Члены К.Р.О. в Монтреал, Кве., на пикнику.

На минувшом съізді Л. С. в Юнкерс, Н. Й. один из делегатов поставил вопрос: Длячого в Монтреалі истнуют два отділы Карпаторусского Общества? Моментально другий делегат, можливо из Нью Йорку, пояснил, што в г. Нью Йорку тыж дійствуют два отділы Лемко-Союза, а то длятого, што в таком великом місті наш народ жиє в ріжных дистриктах, часто далеко один от другого.

Правда, што Монтреал не єсть такий великий, як Нью Йорк, но все-ж он найбольший город в Канаді. Ту єсть літний порт Канады для европейскых пароходов. Ту єсть важный центр тяжкой индустрии Канады. Не дивно, што ту живе много нашых емигрантов.

Каждого року много нашых краянов-американцев приізжає ту на визит. Члены Л. С. и другы прогрессивны карпаторуссы из США, коли приідут в Монтреал, то приходят до нашой организации, штобы довідатися о родині и знакомых краянах. В нашой организации найдете емигрантов со всіх частей Карпатской Руси: лемков-галичан, пряшевщан и выходцев из Закарпатской области УССР.

В Монтреал истнуют два отділы Карпаторусского Общества, котры видиме на фотографиях в нашом Календарі сего року. Фотографии был сняты на вспольном пикнику в літі 1946 г., но много членов ніт на фотографиях, бо по ріжным причинам они не могли явитися на пикник. (Одна фотография поміщена на стр. 137 сего Календаря).

Так як при обыдвох отділах єсть уж поважне число молодежы, нашых дітей, на котрых мы смотриме як на нашу будучность, то при обох отділах мы старамеся держати діточы школы русской грамоты. В школах учится около 60 дітей.

В часі великой войны свободолюбивых народов с фашистскыми поневолителями члены обох нашых отділов щиро жертвовали и своими грошами и трудом на помоч союзникам, штобы тилько войну выграти. Найбольшу жертву мы давали свому найблизшому брату — Совітскому Союзу и його геройской Красной Армии, бо каждый розуміл, што лем тота армия може направду знищити фашизм и освободити наш народ.

Члены нашых отділов интересуются также политичным житьом, канадского народа взагалі, берут участие в выборах як містецкых, так провинциальных и федеральных.

Школу и науку, яку дала нам наша организация, мы николи не забудеме. Думам, што тота наука придастся и тым, котры уж выбераются іхати до старого краю к своим родинам. Им буде легче порозуміти новый порядок житья, який будуют там послі свого освобождения братскы славянскы народы Европы.

От имени нашых двох отділов в Монтреал шлю сердечный привіт нашым братьям переселенцам в Совітском Союзі.