НИКОЛАЙ ЖУРАВ И ЙОГО ФАМИЛИЯ28-го сентября, 1941 року помер в Прайсдел, Па. передовый член нашой организации, предсідатель містного отділа Л. С., Николай Журав. Покойный Николай Журав родился января 19, 1881 р., в селі Білянка, Горлицкого повіта. Женатый был с Анном Митусь, из Лосья. Прожили они разом коло 35 літ. Найстарший их сын числит уж 33 рокы, а наймолодше — 7 роков. Выховали они красну фамелию: 6 сынов и 6 дочок, четверо роблят, а остальны четверо ище до школы ходят. Добра, и примірна то фамелия, діти всі по-русскы говорят, як хлопці так и дівчата, и не стыдаются свойой русской народности. Покойный Николай приіхал до Америкы до міста Питтсбурга в 1902 року. Робил с початку коло Питтсбурга, потом короткий час в Мейфильд, а так переіхал на Прайсдел, где прожил 37 літ. Робил головно по майнах, а остальных 14 літ по фабриках. В місяцу юню сего року говорил, што уж не чуєся добри, и перестал робити. Але за тоты три місяцы не поліпшалося му, лем погоршило. Покойный Николай Журав был предсідательом нашого числа Л. С. от початку основания отділа в 1933 року, аж до свойой смерти. |