Вдершися в город Львов 30 юня 1941 року, німецкы наіздникы объявили Львовску область “дистриктом Галиции” и ввели в ней так званый “новый порядок” безудержного грабежа, насилий, тортур, массовых росстрілов и убийств мирного населения.

Убийства совітскых граждан совершалися не случайными бандитскыми группами німецкых офицеров и солдат, а преднаміренно німецкыми воинскыми соєдинениями, полициом и СС, организованно, по предтым розробленным планам германского правительства. Для массового вынищения совітскых людей был створеный специальный аппарат и организована ціла сіть лагерей для нищения людей.

Головным вдохновителем и организатором системы вынищения людей был рейхс-министр Германии Гиммлер, який не раз приізжал в Львов для инспектования и провіркы роботы заложеных по його волі “предприятий смерти”.

Для росслідования злодіяний німецко-фашистскых наіздников Надзвычайна Державна Комиссия назначила специальну комиссию в составі депутатов Верховного Совіта Союза ССР генерал-майора И. С. Грушецкого, Н. В. Козырева и В. Г. Садового, доктора И. М. Трегуба, Е. С. Грушко, предсідателя исполкома Львовского Городского Совіта П. В. Бойко, П. С. Турченко, А. А. Вишневского, представителя Надзвычайной Державной Комиссии С. Т. Кузьмина, при участи головного судебно-медицинского експерта Красной Армии В. И. Пухнаревича, судебно-медицинского експерта Д. А. Галаева, експерта-криминилиста Н. И. Герасимова, прокурора Львовской области И. П. Корнетова и начальника слідственного отділа Львовской областной прокуратуры П. 3. Крыжановского.

На основі материалов росслідования, проведенного специальном комиссиом, заключения судебно-медицинской експертизы, а также многочисленных свідительскых показаний совітскых граждан и граждан другых держав Надзвычайна Державна Комиссия установила, што в Львові, Рава-Русской, Золочеві, Сокалі, Яворові, Жолкві, Городкі, Бродах, в Подкаменском, Ново-Ярычевском, Ивано-Франковском и другых районах Львовской области німецкы наіздникы вынищили около 700 тысяч совітскых людей — мужчин, женщин и дітей, а также граждан Чехословакии, Югославии, Голландии, Великобритании, Соєдиненных Штатов Америкы, привезенных в Львов из концентрацийных лагерей Германии.

Отряды гестаповцев ище до захопления Львова мали составлены по указанию германского правительства спискы передовых представителей интеллигенции, презначеных на смерть. Дораз послі захопления города Львова почалися массовы аресты и росстрілы. Гестаповцы арестовали: члена Союза совітскых писателей, автора многочисленных литературных творов, профессора Тадеуша Бой-Желенского, профессора мединститута Романа Ренцкого, ректора университета профессора судебной медицины Владимира Серадского, доктора юридичных наук Романа Лонгшию-де-Берье разом с трьома його сынами, профессора Тадеуша Островского, профессора Яна Грека, профессора-хирурга Генрика Гиляровича, профессора-стоматолога Антона Тешинского, профессора Францишка Гроера, профессора патологичной анатомии Витольда Новицкого, докторов физико-математичных наук Владимира Стожека и Антона Ломницкого, академика Соловій, почетного члена многых академий наук Казимира Бартеля, доктора химичных наук Станислава Пилата, доктора техничных наук Романа Виткевича, доктора техничных наук Владимира Круковского, профессора Станислава Прогульского, профессора Мехчевского, етнографа Адама Фишера, доктора техничных наук Казимира Ветуляни, знаного юриста, члена Кодификацийной Комиссии Польшы, профессора Мауриция Арерганда, львовску писательку Галину Гурску, критика Остапа Ортвина, доцентов Ауербаха, Пясецкого, физика Вандера, инженера Шимона, Блюменталя, хирурга Руффа, доцента Чортковера и другых профессоров и преподавателей институтов наукы.

Профессор Львовского медцинского института Ф. В. Гроер, котрому случайно удалося уникнути смерти, заявил комиссии:

“Коли 3-го юля 1941 року, о 12 годині вночи, мене арестовали и посадили в трока, в ньом уж находилися профессоры: Грек, Бой-Желенский и другы. Нас повезли в дом “Бурса Абрамовичов”. Ведучи нас по коридору, гестаповцы здівалися над нами, подтолковали кольбами, дергали за волосы и били по голові. . . Позднійше я виділ, як из дома “Бурсы Абрамовичов” німцы вывели под конвойом 5 профессоров, штырьох из них несли окровавленный труп убитого німцами при допыті сына знаного хирурга Руфф. Молодый Руфф был также специалистом. Вся тота группа профессоров под конвойом пошла ку Кадетской горі. Через 15-20 минут я услышал сальву с карабинов оттамаль, куды повели профессоров.”

Штобы унизити людске достоинство, німцы низко здівалися над арестоваными учеными, а потом росстрілювали их.

Житель города Львова Гольцман свідчил пред специальном комиссиом, што он сам виділ, як во двор дома № 8 на улиці Артишевского в юлі 1941 року есесовцы привели 20 людей, среди них 4 профессоры, адвокаты, докторы. Одного из них свідок знал, а то доктора прав Крепса. Меж приведенными было 5—6 женщин. Есесовцы змусили их языком и губами мыти сходы в 7-х подъіздах 4-поверхового дома. Послі того, як всі сходы были помыты, тых самых людей примусили собирати на дворі губами смітя. . . Всьо собране смітя треба было перенести в одно місце двора. . . Всьо то разом зо мном виділ также дворник дома № 8 по улиці Артишевского, — Гира Леопольд. По скончению роботы гестаповцы выбрали с той группы 5 людей, вывели их за город и росстріляли.”

