Як Предсідатель Конгресса американскых славян, я хочу присоєдинитися к тым поздравлениям, якы передали вам тут Златко Балокович и штатный сенатор из Мичиген Стенли Новак, и хочу привитати вас всіх, делегатов и гостей 4-го Американского Славянского Конгресса.

На 4-ом Съізді Американского Славянского Конгресса в Чикаго, 24—26 сентября 1948: Банкет в Большом залі готеля “Стивенс” в субботу 25 сентября.

Ваша притомность тут служит найвымовнійшым свідоцтвом, што завіты Рузвельта ище дуже живы в сердцах американского народа. Ваша притомность тут являєся одночасно вызовом монополистам и генералам, котры захватили Вашингтон и подерли мирну программу ФДР (Рузвельта) и билль економичных прав, а вмісто того пустилися на небеспечну дорогу воєнных приготовлений, заперечения народных свобод и понижения житьового уровня.

Я дуже рад, што можу знова встрітитися и привитатися с вами, американскыми славянами со всіх концов нашой краины, с вами, котры сте отограли таку важну роль в воєнных усилиях, обслугуючи нашы вооруженны силы, выполняючи всі задания воєнной продукции и поддержуючи неустанну чуйность против “Пятой колонны” — гитлеровскых друзей и союзников в США.

Собираючись на 4-ый Американский Славянский Конгресс, без сумніву найважнійший из всіх съіздов в истории нашой славной организации, мы все ище дорожиме тыми идеалами, за котры велася минувша война. Мы собрались сегодня, штобы наново засвидітельствовати свою вірность традициям и идеалам того великого человіколюбца, великого американца и великого архитектора дружбы меже народами и світового мира Франклина Делано Рузвельта.

Незатертым остаєся в памяти всіх нас присутных тут послание Рузвельта к Американскому Славянскому Конгрессу пару літ тому назад:

“Вам, котры будували сте нашы Соєдиненны Штаты по фабриках и на фармах и внесли так богатый вклад в нашу национальну культуру, никто не мусит толковати значение Америкы и єй добродійства. До того, вас, котры посылате своих сынов на бойовы фронты и куєте оружие побіды, не треба напоминати, штобы вы не тратили отвагы и віры в побіду.”

Наша отвага остаєся высоком и віра кріпком и в теперішных трудных часах, коли нам грозит опасность войны и ненасытна жарлочность реакции. Но як попередно в часах нацизма мы всю увагу звертали на борьбу против фашизма, так и сегодня мы отдаєме всі свои силы на поддержку мира и оборону демократии.

Огромне большинство американцев славянского роду, як и огромне большинство американского народа в цілом, котрого мы являмеся частком, не хоче новой войны. Нова война, єсли бы она началась, была бы звернена головно против народов славянскых краин. И єсли бы подлы наміры воєнных подпалячов были осуществлены, то американцы славянского роду мусіли бы итти с оружием против свойой родины в славянскых краинах. Мы не хочеме, штобы таке несчастье звалилось на нас. И цілком не треба, штобы даколи дошло до того!

В світі ныні иде грандиозна борьба меже самолюбивыми, жарлочными реакционными силами привилегиованных классов и простым народом. Тота борьба дає напрям цілому світу и опреділят економичну и политичну жизнь нашой краины.

Но не забывайме, што хотя сегодня мы стоиме перед новыми проблемами и новыми пробами, то в том ніт ничого нового. Не забывайме, што на долю нашого поколіния припало подняти на нову высоту отвічну борьбу за прогресс и улучшение людского житья.

Мы добавляме нову главу в великой американской истории, котра от початку была историом кризисов и великых столкновений ріжнородных сил. Америка перешла через больше як полтора столітия кризисов и войн, и при всіх тых кризисах из народа выходили отважны лидеры, котры виділи далеко вперед, и они вели простый народ против закоснілости, гнета, рабства, фарисейства и тых, котры хотіли захватити в свои рукы контролю над материальными богатствами нашой краины.

Путь американского народа не был николи легкым. О том я переконался не тилько из активного участия в перешло 50-рочной борьбі американского народа за лучшу программу житья, но также из читанья американской истории.

