МАКОВИЦКЫ ДІВЧАТА

Маковица — народна назва чисто карпаторусской-лемковской территории Бардиовского, Свидницкого и Стропковского окресов в Пряшевской Руси, котра граничит з галицком Лемковщином Горлицкого, Ясельского и западной части Сяноцкого повітов.

Маковичане — стойкий и завзятый народ в обороні свойой национальности. Маковица вела завзяту борьбу против католицизма и мадьяризации школы и церкви в часі минувшой империалистичной войны, коли то мадьярске правительство хотіло насильно омадьярщити национальны меньшинства, особливо карпаторусске национальне меньшинство. В той роботі помагало мадьярскым панам омадьярщене духовенство и учительство, через церков и школу. Но простый народ оперся насильной мадьяризации школы и церкви и почал завзяту борьбу против мадьярского духовенства и учительства в обороні свойой национальности.

Маковицкий народ — то тоты самы лемкы, што по галицкой стороні штучной границы, тота сама народна бесіда, обычаи, рижнятся лем дакус народном одежом. Интересно, што коли наш народ по другых околицах в краю в послідных часах занедбує свою оригинальну народну одежу и одіватся уж во фабричу, Маковица стоит и ту завзято при свойой одежі, особливо дівчата. Маковицкы дівчата не можут привыкнути до містецкой моды.

АННА ЗАВАДА и МАРИЯ СКИРКАНИЧ

Маковицкы дівчата одіваются так, як тоты дві нашы краянкы на той фотографии. Тоты нашы краянкы, родом из Юрковой Волі, шаришской столицы, называются Анна Завада и Мария Скирканич. Приіхали в Америку два рокы тому назад и жиют в Клифтон, Н. Дж. Принесли зо собом в Америку и свою народу старокрайову одежу, видно, што не могли легко росстатися з ньом.

Обі належат до Пассайского хора и Аматорского кружка при Л. С. в Пассайку.

Родиче их жиют в краю, в Юрковой Волі, но у Анны остался лем отец. Мати померла при родах, коли Анні было заледво 24 годин.

Як их маковицкы товаришкы в краю, так и они ту в Америкі все веселы, живы, скромны и працовиты.