Зато мы знаме о землі и о людях дуже много. 500 літ тому назад, люде не знали совсім, як земля выглядат, не знали, чом на землі маме зиму и літо, не знали, чом день и ноч, не знали, што земля крутится коло свойой оси и летит коло сонца, не знали Америкы, не знали всіх народов, якы жыют на землі, не знали, сколько сушы, а сколько воды.

Сегодня вшытко тото люде знают. Вшытко точно обрахуване на мапі, в книжках, сегодня люде знают кажду закутину огромной кулі земской. Обрахувана точно поверхность землі, поверхность моря и сушы, обрахуваны люде на землі, оцінены земскы богатства.

Люде привыкли оцінювати кажду річ по том, сколько она може вартати. Землю ищы не оцінили, сколько она вартат, таке то огромне богатство. Около 200 миллионов квадратных миль богатства и то не лем на поверхности, але и в глубину и на высокость. Бо наша земля має около 200 миллионов квадратных миль разом з морями. А нас, людей на той землі жыє около 2 тысячы миллионов (2 миллиарды), то значыт, што на кажду людску душу, на каждого человіка припадат єдна десята квадратной милі поверхности землі, на 10 людей ціла квадратна миля. Правда, мало што не 3 четверти воды, моря, но море тоже богатство, з моря тоже люде черпают богатства и жыют з него. Але коли возмеме лем саму сушу, то и так на 40 людей припаде больше як одна квадратна миля сухой землі, кромі моря.

А чом то земля наше богатство, богатство людей? Бо люде, человік, найвысше, найрозумнійше существо на землі, он газда, хозяин, он завоювал собі місто хозяина на землі своим розумом. Он єден перешол тоту землю от сіверного до южного полюса. Человіку природа дала найвысший розум, розвила найліпше його мозг и тот його мозг, його розум, не перестал рости, розвиватися, а розвиватся дальше.

Даколи жыли на землі огромны существа, такы великы, як домы, но мозгы мали дуже маленкы в пропорции до свого огромного тіла, и не розвиты, были, як то повідают, “якы великы, такы дурны” и тоты великаны мусіли пропадати, а человік их пережыл и стал хозяином землі.

При помочы того ліпшого мозга, ліпшого розума, человік пришол на тото, што хватил в рукы

для свойой обороны и для свойой помочы. Перше орудие была, попросту, дубина, або камень, котрым кинул до сильнійшого звіра, потом уж до дубины примоцувал камень, потом очухал камень и из дубины и такого острого каменя вышол каменный топор. И коли человік увиділ, же чым у него в руках ліпше орудие, то он ліпший опор звіру мог ставити, беспечнійше и ліпше жыти — почал придумувати все ліпше и ліпше орудие, потом начыня и т. д. и так дошол человік аж до тых машын, котры маме сегодня, и при котрих мы стали неоспоримыма газдами землі и продукуєме, вырабляме массово при помочы тых орудий, при помочы машын, што лем нам треба для выгодного жытя.

И тот наш найліпший людский розум, котрый познал богатства земны, выдумал всякы машины для переработкы тых богатств на всякы продукты потребны для людского выгодного жытя, може вырабляти тых продуктов массово, не може поняти лем едного, а то

Знаме, што на 10 людей, жывущых на землі, приходит одна квадратна миля поверхности земской кулі. На 40 людей приходит єдна квадратна миля самой сушы. Так приходилобы по справедливости. Но ци так приходит? Та где там! Такой справедливости ищы люде не придумали. Оно такий поділ землі, жебы каждым 10 людям отміряли 1 четверту квадратной милі сушы и 3 четверти моря и посадили их там, был бы глупый поділ, а и несправедливый, бо єдным припала бы пустка и море без рыб, а другым золото.

Нашом земльом поділилися люде без всякого порядку и справедливости: Кто сколько захватил, столько тримат, покаль му другий не отбере, сильнійший. Сут люде што захватили миллионы квадратных миль, а цілы массы народа не мают єдной пяди. И тоты, што захватили миллионы, тысячы и соткы миль богатства земного заставляют робити на себе миллионны безземельны и малоземельны робочы массы.

Весь порядок світа от непамятных часов так устроєнный, такы завели законы, котры перечат массам народов права на власность земного богатства и на ужываня того земного богатства, лем на столько, сколько они тым массам позволят за их тяжкий труд при розвитю того богатства для упривилегиованых властителей.