Мы, котры почитаме и возносиме заслугы и традиции Томаса Джефферсона, забываме часто о том, што в часах Джефферсона реакция так само накидувалася дико на прогрессивный рух, послугуючися депортациями и законами против “бунтовщиков” и “чужинцев”, и обрехуючи грубо тых, котры несли знамя гражданскых свобод и поширения демократии. Но в нашой памяти живут не тоты маленькы людишкы, хоц як могучыми они были в своих часах, а Томас Джефферсон и тоты мужчины и женщины, котры стали разом с Джефферсоном и не склонили своих голов перед тираниом.

И ныні в судьбинный год президентскых выборов добре буде припомнути собі, што Джефферсон мусіл оставити стары партии, представлявшы привилегии, и кути нову партию, нове орудие для борьбы за стремления и желания простого народа. Джефферсон не побоялся взяти отвічательность, яку история возложила на него в тых часах. И то єсть одна из причин, чому имя Джефферсона останеся навсегда священным для людей, котры любят свободу.

Не треба забывати, што Джефферсон устоял против наремного критицизма людей всесильных в бизнесі, в ученых кругах и в церкви. Його называли агентом заграничных интересов точно так, як и сегодня тоты самы силы называют прогрессивных лидеров.

Духовник Тимофей Двайт, президент Иельского университета, выразился подчас президентской предвыборной кампании Джефферсона так: “Загальна руина приде нехибно на нас, єсли тот безбожник Джефферсон буде выбраный Президентом США. Я предостерегаю вас, што нашы библии будут кинены в огонь, и “Марсельезу” (пісня французской революции, ставша потом нац. гимном Франции — Приміч. Ред.) будут співати в нашых храмах, єсли Джефферсон стане Президентом”.

А газета “Колумбиен Сентинел” писала в передовой статі в таком злобном тоні против Джефферсона: “Єсли бы Джефферсон побідил на выборах, то горе всім вам, котры мате державны бонды, бо всьо вам пропаде.”

Сегодня язык нападок на прогрессивны силы в Америкі єсть трохи зміненый, но злобна пропаганда єсть тота сама.

В другом великом кризисі в американской истории, в войні против рабства, простый народ знова выдал из своих рядов великого лидера и побідил. Великий борец за народны права, “Ейб” Линкольн, так само мусіл покинути стары партии привилегиованных, захваченны рабовладільцами и захланными реакционерами, и совмістно с прогрессивными діятелями свого часу он будовал нову партию. Грубы торговы интересы, великы газеты и всі силы реакции выступили против него, обвиняючи Линкольна в страшном в тых часах социализмі засуджуючи його программу республиканизма як подрывный призыв к установлению “ровных прав для женщин”, призыв к “свободной любви”, к “розділу земли” и к “возвышению индивидуальных желаний над интересами фамелии”.

Но американский народ не дал віры той дивачной пропаганді своих врагов. Народ поддержал Линкольна.

Сегодня мы находимеся перед найтяжшом пробом и в глубочайшом кризисі в истории нашой краины. Сегодня угроза приходит от новой силы в американской жизни, от силы, котра выросла послі того, як Джефферсон и Линкольн покончили свои битвы, от новой формы тирании и рабства, от великых монополий и трестов, котры стремятся придусити и задавити вольность и свободу и привычный ход американской жизни. Мы, котры участвовали в робочом руху, мы вели отдавна борьбу против захланных трестов, якы выдушуют кровь и жизнь из роботного народа нашой краины. Полстолітия мы стоиме в борьбі с тыми силами зла и угнетения. И протягом того часу мы отнесли не одну велику побіду. Мы выбудовали мощный робочий рух. Мы совмістно со свободолюбивым большинством американского народа створили Рузвельтову еру и выдвинули такого лидера, як Рузвельт. В Рузвельтовой коалиции мы боролись против економичных роялистов, за робочы права, за социальне обеспечение, за устранение дискриминации, за ровны права для всіх американцев, за перевагу человіческых прав над маєтковыми правами.

Мы николи не забывали велику предосторогу, яку оставил нам Рузвельт:

“Демократична свобода не може быти певна, єсли народ терпит рост приватной силы до такой степени, што тота приватна сила бере верх над демократичном державом. То на ділі означат фашизм.”

И кто розуміє лучше тоту правду, як американцы славянского роду, котры составляют таку важну частину живой силы нашой американской индустрии, котры добывают наш уголь, куют нашу сталь и переносят експлоатацию и гнет немилосердных монополистов, стремящыхся заперечити их права як американцев национальных групп и робочых?

