Для нас, для старшого поколіния, выпали дуже тяжкы часы в истории людского розвития. Пережыли мы страшну світову войну, пережываме страшный кризис господарства, многым из нас, здаєся, придеся ище пережыти великы перевороты, як приміром пережыли народы старой России, як пережыват испанский народ. Многым из нас здаєся, придеся ище пережыти страшну світову войну, до котрой прут фашисты, тоты людскы выродкы, котры хотят застановити грубом силом прогресс и розвитие людства, хотят вернути людство в стары дикы часы, в часы взаимоистребления, племенной ненависти.

Мы, невеличкий карпаторусский народец, жыєме в самой середині Европы, в котрой розогралася страшна світова война и розгрыватся тепер дальша судьба людства. Так в часі войны, як и тепер по войні, наш народ страдат найбольше по причині свойой долголітной неволі, заотсталости, неорганизованности и бідноты.

Ище до войны половина нашого народа емигровала в Америку. Но и в Америкі нам тяжше приходило, як другым емигрантам. Причины тоты самы. Мы и в Америкі остаєме найбіднійшы, бо найменше из всіх просвіщены и найменше организованы. Мы и скорше умераме от другых. И наше молоде поколінне не триматся нас так, як молоды поколіния другых народов тримаются своих народов.

В тых тяжкых часах нам приходит найтяжше, особливо нам, старшому поколінню. Наша молодож тратися меж другыми, мішатся, и уж єй так жыти, як и другым.

Но интересно, што мы, старшы емигранты в Америкі, хоц даяка часть из нас, смотриме уж больше трезво на світ и жытя, мы уж збудували народну организацию, робочу организацию, бо многы из нас уж видят, што будущий світ, то світ народный, світ трудящихся людей. Наша молодеж, мимо того, што она покончила школы, не видит ище того, хоц велика часть американской молодежы тото видит. А в старом краю якраз наоборот: Стары не можут того нового наступающого жытя видіти, а молоды видят. В старом краю наша лемковска, и взагалі карпаторусска молодеж, бореся за свои права, за право на жытя, разом з молодым поколінием другых, сусідных народов. Наше молоде поколінне в Америкі, выховане капиталистичном прессом и дешевом литературом в недовірию до своих родичов, до робочой кляссы и до социального прогресса. Но майме надію, што она скоро перемінится, коли нашым молодым лемкам приде працувати самым на кусок хліба у капиталистов, для себе и для свойой родины.

Мы, старшы, пережывшы тяжкы часы, вычерпавшы свои силы, котры зме принесли зо собом с краю, отходиме дуже скоро с того світа. Отходят скоро найліпшы нашы емигранты, найліпшы роботникы, найліпшы члены нашой организации. Тоты найліпшы роботникы так в индустрии, як и в народной, организацийной роботі, уходят найскорше, бо они найперше вычерпают свои молоды силы.

Много из них одышло и за минувший, 1936 рок.

Меж другыми нашыми добрыми членами одошли от нас сего року три передовы роботникы, и то в молодом ище віку. Всі три приіхали в Америку молодыми хлопцями, полными карпатского здоровля и сил. Фабрикы и майны забрали им дуже скоро их здоровля и силы и загнали до гробу пред часом.

С початком року помер наш передовый член кливландского отділа Л. С. ч. 6.

М. Сосенко з родином.

Михаил Сосенко родился в Свіржовой Русской, пов. Ясло. Приіхал в Америку молодым хлопцем, и от самого початку робил дуже тяжко, по большой части под земльом, в угльовых майнах, потом перешол в желізну индустрию в Кливланд, где осіл и где го нашла смерть на 48 року жытя. Пару літ пред смертьом сквитували го с фабрикы, бо зауважыли, што при тяжкой роботі його силы ослабли. Сосенко умліл нераз при тяжкой роботі.

Мало в Лемко-Союзі так сознательных и идейных членов, якым был покойный Михаил Сосенко. А знате, чом? Бо Сосенко не лем розуміл робочу правду, яка робочым належытся, и тоту кривду, яку им робят. Сосенко чул всьо своим пролетарскым сердцем. Он сам перенюс на своих плечах всі тягары жытя роботника емигранта, найтяжшы тягары и почал глядати правды в религии. Но в религии єй не нашол, то почал глядати в наукі. И нашол людску правду в наукі, в книжках, специально в робочой наукі, в наукі великого учытеля робочой кляссы, Ленина. Сосенко методом самоучкы дошол до того, што в послідных роках свого жытя чытал сочинения Ленина.