Чом мала группа людей має посідати такы огромны земны богатства, а масса народа не має мати ниякого права до тых богатств, люде ищы над тым мало думают. Єдны и другы, богаты и бідны, в большой части, думают, што так має быти, што все на світі была богата и бідна клясса, все были такы, што посідали миллионы миль богатства и все была бідна клясса народа, значыт, так мусит быти во вікы вічны. Така была наука. И сегодня спроситеся не єдного бідака, як он думат о том, то вам повіст, што так было и так буде. Богач, розумієся, вам повіст, што так має быти.

Но а тепер подумайме о справедливости: Она нам говорит инакше. Справедливость нам говорит, што каждый человік, котрый родился на світ, на тоту землю, мал бы мати право до свойой часткы на жытя на той землі, бо земля, то людский маєток.

Чого наша стара справедливость повідат, што як уродится газді дитина, то она має право жытя на том грунті, має свою частку в том маєтку. Земля наша, то великий людский маєток, людске богатство, но миллионы людей родятся на тоту землю и не мают права до земного богатства, не мают права до свойой часткы, бо их часткы тримат єден, двох, трьох упривилегиованых богачов. И жытя масс зависит от той группы “посідателей" земного богатства. В их руках средства до жытя, в их руках средства производства, як робота робочых убольшат их богатства, то они дают якы такы средства для жытя робочому, а як ніт, то никто тым бідным человіком не старатся. Тоты бідны люде, што повідают, што так было и так мусит быти, што богаты были и будут, и бідны были и будут, не думают, их свобода думаня отнята от них фальшивом науком, они того не можут порозуміти, што они понижают себе сами, понижают человіка, яко найвысше, найрозумнійше существо, яко хозяина землі, не доцінюют найціннійше существо на світі, бо сами собі не признают права на жытя, не признают очевидной справедливости. Коли тоту справедливость не признає тот, што захватил богатство, котре належытся другым, то йому ніт што чудуватися, но коли не признає ограбленый зо справедливости и права на жытя, то он забитый, затемненый человік. Такий забитый, затемнений человік повіст и о войні, што она мусит быти, бо войны были и будут. Он того не видит и не розуміє, што война нич инше, лем рабунок, котрого допускатся богата клясса над бідным народом.

Кто думат справедливо, то мусит думати так:

Земля наша, то богатство, котре не належыт специяльно ни до царей, ни микадов, ни султанов, ни князей, графов, Муссолиних, Гитлеров — або специяльно до даякых народов, як німцев, французов, русскых, японцев — кто моцнійший, чорных або білых — а земля належыт всім народам, всім расам, словом, всім людям однаково, каждый человік має єднаке право на тоту землю, єднаке право на жытя, на корыстаня из земных богатств.

Коли люде будут так справедливо думати, то приде тота справедливость.

Коли посмотриме на мапу, то найдеме, што земля поділена на десяткы держав. Каждый культурный народ має свою державу. Менше культурны народы, хоц жыют на землі, но их земля звычайно прилучена до даякой культурной державы, колония той державы. Учат, кажут каждому гражданину такой державы вірити и говорити, што то його держава, його земля, за тоту “свою” державу, “свою" землю он має быти все готовый отдати жытя, боронити єй. А но посмотме, ци они правду учат, ци правда, же тота держава, тота земля власность народа? Возме першу, найбольшу державу на світі. Велику Британию, Англию. Чыя то держава? Английского народа? Но.

Английска держава занимат скоро третю часть всей землі, огромны богатства. Населения має высше одной четвертой всего населения на світі. Сама Англия невеличкий островок, ани третя часть Польшы, около 50 тысяч квадратных миль. Но английскы королі, лорды и богаче при помочы английского народа, котрого тепер около 40 миллионов, потрафили заграбити третю часть всей землі. Свой народ учыли, што они добывают тоты світовы богатства для него, для английского народа. Но што сегодня видиме? Што тоты английскы капиталисты, английскы лорды, купці, фабриканты, взбогатіли пару десят раз, нагромадили огромны богатства, а бідный народ, котрый лял свою кров за добытя тых богатств, тых колоний для Англии, остался такий бідный, як был перше без тых колоний. Миллионы бідных робочых мусят робити за марны центы, котрых им не выстарчат на скромне жытя, а другым миллионам мечут по пару центов жебранины, жебы могли заспокоити голод. Фармеры не можут наробити на податкы. А чом так? Бо тоты богатства, якы добыл и наробил английский народ, находятся в руках английскых фабрикантов, лордов и шляхты и обеспечены за нима законами их державы. А раз законы державы обеспечают за нима тоты награблены с колонияльных народов и зо самого английского богатства, то ту ясно, што Англия не народна держава, а держава богатой кляссы, што тота земля, тоты колонии той богатой кляссы, бо она тягне з них корысти и богатства. Английский народ який был бідный, такий и остал, и остане так долго, покаль не порозуміє той несправедливости, яка ся му діє.

