Згодно с найновшыми данными статистичного уряду в Оттаві, население Канады в половині 1949 года дошло до 13,545,000 жителей.

За 12-місячный период чистый прирост населения Канады составил 662,000 особ. Найбольше того приросту дала нова провинция Ньюфаундленд с населением 348,000 человік, яка была присоєдинена до Канады. За тот 12-місячный период в Канаді народилось 342,000 дітей, а умерло 117.000 особ, так то оставило надвышку в 225,000 человік. Третье жерело приросту населения Канады, то иммиграция из другых краин. За 12 місяцев до Канады прибыло 125,000 новых иммигрантов, а выіхало из Канады лем 30,000.

Население отдільных провинций Канады представлялось так (в скобках подано число населения попередного року): Онтарио — 4,441,000 (4,297,000), Квебек — 3,887,000 (3,792,000), Бритиш Колумбия — 1,114,000 (1,082,000), Алберта — 871,000 (846,000), Саскачеван — 861,000 (854,000), Манитоба — 778,000 (757,000), Нова Скошия — 645,000 (635,000), Нью Броневик — 516,000 (503,000), Ньюфаундленд — 348,000, Принс Едвард Айленд — 90,000 (93,000), Сіверо-Западны территории — 16,000 (16,000), Юкон — 8,000 (8,000).

В 1941 року в Канаді жило 11,507,000 человік. В рокы великой войны населения прибывало дуже мало. По войні была открыта иммиграция, и прирост населения стал быстрійший. Но канадскы власти смотрят на нову иммиграцию с политичной точкы зріния и стараются достати в Канаду як найбольше повоєнных фашистскых отпадков, т. е. переміщенных особ, котры не хотят вернутися в свои родны краины, бо в минувшу войну держали с гитлеровцами.