Дуже завчасу покинул нас честный, идейный роботник, наш добрый брат и товариш, Михаил Сосенко.

Другым такым честным, идейным нашым братом и членом Лемко-Союза, был:

Виктор Касенчар.

Виктор Касенчар помер в місяцу сентябрі, 1936. Родился в селі Криживка, пов. Новый Санч. Село Криживка дуже бідне и невеличке село, на дорозі из Нового Санча до Крыниці.

Ище был дитином, коли осиротіли го його родиче, обоє померли, и Касенчар от дітинства поневерался помеж чужых людей, по службах. Коли кус подрос и пришол до сил, поіхал за роботом на Чехы, и нашол роботу в майнах, в Моравской Остраві, где робил долший час. Из Моравской Остравы єдной ночы перешол границу до Германии, а из Германии достался в Америку в 1902 року. Приіхал до Пассайку, но не мог достати роботу, так што выіхал до майны, до Мт.Кармел, где робил пару літ. В 1906 вернул до Пассайку, где оженился с Варваром Чупак из сусідного села Ростокы Великой и поіхали обоє ку майнам, а потом вернули в Пассайк.

От самого початку Касенчар интересовался народными ділами, но але што на початку народне діло была лем религия и церков, то Касенчар весь свой свободный час отдавал религии и церкви, борьбі религийной, котра втоды шаліла среди нашой емиграции меж униятами и православными. Касенчар был завзятый православный, и отдал много свого труда и жертвы при будові прав. церкви в Мт.Кармел, зараз обок униятской.

Но с часом Касенчар пришол до головы по розум, коли православный поп в Пассайку спровадил на своих парафиянов, котры хотіли рахунков, детективов, яко на радикалов, социалистов и т. д. Касенчара и Михаиха Костика детективы арестовали, и от того часу оба пришли до головы по розум и стали прогресивными роботниками.

Виктор Касенчар розуміл робочу справу так, як мало нашых лемков роботников розуміє. До того был надзвычай открытым и смілым чоловіком, в обороні народных робочых прав. Што до организации Лемко-Союз, то покойный Виктор Касенчар готов был за тоту нашу народну организацию отдати своє жытя.

В робочой текстильной юнии Касенчар тоже был передовым членом, в часі страйку не опустил ани єден митинг, и який обовязок был на него наложеный, каждый с великом охотом выполнял.

Умер Виктор Касенчар в 52-ом року жытя, як видиме, тоже в молодом віку, на ослабление сердца. Того самого місяца, на початку сентября, был делегатом на Народный Конгресс в Нью Йорку от свойого братства. Был выбраный в президию Конгресса, а потом в Исполнительный Комитет.

Пред самом смертьом интересовался найбольше положением на фронтах гражданской войны в Испании.

В. Касенчар оставил вдову и сына Василя.

В октябрі 1936, помер третий наш добрый член, сознательный роботник, в середных роках, бо в 46-ом року жытя, Никита Михальский, член Л. С. ч. 16. в Пассайку. Никита Михальский, родом из села Мощанец, пов. Сянок, тоже приіхал в Америку молодым хлопцем, полным сил и здоровля, котре, як видиме, вычерпал скоро по шапах, так што мусіл померати в молодом ище віку. Як и попередны, Никита Михальский был свідомый роботник лемко, належал до первых и передовых членов нашой народной организации Л. С. и отдавал для ней много свого труда.

Кромі тых нашых трох передовых членов, померло в 1936 року много другых нашых добрых членов, честных лемков роботников, и тысячы нашых честных карпаторусскых емигрантов, котры не належали до нашой организации. Праві всі тоты нашы карпаторусскы емигранты померли предвчасно. В старом краю наш народ жыє долго. Нашы горы Карпаты знаны с того, што люде дожывают глубокой старости, мимо той нужды, яка там панує. Што приспішат так смерть нашой емиграции в Америкі? “Спидап”, тяжка робота, часто нездорове помешканя, но причином болізни сердца згрыз, по причині непевности жытя, необеспечения на случай безроботя и на старость, страта ощадностей, страта дому, страта роботы. Тота непевность будучности, необеспеченность и згрыз по тому поводу, причинятся найбольше до вчасной смерти.

Вот, почому роботникы должны боротися организовано за обеспечение свого жытя — свойой роботы и старости.