Памятаме в старом краю, сколько то полякы наплакалися за свойом Польшом и напросилися бога и матку боску, штобы им вернула независиму Польшу. И проляли полякы кров за тоту “свою” Польску. Но ци польскому народу ліпше стало, як перше? Ищы горше, бо тота польска земля не його, а польскых панов, законы той Польшы не народны, а панскы, то панска держава, держава богатых.

Японці воюют Китай, италийці Абиссинию, но они воюют тоты землі не для себе, а для своих богатых клясс. Натура богатой кляссы світа, природа капитала така, што он мусит брати, мусит грабити. Коли уж бракує новых земель, новых колоний, то капиталистичны державы будут грабити єдна другу, як уж зме виділи страшный примір такого рабунку в страшну світову войну. Подготовляют тот рабунок ищы страшнійший, страшнійшу войну, бо они мусят брати и ділити землю и єй богатства, якжебы она была ничыя. А такыма новыма кровавыма переділами земля не богатне, а бідніє, а тым самым бідніют люде, бо земля людске богатство, до котрого мают всі люде природне право, лем они того права не розуміют ищы и от того вся біда на світі, войны, голод, нужда.

Даколи люде не знали сколько той землі, як она выглядат, сколько на ней людей, не знали єдны о другых. Тепер вшытко тото уж знают. Знают сколько землі урожайной, сколько лісов, знают даже менше больше, сколько в землі находится ужыточных минералов. Учены люде сегодня знают так нашу землю, як газда, фармер, знає свой грунт. А ищы ліпше знают, бо газда знає лем поверха, а они знают и под землю. Машина, пароход, аероплан зменшыл тоту землю так, што, коли пару сто літ тому назад треба было місяц, тепер зробит тоту дорогу за день. За тыжден цілу землю мож опасати. Земля, якбы сама меншалася и напроваджала нас на думку, штобы перемінити газдовку єй богатствами, штобы єй не ділити, бо вшытко єдно, хоцбы як ділил, то тот поділ не буде справедливый, бо то поділ рабунковый, не в интересі людей, а в интересі богатой кляссы, кучкы рабовников.

А маме мы тот народный общий плян господаркы земныма богатствами, в интересі и для добра всіх людей?

Як нашлися учены люде, котры вынашли, што земля округла куля, што она крутится коло сонця 30 километров на секунду, як нашлися люде, котры выміряли поверхность землі, так само нашлися учены люде, котры вынашли и тот плян для господарства на землі, для общого добра, в интересі всего людства.

До сего часу господарят добром земскым капиталисты, господарят без всякого взгляду на людей и на их земскы богатства. Господарят каждый зо своим пляном. А тот плян у каждого из них лем про него самого и ціль того пляну: якнайскорше и найбольше взбогатитися, накопити якнайбольше богатства для себе. В средствах не переберают, взгляду тоже ниякого ни один на другого, ни массу народа, не мают. Поможе до взбогаченя война, убийство миллионов, най буде война и убийство миллионов. Поможе взбогачыню рабство миллионов, най будут миллионы рабами. Поможе знищыня доробку миллионов, треба знищыти тот доробок. Поможе их взбогачыню голод и нужда миллионов, най буде голод и нужда. Поможе нова религия, або перекручыня старой, треба запровадити нову, або перекрутити стару, а не вірующых в такого бога, як они кажут, треба вынищыти, вымордувати. Треба для богатства затемнити людей, знищыти прогресс и науку, перекрутити, выкривити людску душу, они все готовы. И тота дорога отчызна, о котрой они говорят и учат, так долго она для них дорога, покаль их робит богатыма, але коли приде им упустити дашто из свого богатства для той отчызны, то не хотят уж єй знати.

То их плян и их ціль.

Народный плян и народна ціль лем одна: Штобы выжыти на світі, штобы не быти голодным, штобы не боятися все за жытя, за завтра, што я буду істи, што я буду робити, ци я не страчу службу, ци я не страчу роботу. Народный план, то плян забеспечения права на жытя, забеспечения роботы.