Фашистскы наіздникы даремно скрывали факты вынищувания интеллигенции. На многоразовы просьбы родных и близкых сказати, яка доля постигла ученых, німцы отгребалися “незнанием”.

По приказу рейхсминистра Германии Гиммлера, осенью 1943 року гестаповцы спалили трупы росстріляных профессоров. Тоты, што роскопували трупы, бывшы заключены Яновского лагеря Мандель и Корн заявили комиссии слідуюче:

“5 октября 1943 року ночом меж улицами Кадетском и Вулецком, по приказу одного из гестаповцов, при світлі прожекторов нами была открыта яма, с котрой мы извлекли 36 трупов. Всі тоты трупы были спалены. В часі извлечения трупов из ямы мы нашли документы на имя профессора Островского, доктора физико-математичных наук Стожека и профессора политехничного института Казимира Бартеля.”

Росслідованием установлено, што уж в первы місяцы оккупации німцы арестовали и убили во Львові 70 вызначнійшых діятелей наукы, техникы и искусства.

Німецкий губернатор “дистрикта Галиции”, в котрый входила Львовска область, — доктор Вехтер и генерал-майор СС Кацман в ноябрі 1941 року, во Львові, на Яновской улиці створили так званый “лагерь мусовых робот". Он был огороженый муром с цеглы и обведеный кольчастым дротом. Ту німцы зганяли мирных граждан и воєннопліных. Заключенных в лагері морили голодом, примушали выполняти непосильны роботы, звірскы избивали палками, заражали тифом и дизентериом. Порция денной поживы складалася из 2 шклянок “чорной кавы” из древесных опилок (різовин), 100 граммов хліба с домішком тых самых опилок, тарелкы зупы с картофельных лупин. Заключены тысячами умерали от голода, тифа, дизентерии, и росстрілювалися.

Гауптштурмфюрер СС Гебауер установил в Яновском лагері систему звірского вынищения людей, котру потом, послі його перевода на нову роботу, “удосконаляли” коменданты лагеря оберштурмфюрер СС Густав Вильгауз и гауптштурмфюрер СС Франц Варцок.

“Я лично виділ, — заявил комиссии бывший заключенный лагеря Аш, — як гауптштурмфюрер СС Фриц Гебауер дусил женщин и дітей, а мужчин в зимі заморожувал в бочках с водом. Бочкы наполнялися водом, жертвам связувалися рукы и ногы и опускали в воду. Несчастны находилися в бочкі до цілковитого замерзания.”

По свідоцтву многочисленных свідков совітскых воєнноплінных, а также французскых граждан, якы находилися в німецкых лагерях, установлено, што німецкы бандиты “вынаходили” самы нелюдскы методы вынищения людей, причом всьо то уважалося у них ділом особливой чести и заохочувалося головном воєнном командом и правительством.

Гауптштурмфюрер СС Франц Варцок, напримір, любил подвішувати заключеных за ногы ку столбам и так оставляти их до наступления смерти; оберштурмфюрер Рокита особисто роспорювал заключеным животы; начальник слідчой части Яновского лагеря Гайне проверчувал тіла заключеных палком або куском желіза, кліщиками вырывал у женщин ногти, потом роздівал свои жертвы, подвішувал их за волосы, росколысувал и стрілял до “рухомой ціли”.

Комендант Яновского лагеря, оберштурмфюрер Вильгауз, для спорта и довольствия жены и дочкы, систематично стрілял из автомата с балкона канцелярии лагеря в заключеных, працувавшых в мастерскых, потом передавал автомат свойой жені, и она также стріляла. Часами, штобы забавити свою 9-рочну дочку, Вильгауз казал подкидати в воздух 2—4-рочных дітей и стрілял в них. Його дочка плескала в рукы и кричала: “Папа, ище, папа, ище!” и он стрілял.

Заключеных в лагерях вынищували без всякого поводу, часто на спор. Свідок женщина, Р. С. Киршнер свідчила пред слідчом комиссиом, што комиссар гестапо Вепке поспорил с другыми катами лагеря о том, што он одним ударом сокиры розрубат мальчика. Тоты му не повірили. Тогды он поймал на улиці 10-рочного мальчика, поставил го на коліна, примусил зложити рукы долонями разом и пригнути ку ним голову, примірил, поправил голову хлопца и ударом сокиры розрубал го вздолж туловища. Гитлеровцы горячо поздравляли Вепке, кріпко стискали му рукы и хвалили.

При лагері для заключеных была организувана больница. Німецкы каты Брамбаер и Бирман каждого 1-го и 15-го дня в місяці проводили провірку больных и, єсли ствердили, што меж ними єст такы хоры, што находятся в больниці больше як дві неділи, то на місці их росстрілювали. При каждой такой провіркі росстрілювали от 6 до 10 людей.