В момент смерти Рузвельта монополии не тратили ни минуты часу, а зараз перешли в офензиву, штобы повалити всі достижения Рузвельтового периода. Они затиснули контролю над економичным житьом нашой краины, взяли в плін Демократичну партию и почали наступ, штобы не тилько стерти всі минувшы придбанья робочых, но знищити юнионный робочий рух, знищити американску демократию.

Выстарчит прослідити тилько переміны в официальном составі Вашингтона от дня, коли Труман принял президентску власть и поддался трастам и воєнщині, штобы порозуміти, як монополии, котры отдавна контролювали Республиканску партию, теперь поширили свою контролю и на руководящы кругы Демократичной партии. Звернийте добру увагу на тоты факты. Они роскрывают интересну историю. Перегляд назначенцев Президента Трумана на найвысшы посты — на 125 найважнійшых цивильных посад в правительстві США, показує такы цифры: 49 банкиров, финансовых и индустриальных магнатов, 31 генерал, адмирал и другы воєнны особы, 17 адвокатов, связанных с великыми компаниями, 19 державных урядников, 6 журналистов, судей, економистов, 3 учены и инженеры.

Тоты факты помагают объяснити доктрину Трумана и план Маршалла, котрый має на ціли отбудовати сильну, реакционну, агрессивну Германию и ослабити новы славянскы демократии. Тоты факты помагают объяснити также мерзкы дійствия комиссии Конгресса по росслідованию антиамериканской діятельности; ганебны приказы б провіркі лояльности и спискы т. зв. подрывных организаций, означающы привернение Гитлеровской техникы пятнования всіх антифашистскых организаций як подрывных; т. зв. переслуханья о шпионах, котры не вызваны правдивыми интересами обеспечения нашой краины, а мают на ціли отвернути увагу народа от правдивых преступников и врагов американской демократии — реакционных монополистов; скандальны депортацийны слідства против людей, котры отдали лучшы рокы свого житья на будову Америкы, и ище больше скандальне гостеприимство, оказуєме всякым фашистскым недобиткам Европы, котрых импортуют массами в США, штобы перемінити нашу краину в центр международных реакционных интриг против славянскых народов и миролюбивых народов світа.

Наша будучность и саме существование зависит от поражения той фашистской конспирации, и тому мы розумієме найлучше, што американскы реакционеры, отвічательны за тото извращение американскых идеалов, перехватили собі страницу из Гитлеровой книжки “Майн Кампф”. То Гитлер писал: “Коли внутренны проблемы краины принимают занадто острый характер, тогди треба говорити гражданам о зовнішном неприятелю”. Гитлер выполнял именно то, а теперь американскы монополисты и богаты тресты послугуются тым самым методом, пускаючи в ход застрашаючы заголовкы в газетах, переслуханья перед комиссиями Конгресса и обрыдливу программу террора и страшенья, якы обертают против американского народа и организаций, служащых вірно потребностям и интересам американского народа.

По той причині Американский Славянский Конгресс был выставленый на такы бішены атакы и был включеный в гестаповский список т. зв. “подрывных организаций”, приготовленный генеральным прокурором Кларком. Но сегодня то єсть почетный отзнак, бо каждого, кто стоит за мир и Рузвельтову программу, реакционеры и рабовладільцы нашых дней и фашистски настроєнны монополисты прозывают “подрывным” и “нелояльным”.

Мы не одинокы в нашой вірности завітам Рузвельта, в нашой борьбі за мир и в нашой неуклонной привязанности к идеалам нашой краины и нашой Хартии Прав. Як во всіх великых кризисах в истории нашой краины, так и ныні родился новый народный рух, встали новы лидеры, вірны народу, и возникла нова партия.

Я с гордостьом можу сказати, што американцы славянского роду грали видну роль на замічательной закладной конвенции Прогрессивной партии в Филадельфии. Я горжусь тым, што мні дана была можность поддержати номинацию Генри А. Воллеса на Президента США. В свойой бесіді на конвенции Прогрессивной партии в Филадельфии я сказал, меже иншым, так:

“Поддержуючи тут номинацию Генри Воллеса, я знаю, што я говорю за миллионы славянскых американцев и американцев иншого национального происхождения. Генри Воллес єсть нашым чемпионом в борьбі против дискриминации и за признание всіх ріжнородных групп американцев, бо всі внесли свою долю в прогресс и добробыт Америкы. Он єсть нашым чемпионом в борьбі за мир меже народами, за содійствие и братску помощь народам, пострадавшым от войны”.