И коли єст таке богатство велике, як земля наша, и сут такы орудия для розработкы тых земных богатств, коли сегодня каждый сліпый видит, што продуктов и всякых потребных річей можна выробити такыма машинами, што для каждого буде под достатком, то нич ту не брак, лем справедливости, штобы господарка тыма богатствами велася в интересі людей.

Єст плян такой господаркы? Єст такий плян, и така господарка земныма богатствами называтся социялистична господарка, або коротко:

Слово социялизм, социялистичный походит от латинского слова “социус” — общий, вспольный, а тоже товариш. Социялистична господарка земныма богатствами, то значыт вспольна, обща господарка, где власность на землю, орудия, копальні, фабрикы, машины, словом всі средства производства, обща, народна, социялистична. Така социялистична господарка уж существує на одной шестой части землі, в Сов. Союзі. Там социялистична власность, народна власность на землю, на копальні, фабрикы, заводы. И ціла газдовка тыма богатствами ведеся не в интересі, для взбогачыня єдиниц, а в интересі всего населения, всіх граждан Сов. Союза. Но о Сов. Союзі и о успіхах той новой, социялистичной господаркы поговориме при остатку, а тепер будеме старатися порозуміти тоты новы слова, што относятся до той господаркы, котрыма то словами нашы патриоты любят нас страшыти, яко словами страшныма, грішныма. Розумієся, што для них не тоты слова страшны, а страшне пробуждение народа и порозумление значения тых слов, и зато стараются настрашыти словами, як даколи погане страшыли народ словом християнин, потом християне словом єретик и т. д.

Тоты слова, котрыма они нас страшат, то коммунизм, коммунисты, совіты, большевикы и т. д. То вшыткы тоты слова, котры относятся до той новой, народной, справедливой, социялистичной господаркы земным богатством, в интересі народа.

Слово социялизм, социялистичный уж, як видиме, не таке страшне, як коммунизм, коммунистичный. До того першого слова уж привыкли, то раз, а друге, што тота партия, котра называтся социялистична, не страшна уж тепер, як была даколи, а страшна партия коммунистична. Чом, то увидиме дальше. Найперше социялистичный и коммунистичный, то праві тото само значыт, бо “коммон” по английскы значыт тоже вспольный, общий. Однако учены социялисты установили таку рижницу меж социялизмом и коммунизмом, што социялизмом зовут нисший, а коммунизмом высший степень социялистичной господаркы. Перший степень социялизма, то початок социялистичной господаркы, коли народ, робочы, бідны люде або пролетарият, преберают державу в свои рукы из рук капиталистов и заводят свои социялистичны порядкы с помочом и силом своєй диктатуры. Розумієся, што капиталисты добровольно власти не отдадут и треба им єй вырвати. Робоче правительство мусит боротися с буржуазиом, котра буде старатися отняти державу народу, и зато робочым треба сильного правительства, диктатуры, котра має за ціль зламати не лем буржуазию, але и всі тоты стары капиталистичны, буржуазны навыкы, новом социялистичном школом, науком, прессом. При первой степени социялизма, при власти робочых и селян и борбі з буржуазно-капиталистичныма елементами, треба наладити социялистичну индустрию и єй продукцию. Но не всі робочы выдают однакову продукцию, єдны выдают больше, а другы менше продукции — єдны выдают ціннійший продукт, а другы дешевший. При первой степени социялизма, при социялизмі, не каждый робочий, ци он менше ци больше выробит, достане єднаку заплату. Каждый достане таку заплату, сколько выробит для общества, по своим способностям. Сколько он дає для социялистичного общества, для социялистичной державы. Сколько выробит, столько платят. Большы таланты, котры отдают социялистичной державі больше плода свойой роботы, получают больше. Они причыняются своима талантами до скоршого роста вспольного богатства больше, як другы. Тот степень социялизма тепер в Сов. Союзі, што каждый получат плату по заслугам для того общества. Правда, и капиталисты платят тым робочым ліпше, што больше выробят, но при капиталистичной системі труд робочого иде для взбогачыня капиталиста, а там иде для взбогачыня общества, бо державне богатство — то богатство всіх граждан, общественне богатство.