Тортуры, мукы и росстрілы німцы проводили под музыку. Для той ціли они организували специальный оркестр из заключеных. Оркестром примусили руководити профессора Штрикс и знаного дирижера Мунд. Композиторам німцы казали створити специальну мелодию, котру назвали “Танго смерти”. Незадолго до ликвидации лагеря німцы росстріляли всіх оркестрантов.

В Яновском лагері фашисты росстріляли больше як 200 тысяч мирных совітскых людей. Бывший заключеный того лагеря Мантель посвідчил: “За два місяцы мого пребывания в лагері німцы убили до 60 тысяч заключеных и в том числі 8 тысяч дітей.”

Основным місцом массовых росстрілов в Яновском лагері был берег, названый заключеными “Долином смерти”, котрый находился в отдалению пол километра от лагеря.

На территории Яновского лагеря комиссия нашла 3 ямы с трупами росстріляных в другой половині юля 1944 року совітскых граждан. Як посвідчили свідкы и родны убитых, німцы росстріляли ту совітскых людей, привезеных из разных тюрем гестапо. Нарушивши звычайный порядок, гитлеровцы на тот раз не обшукали одежи убитых. В кишенях одежи замученых комиссия нашла документы. По тым документам стверджено, што в числі замученых и убитых были: Рыбий Василий, рожд. в 1910 року, Панасюк Василий, Окун Михаил, Сорока Игор, рожд. 1921 р. во Львові, Рыбаковский Рудольф, рожд. в 1913 во Львові, Говалевич Леон, Лакрайх, рожд. 1913 в Седлисках, Львовской области, Цыганик Валфоломей, рожд. 1914 р. в Комарно, ул. Садова, № 66, Вансович Михаил, рожд. в 1904, Білый Чеслав, рожд. 1914 р. и проживаючий во Львові, Синерухин Александр, рожд. 1916 року, Табино Василий, рожд. 1919 р.

Судебно-медицинска експертна комиссия, обслідувавши “Долину смерти” в Яновском лагері и изучивши показания свідков, ствердила:

“1. В Яновском лагері чинилися массовы убийства мирного цивильного населения.

2. Убийства чинилися в основном дорогом росстріла типичным німецкым прийомом — выстрілом в тыл головы. Часть росстріляных убита выстрілами в теменну часть чашкы.

3. На территории, прилегаючой к Яновскому лагерю, німцы робили массове погребение и потом спаление трупов. Паление трупов отбывалося долгий час в разных місцах территории лагеря, но большу часть трупов палили в балкі-выімкі.

4. Земля в той балкі на значной глубині оказалася просыченом трупными плынами и тлущами с гнилистым запахом и запахом гари.

5. Характер найденого попелу, який складался из дробных обламков костей, свідчит о том, што спаление трупов отбывалося при высокой температурі. Оставшийся при спалению трупов попел закопувано в розмаитых місцах на территории лагеря на глубині 2 метров. Такых місц найдено 59. Кромі того, попел с костями был найденый на поверхности на всей территории лагеря.

Взявши под увагу загальну площадь закопувания и россіювания попелу и костей, досягавшу 2 квадратных километров, експертна комиссия рахує, што в Яновском лагері вынищено больше як 200 тысяч совітскых граждан”.

В юлі 1941 року німецка воєнна команда створила в центрі города Львова, на территории кріпости, званой “Цитадель”, концентрацийный лагерь для воєнноплінных. Под загрозом росстріла німцы примушали заключеных працувати от рана до поздной ночи. Поміщения лагеря не огрівалися. Заключены десятками тысяч умирали от голода, побойов и рострілювалися.

На основі свідоцтв стверджено, што в лагері “Цитадель” за час його истнования содержалося больше як 280 тысяч воєнноплінных, из котрых от голода, болізней, тортур и росстрілов погибло понад 140 тысяч людей.

Свідок Никифор Григорьевич Голюк, який находился в том лагері с 8 юля 1941 року по апріль 1942 року, заявил комиссии:

“Як медик, працуючий в том лагері, я знаю, што за 4 місяцы умерло лем от дизентерии около 3 тысяч воєноплінных. Ниякых кроков борьбы с болізнями німецке командование не предпринимало. Наоборот, німцы умыслно привезли в тот лагерь из лагеря № 385 в Раві Русской больных плямистым тифом и розмістили их в казармах группами по 10 людей среди здоровых воєнноплінных. Послі того неуникнено в лагері выбухла епидемия плямистого тифа, от котрой с ноября 1941 року по март 1942 року умерло около 5 тысяч воєнноплінных.”

При осмотрі лагеря “Цитадель" комиссия нашла в камерах надписи замученных воєнноплінных:

“Ту умирали с голоду русскы плінны тысячами. 22 января 1944 року.”

“Доблесна русска армия, вас ждут с нетерпінием не лем народы, но и воєнноплінны, котры презначены на голодну смерть. Як тяжко умерати.”

Массовы росстрілы мирного населения и воєнноплінных німцы проводили также и в Лисеницком лісу, який находился на окраині Львова в сторону Тернополя. В тот ліс німцы каждоденно пригоняли и привозили на автомашинах великы партии совітскых воєнноплінных из лагеря “Цитадель”, заключены из Яновского лагеря, Львовской тюрьмы, а также мирных совітскых людей, задержаных на пляцах и улицах города Львова в часі многочисленных облав.