Молоде поколінне в Америкі буде жыти долше. Мы, емигранты, зробили найтяжшу роботу, выбудували индустрию, выбудували Америку, розробили єй богатства так, што для молодого поколіния остала уж лем лекша робота, лем продукция для свого ужытку. Росходится лем о справедливе устройство — таке устройство, штобы тота продукция американской промышленности и земледілия была для американского народа, а не для спекуляции ненасытных капиталистов.

Коли американска молодеж порозуміє то, то будуще поколінне буде долше жыти, як наше, емигрантске поколінне.

Мы, лемкы, не маме чого ганьбитися свого поколіния ту, в Америкі. Мы дали Америкі здоровых и способных молодых граждан. Коли многы из нашых молодых лемков не думают так, як думают нередовы культурны люде, не идут разом с прогрессом, зо світом, то не мы тому виноваты, а виновата американска школа и пресса, виновата капиталистична система, система капиталистичной пропаганды. Но майме віру, што нашы діти придут сами на правильну дорогу, бо нашы діти, добры діти.

Меж нашым молодым поколінием находятся молоды люде всякых ученых профессий и всякого ремесла. Маме своих адвокатов, докторов, профессоров, инжинеров. Маме и своих летчиков. Одным из них наш Владимир Михайлович Витик, сын Михаила и Марты Витиков. Обоє родичы походят из села Мшана, пов. Кросно, обоє приіхали в Америку в дуже молодом віку, побралися в 1914 року. В 1915 родился им хлопец, котрый, як видиме на фотографии, вырос на сильного молодого чоловіка и, найголовнійше, на доброго летчика.

Владимир М. Витик

Молодый Владимир Витик покончил гайскул и калледж с дуже добрым результатом, а кромі того покончыл школу летчиков с так добрым результатом, што был освобожденый от таксы за школу. Отец купил му аєроплан, так што пару раз молодый лемко летчик приносил на свойом аєроплані своих родичов на лемковскы пикникы, раз аж из Терривил, Конн., где краяне Витикы жыют, до Ньюарку на лемковский пикник, и так потом брал гостей політати понад хмары. Владимир, єдинак у своих родичов, и тото кус тамує му його летничу кариеру, бо знате, як за єдинака родиче боятся, а особливо мати. Тым больше, што молодый Витик дуже смілый летчик.

В середині року денесли нам из Торонто, што на международном робочом пикнику была избрана

Нястя Мишко

звіздом того пикника, членкиня нашого Л. С. На том пикнику находилися робочы организации всіх народностей Торонта. Выбор пал на нашу членкиню. 

На таком пикнику в Нью Йорку была избрана Звіздом пикника

Ольга Цисляк

донька нашого менажера. Коли хочете знати, чым отзначатся Ольга, то вам скажеме: Волит говорити по лемковскы, як по английскы, и дома инакше не говорит, лем так, як научылася от мамы и няня. Такых у нас мало.

На обложкі сего календаря поміщена фотография 12 рочного дівчатка из Гарфилд, Н. Дж., по имени Анна Холопий. Єй отец білоросс из Минской губ., мати лемканя, из села Мощанец, пов. Сянок, передова членкиня Л. С., делегатка на Лемковский С’ізд в Олифанті и Пассайку и Народный Конгресс в Нью Йорку. Молоде дівчатко одіте в лемковску одежу, яку носят в Сянночині. Дуже способне дівчатко, декламаторка и танцорка. Ходит в американску танечну школу.

А ту маме нашого маленкого декляматора, котрый выступил на нашом окружном предприятию в Нью Йоркі и приводил полторатысячну публику в такий восторг, што го зо сцены не хотіли отпустити. Бесідує чысто по лемковскы, як бы вчера приіхал зо старого краю. Рок тому назад ище часами плакал, тепер уж перестал плакати, бо ся ганьбит, бо уж му 6 літ минуло. А сын он нашого головного кассира Лемко-Союза, Антона Кані.

Владимир Каня

Єст надія, што наша молодеж найде правильну дорогу до организации и найдеся в свойой организации. С початком 1937 року нашы молоды лемкы скликали первый с’ізд лемковской молодежы, на котром рішытся, ци наша молодеж в силі основати и розвивати прогрессивну народну организацию, ци ніт. Мы віриме, што так, лем нам, старшым. треба им помочы в початках. Як знаме, при конці 1936 року нашы молоды лемкы отновили издание свого “Лемко-Журнала”, и нам старшым треба предплачати тот журнал своим дітям.

Гнат Мадзик, в селі Бортном пов. Горлицы, выдає дочку.

Сінокосы в Бортном.