Два тыждни перед конвенциом Прогрессивной партии был предпринятый обходный маневр для нанесения удара новой партии: 12 лидеров Коммунистичной партии были преданы суду. Тота справа дотычит всіх американцев, котрым дорога демократия. Генри Воллес выразил то дуже ясно, коли зараз послі предания суду коммунистичных лидеров заявил:

“Тоты преслідования судом, я чувствую, мают на ціли поширение новых страхов. То єсть нова проба отвернения увагы американского народа, котрый все острійше протестує против ростущой инфляции, против дурацкого запутуванья Берлинского вопроса и другых вопросов... Головне в том єсть то, штобы демократичны американцы роспознали тоту политику и обороняли с цілом енергиом права другых граждан говорити свободно, хотя бы цілком не были согласны с точком зріния тых, котрых боротнят... Оборона гражданскых прав коммунистов в нашой краині стала ныні первом линиом в обороні свобод демократичного народа”.

Мы уж знаме фашистскы методы. Коли они начнут преслідовати группу А, то потом возмутся до группы В, Б и так дальше. Коли одно политичне меньшинство объявляєся нелегальным лем за свои политичны взгляды, то никто в той краині не єсть беспечным. Демократия, подобно як и мир, єсть неділима. Коли дашто подобне може случитися раз, то для них ніт уж границы, котру бы они не переступили. Возмийме, напримір, нашу власну организацию, Американский Славянский Конгресс, котрый заинтересованый тилько в обороні мира и демократии, котрый стоит за добры стары американскы традиции, но ци реакция не называт нас коммунистами? Або ци Прогрессивну партию не называют так само коммунистичном? То стара фашистска техника. И єсли мы позволиме силам реакции закрыти Коммунистичну партию, то основы нашой демократии будут подорваны, и нияка организация не буде беспечна. Єсли мы не выступиме сміло против того преслідования политичных меньшинств, то мы будеме помагати нагрівати тото крючковате желізо, котрым реакция хотіла бы означити всякий демократичный рух як неамериканский и подрывный.

В тых тыжднях, якы слідовали послі конвенции Прогрессивной партии, обозначился ясно характер сегорочной предвыборной кампании. Монополистична пресса и радио разом с обома старыми партиями открыли бішеный огонь клевет, прозывок и очернений против Воллеса, кандидата Прогрессивной партии, и людей, поддержующых Воллеса. То напоминат атакы, якы сыпались в свойом часі на Джефферсона и Линкольна. Но реакция не ограничатся словами. Все частійше врагы народа прибігают к нарушениям закона, к террору, грубой силі и насильству в явном стремлении розбити нову партию, не дати народу можности голосовати на своих кандидатов. В том самом штаті Иллинойс, где мы собрались на наш Конгресс, суды незаконно заборонили поставити Прогрессивну партию на выборчий баллот.

В южных штатах Генри Воллес сміло и неуклонно настоювал на принципі правдивого американизма, штобы на його митингах негры не были отгороджены от білых, и за то встрітился с фашистскым террором, за то кидали в него яйцами. Але то помогло роскрыти природу реакционного врага, против котрого мы ведеме борьбу.

Но народ не дал застрашити себе организованном кампаниом террора, и тому Прогрессивну партию не можна зломити страхами, не можна убити рух за мир и не можна знищити рух, котрый выплыват из глубин народных масс, штобы освободити нашу краину из жестокых лап безжалостных монополий.

То посвідчили беспримірны массы народа на собраниях Воллеса. Вы знате, што в звычайных галях не можна помістити тых людей, котры приходят на предвыборны віча Воллеса, и мы мушены собиратися в найбольшых спортивных парках и стадионах. Мы платиме, штобы достатися до тых парков, но и даєме на тых собраниях каждый до крайной возможности. Народ тягнеся на митингы Воллеса, хоц мы не маме великой пропаганды в газетах и по радио. Народ приходит, не взираючи на всі ощерства. Коли люде почуют, што Воллес приходит до их міста, то вість передаєся из уст до уст, и массы горнутся на митинг. Народ тот приходит с надійом, віром, горячым желанием мира, с преданностьом демократии. И мы видиме в народі тот самый дух, котрый дал побіду нам в Войні за Независимость, в войні против рабства, в борьбі против трестов, в робочой борьбі, котра выдвинула Юджина В. Дебса, в борьбі за Си-Ай-О, а также еру Рузвельта и побіду над фашизмом.