Судебно-медицинска експертна комиссия, обслідовавши місце росстрілов совітскых воєнноплінных, нашла на поверхности земли и в разных ямах попел и уцілившы кости людскых скелетов, штучны зубы, людскы волосы. “Остаткы мозговой субстанции, волосы, предметы личного обхода и різкий трупный запах в ямах свідчат о том, што в них долгий час были зарыты трупы, котры потом были выкопаны и спалены.”

На основі росслідования стверджено, што німцы росстріляли в Лисинецком лісу понад 200 тысяч людей.

В сентябрі 1941 року, по свідоцтву генерал-майора полиции СС Кацмана, во Львові было организовано гетто, назване німцами “Юденлаг” — єврейский лагерь. Гетто было розміщенно на окраині города. Территория лагеря была обгороджена плотом и дротом. Виходити на гетто никому не дозволялося. На роботу и с роботы водили єврейов лем под конвойом. В лагері находилося 136 тысяч людей. Население лагеря было ограблено зо всього. Обставины житя в гетто были страшны — люде спали на голой землі и под открытым небом, с євреями обходилися горше, як с быдлятми. Німцы проводили в городі массовы облавы на єврейов. Они не щадили ни мужчин, ни женщин, ни дітей. Взрослых они просто убивали, дітей отдавали командам гитлеровской молодежи як ціль в стрільбі.

Вот што посвідчила по тому поводу в свойом писменном заявлению французска гражданка Ида Вассо, директорка истнувавшого во Львові задолго до войны специального схоронища для престарілых и неспособных до роботы французов.

“. . . С приходом німецкых властей мы были все переконаны, што будут убийства. И, направду, не прошло и 2-3 дней, як мы услышали стрілянину из автомата, котра переконала нас в росстрілі єврейов — тых несчастных людей. Я мала можность отвидіти гетто. Гигиеничны обставины там были страшны. Люде жили по 15—20 в одной комнаті, без воды и електрикы. Дороговизна была страшна, и, як все, сила грошей грала свою ролю. Несчастны были презначены на голод. Один раз тыжднево их отвижало гестапо, котре одних увозило в Бельзец (Польша), другых ку пісчаному рову, штобы росстріляти. Засужденных увозили лем в сорочках, так як німецкы бандиты обдерали их с одежи и награблене отправляли вагонами в Германию. Маленькы діти были мучениками. Их отдавали гитлеровской молодежи, котра с тых дітей робила живу ціль и на них училася стріляти. Ниякого жалю ку другым, всьо для себе, такий клич у німцов. Треба, штобы цілый світ знал о том методі. Мы, котры сме были беспомочными свідками тых страшных сцен, мы повинны росповісти о тых страшных ділах, штобы всі знали о них, а, головно, не забыти их, так як отплата не верне житя миллионам людей.

Забыти — было бы зрадом людства. Страдания совітскых, французскых, английскых, американскых плінных повинны быти отомщены. Запамятайте на ціле житя. Ида Вассо Том".

За час истнования гетто с 7 сентября 1941 року по 6 юня 1943 року німцы вынищили понад 130 тысяч людей, часть из них была росстріляна в самом гетто, часть в Яновском лагері, остальных німцы отправили для знищения в лагерь смерти в Бельзец (Польша).

Німцы проводили массове вынищение совітскых людей и в другых городах Львовской области. В городі Рава-Русска німцы организували лагерь воєнноплінных. С юня 1941 року по апріль 1942 року в том лагері находилося понад 18 тысяч совітскых воєнноплінных. Всі они ку концу того периода были знищены. Воєнноплінных, якых привели в лагерь, німцы роздівали, оставляли на них лем білизну, в зимушний час водили на роботу роздітыми и босыми. Позбавлены сил воєнноплінны падали. Німцы их добивали из автоматов и просто кололи багнетами.

Житель села Яныче, Магеровского района, Кочак Василий Степанович свідчил перед слідчом комиссиом слідуюче:

“Я працувал в лагері совітскых воєнноплінных с декабря місяца 1941 року по апріль 1942 року. За тот час німцы знищили голодом, холодом и росстріляли около 15 тысяч воєнноплінных. Трупы умершых и росстріляных вывозили на тракторных причепах в Волковицкий ліс. Голодны и вычерпаны воєнноплінны, коли их провадили по территории лагеря, накидалися на кучы гнилой и змерзлой картошкы, но конвоєры на місці их росстрілювали. Я виділ, як выводили цілком голых воєнноплінных, привязували шнурами ку стіні або ку столбу и в зимі держали их так, покаль они не замерзали.”

Массове вынищение совітскых людей німцы проводили всяди, особливо в городах Золочеві, Сокалі, Яворові, Жолкві, Городкі, Бродах.

Надзвычайном Державном Комиссиом стверджено, што німецке правительство систематично высылало в лагери Львовской области воєнноплінных и мирных граждан другых держав из концентрацийных лагерей, росположеных на территории Германии. Ту німцы тортурували их и убивали.

Житель города Львова Бич 3. Е. свідчил пред коммиссиом:

“Коли я находился в заключению в Яновском лагері, там были, кромі украинцев, поляков и єврейов — граждане Франции, Чехословакии, Италии и другых держав.”

Воєнноплінных другых держав німцы примушали до непосильной роботы, били, морили головом, нароком вынищували. Всьо тото подтверждатся многочисленными свідоцтвами совітскых граждан, а также свідоцтвом освобожденных Красном Армиом во Львові французскых воєнноплінных, якы находилися в заключению в “Цитадели” и Яновском німецкых лагерях.