Коммунизм, то высший степень социялизма, коли людство позбудеся всіх капиталистичных привычок, капиталистичной душы, а богатства земны, с помочом техникы, будут так розроблены, так буде розвита массова продукция, што для каждого человіка буде под достатком всякого продукта. Возможно то? Видиме в Америкі, што возможно, мож выробити, выпродукувати, для каждого дост. При коммунизмі уж и роспреділ продуктов буде инакший, бо раз каждого продукта буде под достатком для каждого, то каждый получит дост, мимо того, што не каждый однаково може выробити, бо все буде так, што єдны люде бутут больше способны, а другы менше способны. Втоды каждый буде робити для общества по своим способностям, а буде получати по своим потребностям. Коротко: Социялистичне господарство, то переходне господарство от капитализма к коммунизму. При социялистичном господарстві уж всі средства производства, средства продукции, в руках цілого общества, вспольна влясность всіх людей, а не єдиниц. Приватной власности на землю, копальні, фабрикы, машины уж ніт. Но каждый член того социялистичного общества, соц. державы, достає за свой труд по своим способностям, по оцінкі, сколько он выдаст продукции свого труда для общества. Рижниця што до труда в капиталистичной державі и социялистичной така, што в капиталистичной державі робочий взбогачат своим трудом єдиницу, капиталиста, а в социялистичной взбогачат ціле общество, а тым самым сам себе. Коммунизм приходит аж втоды, коли тото общество, через свой общий труд так взбогатне, што буде дост вшыткого для каждого члена общества.

Таку учены социялисты кладут рижницу меж социялизмом и коммунизмом, и повідают, што аж при коммунизмі буде людска правда и справедливость на світі, аж при коммунизмі земскы добра будут справедливо розділены по меж всіх людей, каждый человік буде ужывати земных богатств неограничено и для каждого старчыт. Тот час, розумієся, ищы далеко, але социялизм, социялистична держава, то первый степень, первый период тых часов.

Ци жыли даколи люде на землі социялистично-коммунистично? Первобытны люде жыли коммунистично, то значыт, што всі средства до жытя мали общы, кромі даякой одежы, оздобы тіла. Знаме, што коли европейці пришли в Америку и почали ділити землю, то индияне собі смішкы з их порядков робили, што они ділят землю. Индияне не могли порозуміти, як то можна землю ділити. Они уважали землю за общу власность всіх людей. Ищы сегодня маме первобытны индийскы племена в Южной Америкі и в Австралии, котры жыют по коммунистичному. Но тот их коммунизм не научный, они жыют в коммунизмі з мусу, бо каждый сам за слабый, штобы придбати, выдерти природі столько, штобы мог жыти. Всі разом мают больше силы вырвати от природы средства для жытя. Поєдинчо каждый так слабый, што мусіл бы пропадати. В такых социялистичных громадах, обществах, жыли всі первобытны люде. Но коли люде придумали ліпшы орудия, коли при помочы тых ліпшых орудий могли собі и поєдинчо выдобыти жытя от природы, почали жыти штораз больше поєдинчо, индивидуально. Сильнійшы меж ними порабочали слабшых и запрягали до роботы на себе. Существувати тота первобытна коммуна не могла зато, бо средств до жытя все недоставало, так што сильнійшы подъідали слабшых, и коли человік почул себе всилі, при помочы ліпшого орудия добыти собі сам жытя, ишол сам. А ити было где, бо земля была велика, людей мало.

Першы християне жыли тоже в коммуні. То так званый коммунизм религийный, сектарский, фундаментом його не была наука и продукция, а религия и обща “трапеза", потребление. Знаме из библии, што першы християне зносили весь свой маєток в коммуну, всьо было обще. (в английской библии “коммом”). Знаме, што Анания затаил половину свого маєтку пред апостолом Петром. Чом затаил? Зо страху, што той християнской коммуні бракне того общого маєтку, што зідят, прожыют и им не остане нич, тай мусят голодувати. С того страху пред голодом, Анания затаил половину на чорну годину. Ту маме найліпше доказательство, што така коммуна, в котрой єст страх, што средств до жытя бракне, существувати не може, хоцбы яка горяча віра у членов была. Ту головно росходится о обеспечение членов средствами для жытя, таке обеспечение, штобы всі певны были, што тых средств до жытя им николи не бракне. Таке обеспечение могла им дати лем высоко розвита продукция средств до жытя, индустрия и техника, а не религия. Потому позднійше християнство откинуло першу точку программы християнства, головну точку християнской религии, коммуну, оставившы лем обычай общой “коммунии” на памятку коммуны первых християн. Церков християнска пошла на службу богатой кляссі. Правда, остали секты християнскы, котры хотіли затримати коммунистичне жытя, як першы християне, но то были уж страшны еретикы. В русской православной церкви такыма еретиками были духоборы, котры мусіли спасатися массовом емиграциом в Канаду перед гнівом царя и його церкви. Пару такых християнскых сект появилося в Англии, откаль вышли в Америку, переслідуваны державом и єй церквом, и почали жыти ту по коммунистичному. Но як и первы християне, як всі первобытны коммуны, розлізлися по причыні слабого фундамента.

