На повысшой фотографии видиме одну из найчисленнійшых лемковскых фамилий на емиграции, а то фамилию Семана и Юстины Шафранов в Джиннет, Па., родом из Терстяны, повіт Кросно, Лемковина. Тых двоє нашых лемковскых емигрантов мусіли дуже потрудитися, штобы выховати таку фамилию, мусіли быти трудолюбивы и ощадны. штобы тоты діти накормити и приодіти, штобы им дати школу и дах над головом.

Всьо то у той фамилии єст: Єст свой дом, кусок поля, своя корова. Всьо то мусіли они обоє заробити своими руками. Ци не герои труда?

Но ище єст много интересного в той фамилии Шафранов. Семан Шафран не знал читати. Може знал пару букв. но не были му нанич потребны. Не мал што читати, може лем нумера познати ся му придало. Но коли пришла в Америку наша газета “Лемко”, своя родна карпаторусска газета, Семан Шафран первый раз подумал, што буквы потребны, штобы он мог прочитати свою родну газету. И такой дораз ся взял до читаня. до складаня букв. Но и дошол до того, што читат каждый нумер “Лемка” от початку до конца. А коли вышла книжка Островского “Як гартувалася сталь”. Шафран не лем раз перечитал, но перестудиовал тоту книжку, и он сегодня сознательный лемковский роботник. Такий сознательный, што он не задоволился сам тым. што знає по-русскы читати. Он научил читати по-русскы и розуміти “Лемка” свои діти. Им то пришло лекше, як отцу. Шафрановы діти читают “Лемка” читают литературу Лемко-Союза и пишут по-русскы, а всього того научилися в свойой домовой школі. Они и думают так, як их отец и мати, так розуміют житя.

Треба признати, што діти Семана и Юстины Шафран незвычайно способны, трудолюбивы и скромны, подалися на своих родичов, и интересуются нашом организациом так, як и родичы. Отділ Л. С. в Джиннет купил свой народный дом, где мают свою діточу школу, основали отділ молодежы Л. С. Розумієся, што діти Шафрана ядро того молодого отділа Л. С. в Джиннет.

Из дочок Шафрана одна выдана за американца, другы дорослы дівчата уж працуют на себе, так што тепер уж родичам приходит лекше. Всіх дітей мали 15, двоє померло.

Знаный нам всім Теодор Гулик из Дженсвил, Виск., своими дописами в “Лемку”, тоже с Терстяны, близка родина Юстины Шафран. Терстяняне взагалі тверры лемкы, повідают, што лем єден с Терстяной ся им не выкарал, што забыл свою материнску бесіду, решта всі емигранты с Терстяной так любят свою бесіду, што не лем сами бесідуют по-лемковскы, но и их діти ту рождены, бесідуют так чисто по-лемковскы, як бы приіхали разом з родичами зо старого краю.

Єсли бы мы всі так выховували свои діти, як выховали тоты два терстяняне — Шафран и Гулик и их жены — то мы мали бы ту численне наше лемковске поколіние, котре бы интересувалося своим карпаторусскым народом и родным крайом своих родичов, а то бы мало огромне значение для нашого народа. На жаль, не всі з нас Шафраны и Гуликы, не всі могли перенести тоту любов к свому народу на свои діти.