Уроженец города Ангулем департамента Шаранта (Франция) Емиль Леже, взятый німцами в плін 13 юня 1940 року в Шампании (Франция), посвідчил: “Уж с первых минут мого пліна мі пришлося вынести на собі жестокы методы, приміняны німцами. Под страхом смерти нас змушали працувати без отдыха, без достаточной сколькости поживы; мы были вычерпаны, вымучены, покрыты вошами, без обуви, нашы мундуры падали з нас. Коли мы скаржилися на подобный режим, нам отповідали: “То ище замного добри для французскых свиней и собак.”

“За тоты часы мы не мали вістей от нашых родных. Коли мы просили позволения писати им, то німцы отповідали нам. “На што? Вашы родны, без сомніния, убиты, а с вашыми женами спят німецкы солдаты. . .”

“. . . 1941 року я был присутный при первом прибытии русскых воєнноплінных в “Шталаг” Нейбранденбург. То было страшно. Русскы были правдивы скелеты, в котрых ище теплилися остаткы житя. У многых из них были раны от багнетов на ягодицах и плечах. Дакотрых німцы убивали, дакотры сами падали мертвыми от вычерпания при найменьшом руху. Мертвых роздівали, складали на телігу и везли во спольну могилу, яка находилася в окрестностях “Шталага”. Теліга верталася в “Шталаг”, наладована хлібом и ярином для кухни. На телігі были кровавы плямы. То было страшно! В тоты минуты мы поняли, на яку утончену жестокость способны німцы. Кажде рано німецкы офицеры и унтерофицеры посіщали лагерь русскых воєнноплінных. Они говорили: “Мы идеме тренуватися в стріляню на живу ціль.”

“Приблизно 200 людей русскых солдатов умирали каждый день. Их убивали, або они умирали от болізней и голода. Среди многых убийств я особисто виділ ужасный способ убийства русскых воєнноплінных німецкыми солдатами. Ударами палкы або ударами чобота они розбивали им головы, говорячи: “Русскы собакы не стоят карабиновой кули.” Доведены до высшой степени тонкости подлость, варварство и жестокость являются отзначаючыми прикметами “бошей” (німцов) в лагерях.”

“В январі 1943 року я был отправленый в “дисциплинарный лагерь 325” в Галицию (Рава-Русска — Тернополь—Львов). Ту был ище больше жестокий режим. Много Французов было убито в том “Шталагі”. То был террор. Одна надія, одна мысль — смерть. В часі мого тюремного заключения во Львові мі приходилося ходити на роботы по мощению улиц, што позволило быти свідком убийств німцами десятков тысяч людей. Улицы были завалены грудами трупов женщин, дітей, мужчин, убитых ночом.”

Лооф Клеман свідчил пред слідчом комиссиом о ужасах німецкых лагерей, котры йому пришлося пережити, будучи плінником: “Воинску повинность я отбывал в Сент-Авольд недалеко Меца, в 18-м кавалерийском полку. Попал в плін к німцам 4 юня 1940 року в Сент-Клере (департамент Сена). . . Рава-Русский лагерь воєнноплінных, куды я прибыл 3 сентября, 1942 року, англичане называли “повольном смертью”. В том лагері был один водопроводный кран на 12 тысяч людей. Корыстуватися ним дозволялося лем за час 4-5 годин денно. . . Німецка охрана нас терроризувала. За найменьшу провину грозила смерть. Нам заборонялося пити воду. Мы голодали. Рано в часі перекличкы мы с трудом стояли на ногах; нам давали денно 200 граммов хліба, рано мы получали горячу воду с сосновыми шпильками, днем пол-литра зупы. Часто зупа была лем водом. Мы спали на землі. Всяди были блохы и вошы. Русскы воєнноплінны тысячами померали в лагері от голода и тифа. . . По ночам в Рава-Русской мали місце убийства єврейскых женщин и мужчин. Цілу ноч стрілял кулемет. Рано, идучи на роботу, я сам виділ велику сколькость трупов. Німцы навет не закопували их и не давали собі труда вывезти их.”

Бывший французский воєнноплінный № 18057, XII. Д. Марсель Риветт о звірствах німцов свідчил слідуюче: “. . . Я отбывал воєнну службу в Саарбургі (Мозель) в 59 піхотном полку. В часі загальной мобилизации был высланый в 60-й армейский моторизованый полк. 24 юня 1940 року я попал к німцам в плін в Вогезах. . .

“В Трире я первый раз встрітился с русскыми воєнноплінными. С ними обходилися дуже зле. Меж воєнноплінными были и полякы. Русскы жили отдільно в своих камерах, и им давали в страву картофельны лупы.

“В Лимбургі в “Шталагі XII. А. обходилися с плінными ище горше. О 6-й годині рано нас выганяли из барака ударами дубины. В полудне давали зупу, котру русскы мушены были істи стоячи. Єсли дакто из них присідал, дораз стріляно с карабина або кулемета. Французский товариш подносил упавшого и нюс го в госпиталь, где лікарю оставалося лем признати смерть. Каждоденно умирало 15-20 русскых. Причином смерти были голод, болізни або убийство. Французский доктор, котрый робил вскрытие, находил в кишках помершых траву, земляны черви, котрых іли умеравшы от голода воєнноплінны.