Ищы греческий философ Платон мечтал о такой державі, где будут всі ровны и написал книжку о такой державі. Но Платон признавал тото равенство в той свойой “Державі Ровных" лем для т. з. свободных граждан, а не для рабов. Рабы должны были працувати на свободных граждан в той його “державі ровных". Чудуватися тому ніт што, бо рабство втоды было так вкоренене, што не лем Платону, але никому не могла прити в голову мысль освобожденния рабов.

Первым утопистом-коммунистом, котрый признал ровность и справедливость для всіх людей на світі, то был Томас Мор, лорд канцлер Англии, казненый английскым королем Генрихом VIII, в 1535 року. Якраз минуло 400 літ от його смерти. Из одной стороны обходят 400 ювилей його смерти коммунисты, як первого коммунистичного писателя, пострадавшого за коммунистичну идею, за идею ровности и справедливости, а из другой стороны папа римский, Лев XIII, причыслят го к лику святых, а теперишный папа канонизує (19 мая, 1935).

Томас Мор, взрушеный страшным положением и нуждом селян и безработных в Англии, написал книжку п. з. “Золота книжечка о ліпшом устройстві державы и новом острові Утопия”. “Утопия" греческе слово, зложене из двух слов: “у" значыт ніт, а “топос" місце, значыт місце, якого ніт. Значыт и того острова “Утопия”, котрый описал Мор, не было, но он хотіл представити такий остров, таку державу, где тота справедлива система людского жытя, справедлива держава, где всі мают ровне право на жытя, существує, як она має выглядати. В той книжечкі Мор представлят, як мают выглядати такы справедливы коммунистичны товариства, громады коммунистичного общества, организованного на основі справедливости людства.

Но Мор думал, што такий порядок заведе сама пануюча клясса, король и його министры, так зо свого доброго сердця. Он думал, што каждого повинно так сердце боліти на вид нужды и біды бідного народа, як його сердце болит. В борбу бідного народа за справедливость он не вірил и не хотіл такой борбы, кляссовой борбы.

Томаса Мора присудил королевский английский суд к страшной смерти: “Влечы по земли через Лондон до Тибери, там його повісити, але так, штобы не умер совсім, зняти ищы жывого, отрізати половы органы, роспороти, вырвати внутренности и спалити их. Потом розрубати тіло на 4 части и по єдной прибити над 4 воротами города а голову выставити на мості". Король уласкавил Мора так, што приказал лем отрубати голову.

Так обходилися з людми, котры мали мягке сердце для бідного народа и хотіли поправити його долю, хотіли справедливости.

Книжка Томаса Мора о том справедливом устройстві людского жытя на острові "Утопия” мала велике влияние на позднійшых социялистов.

Найбольше социялистичных писателей родила Франция в 18 віку, но ни один из них не дал, не выробил пляну, як дойти до социялистичного-коммунистичного устройства общества, не дали научного социялизма. Писали против существующого несправедливого порядку на землі, требовали справедливого устройства, но думали, што то само собом приде.

Научный социялизм-коммунизм дали нам Маркс и Енгельс в своих сочинениях, потому тот научный социялизм называют тоже “марксизмом”. Маркс найперше изучыл капиталистичну систему, познал єй совершенно, нашол и доказал, што тота система має такы противорічия, што она, розвившыся до найвысшой степени, стягне на людство страшный кризис, котрый буде концом капитализма. Но ниякым способом не можна сподіватися, што богата клясса змінит сама, добровольно капиталистичну систему, коли тота система окажеся до ничого, на социялистичну, справедливу систему. Богата клясса буде старатися за всяку ціну удержати капиталистичну систему и потому бідному народу, робочым, пролетариату (робочой кляссі) треба выступити организовано против капитализма, через революцию взяти власть в свои рукы из рук капиталистов и почати будову социялизма, справедливого устройства на світі. Послі опанованя бідным, робочым народом, пролетариятом, цілого світа з земныма богатствами, послі уничтожения богатой кляссы, буржуазии и єй институций, буржуазной наукы, привычок и идеологии, послі установления социялистичной господаркы и массовой промышленной и земледільской продукции при помочы новой техникы, приде до коммунистичного, справедливого жытя на землі, всі люде будут ровны, не буде клясс, всі будут мати дост вшыткого, што им треба для выгодного жытя, будут жыти счастливо, без воен, без выдераня єден другому, не будут потребовати правительства, котре потребне сегодня лем нато, штобы охраняти єдну кляссу пред другом.