Голос за Воллеса єсть голос за мир, голос за дружбу меже народами, голос за дружбу меже Соєдиненными Штатами и славянскыми краинами. Голос за Воллеса єсть єдинственный голос, котрый не буде страченый. Во всяком случаю для каждого из нас лучше голосувати за дашто таке, што хочеме, хоц и не достанеме то, чым голосувати за дашто таке, чого не хочеме, а потом всетаки достанеме.

Голос за Воллеса буде мати значение не лем при рахуванью голосов 2-го ноября. Голосы за Воллеса на предстоящых выборах будут служити фундаментом живой и тревалой народной партии и народного руху, який восторжествує над монополиями и реакциом и завершит побідоносно борьбу Джефферсона, Линкольна и Рузвельта.

Треба мати на памяти и то, што в истории нашой краины чужеземцы, иммигранты и их в Америкі рожденны потомкы давали всегда в свойом огромном большинстві поддержку прогрессивным силам и составляли необходиму частину Джефферсонового движения, Линкольнового фронта и великой коалиции, котра 4 разы выбрала Рузвельта. Американцы славянского роду мают достойне наслідство и достойне місце в творении американскых демократичных традиций и в избирательных борьбах нашой краины.

Стары партии пробуют знова, як и в минувшині, грати низку политику с американскыми гражданами славянского роду. Они знают, што славянскы американцы числят перешло 10 миллионов населения, сосредоточенны в великых индустриальных центрах и представляют силу, с котром треба рахуватися на выборах. Так обі стары партии стараются позыскати собі голосы американцев славянского роду, принимаючи цинично и бесстыдно позу друзей славянскых американцев в тот самый час, коли объєдиненными силами поддержуют дво-партийну холодну войну против славянскых демократичных держав Восточной Европы; коли пробуют организовати Западну Европу против славянскых народов и ширят тут колоссальну брехню, што будто бы миролюбивы славянскы народы представляют угрозу миру и безопасности нашой любимой краины США.

Най нас не баламутят красны слова теперь перед выборами, бо каждый може видіти тоту палку, котром нашы двопартийцы вымахуют против славянскых демократий. Не можеме поминути и того факта, што як сторонникы Трумана, так и сторонникы Дюи поддержуют біженцев из славянскых стран, тых біженцев, котры отвернулись от своих народов, сіют ненависть к своим родным краинам, роздувают пламя холодной войны и ведут воєнну пропаганду в славянскых колониях тут в США.

Позиция Американского Славянского Конгресса выложена ясно в Воззвании на нашу конвенцию :

“Американский Славянский Конгресс засуджує подрывну діятельность т. зв. изгнанцев из восточноєвропейскых стран — д-ра Георга Димитрова из Болгарии, Станислава Миколайчика из Польшы, Владка Мачека из Югославии и Юрая Славика и Яна Папанека из Чехословакии. Тоты обанкроченны политикеры, от котрых их власный народ отказался, призывают открыто к войні против своих родных краин”.

Но кандидаты Труман и Дюи публично выразили свою прихильность к тым агентам роздора, котры працуют так завзято, хоц и напрасно, штобы запрячи славянско-американскы общины до колесницы антиславянской войны.

Кандидат Труман назвал тых политичных банкротов “героями демократии”. То вяжеся духовно с амнистиями для нацистскых лидеров в американской и английской зонах Германии. Воєнны преступления тых нацистов забываются, бо неисправимы нацисты, фашисты и реакционеры являются ныні найлучшыми друзьями и союзниками двопартийной воєнной политикы.

Албанский сфинкс, Томас Дюи, котрый хранил молчание дотычно всіх головных справ теперішной политикы, наконец проговорил и высказал свои взгляды в предвыборной бесіді в Де Мойн, в Айова. И што он сказал? Сказал, што треба призвати Станислава Миколайчика и другы фигуры той обанкроченной кликы и порадитися их, што они скажут. Так я сділал то, што дорадил Дюи в свойой бесіді. Я вызывал по телефону Миколайчика пару раз, но все його телефон был занятый. Наконец я достался до него. Но я не почул с другого конца ничого, лем воєнну пропаганду. Война и война, ничого иншого не почуєте от тых людей.