". . . Начальник “Шталага XII. А.” барон фон Бок, нашол, што сборы в бараках отбываются дуже повольно (нас было 1.200 людей в двох бараках № № 7, 8). Послідовал приказ быти готовыми за 4 минуты. Тых, што спозднялися, дозволялося колоти багнетами. В том находил собі задоволение унтер-офицер Шрейнер, який колол нас. Нас перевели в Рава-Русску. Там мы звернули увагу на планный выгляд русскых воєнноплінных. Было 10 января, и термометр показувал 10—15 градусов ниже нуля, а многы были лем в сорочках, кальсонах, босы, без шапок, и всі страшно выхудлы, майже скелеты. У всіх у них были раны от багнета на плечах и ягодицах. Нам удалося поговорити с русскыми и дознатися, што они воєнноплінны и працуют беспосередно на линии фронта. И коли их спросили, чом они роздіты, то получили отповідь, што німцы розділи их, штобы охранити себе самых от холода. Послі двухдневной провіркы и вызовов нас помістили в подвалі без світла. Мы ничого не іли. Было 20 градусов ниже нуля. Среди нас были солдаты Сіверной Африкы, котры невыносимо страдали от холода.

“1-го юня 1943 року мала місце кровава бойня, в часі котрой было убито 10 тысяч людей. Гдекотры были где-си вывезены. На слідуючий день, коли мы шли рано на роботы, мы виділи много трупов женщин, дітей, мужчин, якы лежали в лужах крови. Німцы убивали без розбору всіх єврейов, где бы они их ни встрітили. Убийства продолжалися около місяца.

“Совітска армия вступила во Львов. И с того часу мы свободны, ждеме скорого повернения во Францию. Я надіюся, што німцы сполна заплатят за проляту кров и будут покараны за всі злодіяния. Марсель Риветт, воєнноплінный № 18057 XII. Д.”

Ле Фуль Жорж посвідчил комиссии:

“Послі пяти тяжкых доб мы ночом прибыли в Рава-Русску. Нас влекли, так як большинство воєнноплінных цілком ослабли. Німецкий унтер-офицер крикнул нам: “Вот вы и приіхали в краину солнца”. Но який ужас тот лагерь!. . .

Німец-адъютант сказал нам, што в лагері Рава-Русска умерло больше як 3.000 русскых воєнноплінных от тифа. Мы закопуєме их ту на місці. Трафлятся, што меж ними попадаются ище не умершы, но их всьо-ровно кидают в ямы и засыпуют негашеным вапном, от котрого они задушуются. Каждоденно в лагерь прибывало 1.000 французов, якы утекли с Германии. То были тоты, котры не хотіли працувати для побіды Германии. . .”

Под Рава-Русском, в 200 метрах от городского госпиталя и в 50 метрах от шоссе, под лісом, комиссия нашла 22 могильны горбы. На дакотрых из них сохранилися кресты с французскыми надписями.

Судебно-медицинском експертном комиссиом были роскопаны 2 могильны горбы. В одном из них был найденый труп мужчины в униформі французской армии. На вылогах колніра была цифра “24”. Документов при трупі не найдено. В другом горбі комиссия нашла два мужскы трупы без одежи, зо слідами опаления по всей поверхности трупов. По сохраненым надписям на крестах могильных горбов установлено, што в них похоронены французы, замучены німцами: Боне Рожер, рожден. в 1911 року, Годи Пьер, рожден. 1915 року, Дастю Пьер, 29 рочный, Посе Поль, 34 роч., Вито Ейжен, 34 роч., Сирг Камиль, Боннуа Альфонс, Котье Рожер и другы.

Німецкы наіздникы, позбавлены всякой морали, вынищували всіх неугодных им людей: русскых, украинцев, єврейов, поляков, французов, чехов и даже вчерашних своих приятелей по оружию — итальянцев.

Працувавша в период німецкой оккупации переводчицом в команді “Ретрово-Итальяно” Петрушковна Нина Здиславовна, по национальности полька, посвідчила:

“Послі упадку Муссолини фашисты потребували от итальянскых солдат, якы находилися в городі Львові, присягы на вірность гитлеровской Германии. Многы из них отказалися дати присягу. Всіх, кто отказувался дати присягу, фашисты арестували. Так было арестувано 2,000 итальянцев, и всіх их німцы росстріляли.

Меж росстріляными было 5 генералов и 54 офицеров итальянской армии, котрых я знала. В числі росстріляных находилися слідуючы генералы и офицеры итальянской армии: генерал-майоры Манджанини Енрико, Форнароли Альфредо, Джанноти Джузеппе, полковникы: Манджонини, Луиджи, Ашенцо, Стефанини Карло, офицеры: Джино Каруссо, Фузаролли Луиджи, Томмасо Серафими, Форнаролли Енрико, Нино Манто, Едуардо Монджианини, Альфредо Ломбарди, Ливно Корсани, Джиованни Джиакомини, Луиджи Стефанини, Персини Клено, Кастеляни Ришардо, Персианини Тулио, Дельниери Марино, Моросси Альфредо, Кастори Джиорджио, Бостианини Альфредо, Сторелли Едуардо, Биньями Джиованни, Валентини Джино, Сабо Луиджи, Сабо Ришардо, Винценти Емануело, Лоренцо Веранини, Тоскано Альфонсо, Родоканакши Массимо, Либери Марселло, Кристианини Роберто, Цитрини Джиозеппе, Паулини Емилио, Бискезе Донато, Джиантини Луиджи, Джиатони Тулио, Джиакотто Тулио, Тороссе Евальдо, Крестианини Серджио, Кедрианини Лоренцо, Валентино Альфредо, Каусуро Ришардо, Руссини Бенито, Тиорсини Тулио, Кристаллини Марино, Фарино Антонио, Кальниери Марино, Массони Луиджи, Кальцари Марино.”