Маркс и Енгельс виробили плян и руководство для пролетарията, для бідного народа, як через организацию и борбу з богатом кляссом, с капиталом, повалити капитал, захватити власть в свои рукы и положыти фундамент социялизма. Предвиділи они пролетарску революцию и предповіли єй, однако в промышленной державі, як Англия або Германия, где пролетарият чысленный и где скоро можна буде наладити взяту от капиталистов промышленность на социялистичный лад и почати массову продукцию не для заробков єдиниц, а для ужытку народа.

Маркс и Енгельс не дочекалися побіды пролетарской революции ни в одной державі.

Маркс и Енгельс основали перву межнародну (интернациональну) коммунистичну организацию и выробили для ней программу, п. з. “Коммунистичный Манифест" (1848).

I Интернационал (1864—72) принял науку Маркса и Енгельса (марксизм) за программу межнародного пролетарията и сотворил робочы партии. II Интернационал (1889) об’єдинил тоты партии. Но II Интернационал отступил от наукы Маркса, от программы революции и диктатуры пролетарията. Лидеры II Интернационала почали учыти, што без революции и диктатуры пролетарията обыйдеся, што до социялизма можна дойти реформами, парламентаризмом. Маркс учыл, што робочы должны боротися всіма силами против войны. Лидеры ІІ Интер., коли пришла страшна світова война, зрадили робочу справу и повели робочых одной империялистичной державы, против робочых другой империялистичной державы. Найсильнійша социял-демократична німецка партия стала патриотичном, кайзеровском партиом.

Русска социял-демократична партия, што до чысла, была слаба партия, бо в России была слабо розвита индустрия, было процентово мало индустрияльных робочых. Но она мала найбольше идейных и завзятых лидеров, котры держалися точно наукы Маркса и Енгельса. Найспособнійшым вождем русскых социял-демократов был Николай Ленин (Владимир Ильич Ульянов). Он не лем держался наукы Маркса и Енгельса и их программы, але и розвил их науку в своих сочинениях. Розумієся, што и в русской соц. дем. партии находилися реформисты, значыт такы социялисты, котры отступили от наукы и программы Маркса пролетарской революиции и диктатуры пролетарията. С тыма Ленин завзято боролся. Уж на II съізді русс. соц. дем. партии (1903) пришло до несогласия меж Лениным и Мартовым. Но за Лениным было большинство делегатов, за Мартовым меншинство. Уж от того часу почали называти єдных большевиками, другых меншевиками. Потом пришол цілковитый розрыв меж єдныма и другыма, так што русска соц. партия поділилася на дві партии, на большевиков и меншевиков. Большевикы стояли за пролетарску революцию и диктатуру пролетарията, за программу Маркса и Енгельса, меншевикы з II интернационалом, за дорогу реформ. Вождем большевиков был генияльный Ленин.

Коли пришла світова империялистична война, то из всіх, т. з. робочых социялистичных партий світа, лем русска партия большевиков поставилася против империялистичной войны и призывала робочых замінити империялистичну войну на войну кляссову, на революцию. Ленин, котрый находился в Швейцарии, в своих статьях в робочых газетах и брошюрах выступал против здрады II Интернационала и його лидеров и призывал світовый пролетарият до революции. Но його голоса не слышали робочы зо за гуку армат. Лем послі буржуазной февральской революции в России 1917, русскы робочы, селяне и солдаты на фронті, услышали голос свого великого лидера, Ленина. В октябрі того самого року русскы робочы и селяне, под лидерством Ленина и большевиков, вырвали через пролетарску революцию власть и Россию из рук буржуазии — капиталистов и поміщиков. Вся державна власть от буржуазии перешла народу, в рукы избраных ним совітов.

Шеста часть світа перешла из рук богатой кляссы в рукы бідного народа и она находится в його руках по сей день. Але яка велика рижниця зашла в газдовстві и розвитю земных богатств той страны! Но о том на другом місті.