Но як раз того американцы славянского роду не хотят. Наша судьба, нашы надіи, нашы стремления суть сплетены с борьбом за мир. И то єсть головна причина, чому американцы славянского роду цілом силом поддержуют Генри Воллеса, котрый не хоче грати политику со славянами, и не хоче присоєдинитися к двопартийной антиславянской политикі. Генри Воллес сказал нам:

“Тема вашого митинга єсть дорога мойому сердцу. Я не знаю много такых річей, котры мали бы большу вартость для благоденствия світа, як дружба меже славянами и американцами”.

Я вірю, што єсли бы Воллес и Тейлор были кандидатами на пост Президента и Вицепрезидента цілого войном переутомленного світа, то они побідили бы огромным большинством свободолюбивых народов всіх земель. Очы тых народов звернены ныні на Америку, и они надіются, што кандидаты мира побідят у нас на выборах 2-го ноября.

Не продавайте дешево американский народ. Он часами дійствує дивными способами, и часто, коли шансы суть найслабшы, и коли рука реакции, здаєся, готова сдавити найлучшы порывы в американской жизни, то американский народ двигатся, прорыватся через чорны хмары кромішной тьмы и бореся за праве діло.

В мойой 50-рочной службі ділу робочого народа Америкы я переконался, што американский народ встає и отзыватся, коли он порозуміє ясно, о што росходится, и коли його призывают к дійствию.

Наша конвенция выдає такий призыв к дійствию. Тота конвенция поднимат голос надіи, увіренности, утверждения американского демократичного наслідства, вызова реакции, войні и фашизму. Наш призыв єсть к борьбі за мир, добробыт и безопасность.

В свойом замічательном докладі Лео Кжицкий не тилько выложил ясно делегатам программу дійствия Американского Славянского Конгресса в данный момент, но обрисовал также в историчной перспективі загальне политичне положение в Америкі нашых дней. Його бесіда ободрила и заохотила всіх делегатов Конгресса.

4-ый съізд Американского Славянского Конгресса в Чикаго открылся в напряженной атмосфері. День перед открытием съізда иммиграцийны власти арестовали головного секретаря Американского Славянского Конгресса Георгия Пиринского по обвинению в принадлежности к “организации, захваляющой поваление правительства США силом и насильством”. Як выяснилось позже, под тыми словами обвинения треба было розуміти, што Г. Пиринский колись, по приізді в Америку, належал до компартии. Но Г. Пиринский живе в США около 25 літ. Так єсли были против него даякы доказы и законна подстава для ареста и депортации, то иммиграцийны власти мали достаточно часу на то. Они могли зробити то місяц, рок або пять роков тому назад. Но як видно, и в иммиграцийных урядах сидят люде, котры грают свою политику с американскыми законами. Иммиграцийны власти чекали с приказом об аресті Пиринского аж до послідной годины перед открытием засіданий Американского Славянского Конгресса.

Политика и обрахунок были ясны. Они думали настрашити тым делегатов, якы со всіх концов США собирались на съізд до Чикаго, и так розбити або хотя ослабити 4-ый съізд Американского Славянского Конгресса. Г. Пиринский был головном пружином на попередных съіздах той славянской организации, так без Пиринского и тот съізд в Чикаго стратил бы много на силі. Вість об аресті Г. Пиринского была рострублена зараз в четверг пополудни в газетах и по радио на цілу Америку. Потом вечером всі радиостанции повторяли постоянно при каждой передачі новостей, што головный секретарь Американского Славянского Конгресса был арестованый, и чому был арестованый. Большинство делегатов на съізд были ище дома о тых годинах, они лем собирались в дорогу. Так треба было им повторяти по радио постоянно, што случилось в Чикаго с Г. Пиринскым, то може откажутся в послідну хвилю от делегатства и останутся дома.

А в самом Чикаго страшили тых, котры уж прибыли на съізд. Чикагскы газеты писали, што в Готелю Стивенс, где должны были держатися засідания Американского Славянского Конгресса, “аж роится” от агентов Еф-Би-Ай и иммиграцийных агентов, котры глядают там другых “небеспечных чужинцев” и плануют новы аресты.