Гражданка Французской республикы Ида Вассо также подтвердила факт росстріла німцами итальянскых генералов, офицеров и солдатов: “Послі упадку Муссолини, — говорит она, — німцы арестовали всіх итальянцев, котры не хотіли примкнути ку фашистской партии, и знищили их. Трупы их счезли. Без сомніния, они были спалены або засыпаны негашеным вапном”.

В связи с успішном офензивом Красной Армий и паничным отступом німецко-фашистскых войск, гитлеровске правительство и воєнне командование приступили к скрытию своих потворных злодіяний по знищению мирного населения, совітскых воєнноплінных и граждан Франции, Чехословакии, Югославии, Польшы, Голландии, Бельгии, Соєдиненных Штатов Америкы, Великобритании, якы находилися в німецкых концентрацийных лагерях Львовской области.

На приказ рейхминистра Германии Гиммлера и генерал-майора полиции СС Кацмана в юні 1943 року были проведены специальны крокы для выкопувания и спаления трупов замученых и росстріляных мирных жителей, совітскых воєнноплінных и граждан другых держав.

Во Львові была утворена німцами специальна зондер-команда № 1005, яка складалася из 126 людей. Шефом той команды был — гауптштурбанфюрер Шерляк, його заступником — гауптштурмбанфюрер Раух. В обовязок зондер-команды входило выкопувание из земли убитых німцами мирных жителей и воєнноплінных и спалювание их. Роскопком и палением трупов руководили шарфюрер СД Раух и обервахмейстер СД Кепик.

Выкопаны трупы укладували на специальных площадках в штабели, от 1.200 до 1.600 трупов в каждом. Трупы обливалися смолом, бензином и спалювалися. Попел и остаткы костей просіювалися через специальне решето для ціли сбора золотых предметов — коронок зубов, перстеней, годинок. Свідкы Величкер, Хамайдес и другы посвідчили, што за пять місяцов их роботы в “бригаді смерти” с попелу спаленых ними трупов было высіяно и отправлено німцами в Германию 110 килограмов золота.

Попел россіювался по полям, а также закопувался в землю, великы кости збералися особно и перемелювалися в специальной машині. Тоту машину для молотя костей німцы не мали часу знищити, она осталася на территории бывшого Яновского лагеря, як доказ кровавых злодіяний гитлеровскых катов. Руководил перемелюваньом костей замученых — німец шарфюрер СД Елитко.

Бывший заключеный Яновского лагеря Величкер Л. А., котрого німцы примусили працувати в бригаді для роскопувания и паления трупов, посвідчил: “В “бригаді смерти” для паления трупов я працувал с 6 юня 1943 року до 20 ноября 1943 року. За тот час бригадом было спалено понад 310 тысяч трупов, из них около 170 тысяч на пісчанику Яновского лагеря, понад 140 тысяч в Лисеницком лісу. В тото число входят як тоты трупы, котры выкопувалися бригадом из могил, так и тоты, котры не закопувалися в землю, а дораз послі росстріла спалювалися. 20 ноября 1943 року ціла наша бригада утекла. Лем немногы осталися в живых, остальны при утечкі были убиты. Німецкы каты организували другу бригаду зо заключеных, котры продолжали паление трупов. Яке число трупов было спалено послі мойой утечи, я не знаю, но знаю, што паление трупов в Лисеницком лісу продолжалося до января 1944 року.

Свідок Манусевич Д. Ш., який также працувал в “бригаді смерти”, свідчил слідуюче: “Послі спаления трупов в яру коло Яновского лагеря нас ночом автомашинами повезли в Лисеницкий ліс, где мы откопали 45 ям с трупами росстріляных граждан. По формі одежи, по войсковым отзнакам, гузикам, медалям и орденам мы познавали меж трупами росстріляных красноармейцев, а также французскых, бельгийскых и итальянскых воєнноплінных, меж ними были также трупы мирных граждан.”

Судебно-медицинска експертна комиссия, на челі с головным експертом Красной Армии, профессором Авдеевым М. И., провела обслідование місц захоронения и спалювания трупов в Лисеницах и ствердила: “Симметричне росположение на поверхности площадок, где были найдены ямы с попелом, молодых деревец, из котрых часть засохла або слабо розвиватся, указуют на то, што деревца посажены на тых площадках штучно, для ціли замаскования площадок. Для той самой ціли проводилося вкопувание по поверхности площадок пней дерев. Тоты факты свідчат о том, што німецко-фашистскы власти всіми силами хотіли скрыти сліды своих преступлений. Выбор місца для “фабрик смерти” в глубині котловины, скрытой майже зо всіх сторон от посторонного взора высокыми горбами и деревами, также помагал німцам орудувати скрытно. Природны обставины місцевости, маскувание и сильна охрана позволяли катам творити свою страшну роботу в глубокой тайні.”

