации, и його средний місячный заробок в рекордах соц. обеспечения показувал 200 долларов, так што он мал бы право получати пенсию по 70 долларов місячно. Осталась молода жена и двое малых дітей. Если бы не было малолітных дітей, то вдова не могла бы получити зараз пенсии, бо она не дошла до 65 літ. Но так як суть малолітны діти, то вдова получит зараз вдовью пенсию по мужу, а именно три четверти той, суммы, на яку мал право покойный муж — $52.50, а кажда дітина по половині його пенсии, то всего разом вышло бы $122.50, но в такых случаях новый закон ище дає добавкы осиротілым фамелиям, а именно одну четверту часть пенсии, так што тота фамелия получала бы из социального обеспечения 140 долларов місячно.

Но вдова с дітьми не може получати больше, як 168.80 долларов місячно. Як вдова, так и малолітны діти ниже 18 літ тратят Пенсию, єсли пойдут до роботы и заробляют понад 75 долларов місячно. Но лем тота дітина тратит пенсию, котра має таку роботу.

В случаю смерти обеспеченного выплачатся также його родині одноразова сумма на похороны, а то стилько, скилько дала бы 3-місячна пенсия того робочого, єсли бы он получал пенсию.

4. В такых случаях, коли обеспеченный не оставил ни ,жены ни дітей, оправненных до запомогыі то його стары родиче в віку выше 65 літ, котры были на його содержании, получат пенсию.

Як видиме, в том социальном обеспечении росходится о поважны суммы, но никто не єсть певный, ци його рекорд в головном офисі социального обеспечения єсть правильно записаный. Правда, вам стягают на роботі процент с вашой пейды на социальне обеспечение, но вы не знате, ци они то посылают акуратно с вашым выказом до головного офису на ваш номер. Може трафитися такий спекулянт, што вам стягат социальне обеспечение, але не посылат, а потом объявит банкротство, и глядай вітра в полю. Вы платили, але в головном офисі соц. обеспечения то не записано. Або може случитися так, што в канцелярии той компании, где вы робите, зробили помылку в вашом имени или в вашом номері социального обеспечения, и так посылают выказы до головного офису державной ассекурации. Там не мают часу провіряти всьо, и записуют так, як подано в выказах. Потом на стары рокы вы подалися о пенсию, и аж тогды показуєся, што на ваш номер записано далеко меньше, як повинно быти записано. А были и такы выпадкы, што робочий проробил долгы рокы на роботах, где йому стягали на социальне обеспечение, а потом по 65-ом року житья, як подался о пенсию, то йому написали, што на його номері ніт ниякого кредиту социального обеспечения, бо то, што он выробил, было записано на якесь инше имя. И потом тому робочому треба было потратити много часу, доки он поправил свой рекорд. То ище добре, коли человік робит постоянно в одной компании, бо тогды легко таку ошибку спростовати, але єсли то трафит на такого робочого, котрий часто мінят роботы, то такы помылкы потом дуже тяжко выправити.

Но вы можете сами в каждый час провірити, ци на вашом рекорді социального обеспечения всьо правильно записано. Каждый може зайти до найблизшого в його околиці офису “Сошиал Секюрити” и попросити, штобы йому дали бланк заробкового стейтменту (“вейдж стейтмент риквест”). То єсть звычайна почтова картка, котру легко выполнити и послати до головного офису социального обеспечения в Балтимор, Мериленд. Там они переглянут ваш рекорд и отвітят вам, яка сумма заробку записана на вашом номері и имени, и на основі того вы можете провірити, ци компания, где робите, посылат правильны выказы о вашом заробку, а также можете собі порахувати, скилько вам може придти пенсии.

В фонді социального обеспечения мают уже поверх 19 биллионов долларов, бо от 1937 року робочы по цілой Америкі платят на тоту ассекурацию. Правда, и выплаты суть великы, бо уж пару миллионов робочых в віку выше 65 літ вышло на пенсию, а так само вдовы и малолітны діти получают свои запомогы, як то было пояснено выше. Но все ище до того фонда приходит далеко больше, як треба выплачати из него, так што фонд постоянно росне. И суммы того фонда суть поміщены переважно в державных бондах, так што и процент ище приходит.

Штобы дати представление, яке выплаты идут теперь из того фонда, то можна привести рекорд выплат за один місяц — июль 1953 року. В том одном місяці было выписано 5,637,603 чекы на сумму 236,359,900 долларов.

Теперь от нового року 1954 тот фонд напевно буде ище больше рости, бо як сказано выше, на социальне обеспечение будут стягати высший процент, а то 2% от робочого и компания буде доплачати так само 2%, то разом выйде 4%. В 1950 року было 60 миллионов робочых, котрым стягали на социальне обеспечение, а их загальный заробок составил понад 87 биллионов долларов. Если бы пришла депрессия, и роботы стало меньше, то розумієся, што и доходы на социальне обеспечение уменьшатся. Выплаты из того фонда не увеличатся дуже и при депрессии, бо запомогы по безроботью не выплачатся из того фонда, лем из фонда ассекурации против безроботья. Но в случаю серьозного безроботья напевно много из тых робочых, котры остаются на роботі и не подаются на пенсию, хоц им минуло 65 літ, перешло бы зараз на пенсию из социального обеспечения.

В связи с тым можна спомнути, што робочий не мусит идти на пенсию, хоц йому минуло 65 літ и має полне право получати пенсию из социального обеспечения. Теперь єсть много такых выпадков, што такий робочий послі 65 літ робит дальше и платит дальше на социальне обеспечение, бо на роботі он заробит больше, як получил бы на пенсии. Но за тоты рокы, што он пропустит так без пенсии, то потом не достане того, што належалося за минувшы рокы йому, бо пенсию выплачают лем от того часу, як он был принятый в число пенсионеров.

В 1953 року, послі прихода до власти республиканцев, меже робочыми ширились слухы, што республиканцы можут отмінити и закассувати социальне обеспечение. Но того не може теперь зробити нияке правительство, бо як мы виділи из приведенных выше цифр, огромне большинство населения заинтересовано прямо в социальном обеспечении, и люде вложили уж огромны суммы на тоту ассекурацию. Скорше може придти до того, што тота або инша группа сенаторов и конгрессменов буде старатися увеличити пенсии из социального обеспечения, особенно єсли фонды будут рости так, як и дотеперь, а вартость доллара уменьшится ище больше.