Но вся тота пропаганда была даремна, а даже можна сказати, што она дала противоположный результат, як сподівались тоты, котры выплановали цілый тот политичный маневр против Американского Славянского Конгресса. Найперше то, што американскы славяне не дали застрашити себе такыми маневрами агентов реакции, и всі, кто был выбраный делегатом, приіхали на съізд. Друге то, што славяне почувствовали себе лично задітыми такыми низкыми маневрами реакционеров, задітыми в свойой особистой и национальной чести, и набрали ище больше рішимости боротися за свои гражданскы права и за честь своих народов. Так вмісто ослабити або убити 4-ый съізд Американского Славянского Конгресса, арест Г. Пиринского сділал його больше успішным и интересным. Сам Г. Пиринский был освобожденый под залог в 1000 долларов и присутствовал на всіх засіданиях Конгресса.

На съізд прибыло 1,400 делегатов. Засідания продолжались три дни — в пятницу, субботу и неділю (24, 25 и 26 сентября 1948). Вся робота съізда проходила под знаком борьбы за мир и обеспечения демократичных прав народа.

Съізд закончился массовым митингом в неділю пополудни, на котром делегаты мали можность привитати и почути самого Генри Воллеса, лидера Прогрессивной партии и кандидата в Президенты США. Генри Воллес выголосил одну из своих серьознійшых бесід о заграничной политикі. Он осудил двопартийну политику обох старых партий, котры наосліп ведут Америку до войны и катастрофы, и предложил свою программу американской заграничной политикы, на котрой можна легко закончити с честью нынішню холодну войну и восстановити дружественны отношения меже Соєдиненными Штатами и Совітскым Союзом.

Генри Воллес появился и на послідном діловом засідании 4-го съізда Американского Славянского Конгресса в готелю “Стивенс” в неділю перед полуднем. Делегаты устроили йому оба разы мощну, ентузиастичну овацию. Каждый из делегатов и присутных гостей виділ в том человікі бескорыстного лидера, розумного державного діятеля и вдохновенного пророка, котрый смотрит вперед и видит ясно страшну небеспеку для Америкы и для цілого світа, єсли американский народ не найде в собі достаточно силы застановити на часі своих реакционеров в их шаленом и сліпом маршу к новой войні.

На том историчном славянском съізді в Чикаго предсідатель Американского Славянского Конгресса Лео Кжицкий объяснил словами Америку нашых дней. А арест головного секретаря Г. Пиринского иммиграцийными властями подтвердил на практикі правдивость того, што сказал предсідатель Кжицкий. Так один дополнил другого. И як перерахувались американскы реакционеры в своих планах с арестом Г. Пиринского, так они можут перерахуватися и в своих планах холодной войны против славянскых народов в Европі. Думают застрашити их свойом атомном бомбом и другыми орудиями смерти, и на тых страхах будуют заграничну политику не лем нашой краины, но и всей Западной Европы. Но они не розуміют славян. Приходят такы моменты в жизни, коли славянин не боится ничого на світі, бо не боится смерти. В минувшу войну югославяне на дикий фашистский террор сказали: “Радзье гроб него роб” (Лучше гроб, як рабство), и кто мал силу, пошол в партизаны. А кто може забыти, або недоцінювати, бессмертны подвигы совітскых народов!

Так шкода и даремно страшити тых людей, бо коли их больше страшишь, они наберают больше отвагы.

Правда, президентскы выборы в США не вышли так, як діятели Американского Славянского Конгресса и всі прогрессивны лидеры в Америкі сподівались. Генри Воллес со свойом прогрессивном программом опередил Америку на пару десятилітий. Американска публика не была ище готова к тым смілым перемінам в домашной и заграничной политикі, якы предложил Генри Воллес. Американскы робочы и фармеры не маются ныні зле: и одны и другы зарабляют добре. Так большинство из них не заглядало далеко в будучность, лем голосовало, штобы сохранити теперішный стан. Но розумнійшы люде видят, што теперішного стану утримати надолго не можна, бо ныні мы жиєме на пожичанном часі, и за тоты пожичкы треба буде скоро росплачатися. А коли то настане, то всі порозуміют, што в 1948 року лем Генри Воллес мал правильну программу. И то буде день торжества Прогрессивной партии.