Чуєме тоты два слова и уважаме, што слово “социялизм” менше страшне, а слово “коммунист" больше страшне, хоц тоты оба слова праві же єдно означают. Треба нам знати, што даколи так само страшне было слово “социялист", як и “коммунист”, но с часом пред словом “социялист” стратили всякий страх, а стало страшне слово “коммунист". Так слово социялист перестало быти от того часу страшне, отколи II Интернационал откинул революцийну программу Маркса, а принял программу реформы. Тота часть социялистов, што не отступила от программы Маркса, штобы отрижнити свою партию от реформистов, назвала єй коммунистичном партиом. А што не хотіла мати нич с II интернационалом и його роботом, основала III Интернационал (4 марта 1919 в Москі), Коммунистичный Интернационал, або коротко Коминтерн, котрый тепер не дає спати світовой буржуазии.

Социялисты и коммунисты до той самой ціли идут, значыт, до справедливого устройства на світі, до забраня богатств землі от богатой кляссы на власность всего народа, до социялистичного господарства, до вспольного, общого, коммунистичного ужываня тых земных богатств всіма людми, справедливо. Но социялисты выбрали собі иншу дорогу, а коммунисты иншу дорогу до той єдной ціли. Социялисты повідают, што они дойдут до той ціли повольном дорогом выборов и реформ. Приміром в Америкі они выберут собі социялиста президента, социялистов сенаторов и социялистичных конгрессменов и тоты заведут в державі социялизм, отберут при помочы новых, ухваленых законов, богатства от капиталистов и почнут социялистичну газдовку в интересі всего народа.

Коммунисты повідают, што таком дорогом николи до социялизма не дойде, бо богатство в руках капиталистов, то велика сила. При помочы свого богатства они ставлят таке правительство, як они хотят. Учат так народ, як они хотят, як им выгодно. В их руках держава, в их руках пресса, в их руках школа, в их руках уряды, в их руках войско, полиция, церкви, всі средства жытя и средства наукы. Через тоты средства они диктуют массі народа. У социялистов ніт ниякых средств для наукы, для освідомления цілой массы народа. Всего можут освідомити и организувати передову группу робочых, а робочы той группы будут учыти и освідомлювати дальшы робочы массы, и оно приде так, што капиталистична система и капиталистична держава, через капиталистичный кризис ослабне, нужда бідного народа так взросне, што организованы робочы, оперты на бідны массы народа, через революцию, захватят власть в державі и заведут социялистичный порядок.

Сегодня уж маме два порядкы на світі: капиталистичный и социялистичный. Капиталистичный порядок, то такий порядок, таке державне устройство, што богатства земскы, средства производства, средства жытя народа, находится в руках єдиниц, малочысленной богатой кляссы. В руках той кляссы и державна машина. В тых державах приватна власность на земны богатства неограничена. Один або пару людей можут посідати и половину державы. Они посідают копальні, фабрикы, всю индустрию, великы земельны посілости. Правда, часть землі находится в руках бідных газдов, селян, але на тых своих грунтах не можут выжыти, не можут конкурувати з великими земскыми посілостями, котры обрабляются машинами. Нова техника, машины выкидают из индустрии массы робочых, котры не можут найти другой роботы. Селянске бідне население множытся и голодує и не має ниякых видов на будучность, пролетарият в капиталистичных державах росне.

Одна шеста часть світа, Сов. Союз, находится в руках народа. Право на приватну власность на средства производства и на землю уничтожене пролетарском революциом и пролетарскым правительством. Сов. Союз одинока социялистична держава в світі, держава, о якой мечтали бідны люде віками, о котрой мечтал Томас Мор и много другых людей, справедливого, мягкого сердця. Она будуєся ведля того пляну и той программы, яку выробили генияльны люде, учытелі нового, справедливого социяльного порядку, великы вожды бідного народа, в єго борбі за ліпше, справедливше жытя: Маркс, Енгельс, Ленин, Сталин.

Ци ліпша тота держава от капиталистичной? Ци ліпша там народна справедливость, як в капиталистичных державах?

Тоты вопросы мучат каждого робочого. И каждый робочий должен найти правдивый отвіт на тоты вопросы.

Штобы мы лекше могли найти отвіт на тоты вопросы, присмотмеся ліпше нашой Америкі, найбогатшой капиталистичной державі світа, а потом той первой социялистичной державі, Сов. Союзу. Поровнаме потом єдну и другу. Розсудиме безсторонно и найдеме отвіты на тоты вопросы.