Такым способом гитлеровскы убийцы на территории Львовской области придержувалися той самой методикы скрытия своих злодіяний, котру они почали предтым, убивши польскых офицеров в лісу под Катынью. Експертна комиссия ствердила полну идентичность маскования в Лисеницах могил с такым самым маскованием могил убитых німцами польскых офицеров в Катыни.

Для поширения досвіда вынищувания людей, паления трупов, маскования преступлений німцы утворили во Львові при Яновском лагері специальну школу для подготовкы “квалификованых кадров”.

В тоту школу приізжали коменданты лагерей из Люблина, Варшавы, Кракова и другых городов. Руководитель зондер-команды № 1005 Шерляк “на місці” учил командантов, як выкопувати трупы из земли, як складати их в стюсы, спалювати, высіювати попел, перемелювати кости, засыпувати ямы и засажати на свіжых пляцах деревца и корчы.

Надзвычайна Державна Комиссия держит отповідальными за массове звірске вынищение в городі Львові и Львовской области мирных совітскых граждан, воєнноплінных и граждан другых держав гитлеровске правительство, особливо райхсминистра Германии Гиммлера, який нераз приізжал во Львов для инспектования німецкых убийц и катов.

Разом с головными вдохновителями и организаторами массовых убийств невинных людей виновниками являются слідуючы особы: глава генерал-губернаторства доктор Франк, генерал-губернатор “дистрикта Галиции” бригаденфюрер СС и генерал-майор полиции доктор Ляш, губернатор “дистрикта Галиции” доктор Вехтер, начальник полиции генерал-майор СС Кацман, начальник “Шталага XII А.” в Германии барон фон Бок, унтер-офицер в том самом лагері Шрейнер, организатор Яновского лагеря гауптштурмфюрер Гебауер, коменданты Яновского лагеря гауптштурмфюрер СС Варцок Франц и оберштурмфюрер СС Вильгауз Густав, помочникы и заступникы коменданта Яновского лагеря: лейтенант СС Шейнбах, обер-лейтенат СС Силлер, штурмфюрер СС Рейс, штурмфюрер СС Шульц, оберлейтенант СС Венке, шеф Яновского лагеря оберштурмфюрер Манвингер, шарфюрер СС Колянко, начальник слідственной части шарфюрер СС Гейне, шефы “гетто”: унтерштурмбанфюрер Гайниш, шарфюрер Мансфельд, гауптманштурмванфюрер Гжимжик, шеф зондеркоманды СД № 1005 гауптштурмбанфюрер Шерляк, його заступник гауптштурмбанфюрер Раух, руководитель группы для перемелювания костей шарфюрер СД Елитко, руководитель группы для выкопувания трупов шарфюрер СД Праж, руководитель “бригады смерти” гауптшарфюрер Ейдель, шарфюрер СД Райс и Маєр, руководитель группы для паления трупов обервахмейстер СД Кепик, обервахмейстер Вольф, оберштурмбанфюрер Савицкий, коменданты лагеря “Цитадель”: капитан Блют, майор Сидорен, майор Рох, оберфельдфебель 328 полка Миллер Фриц, оберфельвебель Пер, комиссары по ділам єврейов: Енгель, Зейс Икварт, Ленард, директоры заводов в Яновском лагері Бляйнес, Кауфман, шарфюреры СС: Рерих, Чекаля, Хан, Блюм, Бурет, Биттерман, Мельхиор, Боер, Коллер, Бирман, Битнер, Ульман, Браумбауер, рядовы команды СС Фокс, Гайнер, Раузер, Поляпис, Ган, Лейдкрман, Кроп, оберштурмфюрер СС Ришвентнер, заступник коменданта “гетто” Циллер, комиссар гестапо Вепке, комендант города Сокаль Миллер, гестаповцы Цейман, Гартман, Риман, Гайзагов, Лекер, Крамаєр, Сушес, Кроммер, Бельц, Шнар, Бенер, помочник коменданта лагеря в городі Золочев Галимак, комендант лагеря в селі Ляцки обер-лейтенант Зоммбарен Йоган, начальник полиции города Золочев майор Людвиг, начальник жандармерии города Золочев Мура, жандарм Гильзенкар, штурмовикы отряда СС в городі Золочев Прейзнер, Людвиг, Монс, начальник гестапо города Жолква капитан Папен, начальник полиции обермейстер Кетер, оберштурфюрер СС Гильденбрант, крайсгауптман города Каменка-Бугска Неринг, комендант лагеря Липник, комендант города Городок Штаер, комендант жандармерии Кремлер, комендант “гетто” Шитт, крайс-гауптман в городі Рава-Русска Хагер, штадткомиссар Ляске, начальник гестапо Шпейт, шеф жандармерии — комендант города Кляйн, офицеры жандармерии: Тригнер, Маерт, Фрейнток; комиссары по ділам єврейов Гольц и Штрух, коменданты лагеря воєнноплінных майор Фишер, майор Гассинер, майор Флекер, заступник коменданта лагеря майор Бем, начальник гестапо Новарро, офицер Броер, лікар лагеря лейтенант Найман, артскомандант города Яворов капитан Енке, оберштурмфюрер СС Лейбмаер, ландкомиссар Штаер, полицаи Голоб, Найце, Вольф.

Всі они повинны понести сурову отповідальность за свои потворны злодіяния.