Чым стал Л. С. для нашого народа, повідают нам його члены на другом місті той памятной книжкы, где они отповідают на вопрос, длячого стоят членами Лемко-Союза, длячого платят добровольно за газету “Лемко”. Бо Л. С., то перва карпаторусска организация, в котру нашы люде стают членами без даякых обіцанок посмертных роскошов або материальных личных корыстей за житя, а з любви к свому народу, з любви к просвіті, прогрессу, культурі.

В Лемко-Союзі и коло него скупилася найліпша, найсознательнійша часть нашой емиграции в Америкі і Канаді, а через то Лемко-Союз стал мозгом нашого народа, стал його природным руководителем в найважнійший час житя народов, коли рішатся их судьба. Без такого руководителя наш народ был бы страченый в сегодняшнем світі, як народ сліпый. Л. С. стал нашым зрінием, через тоту свою организацию мы стали зрящым народом.

ТЕОДОР КОХАН первый председатель Л. С.

Десять літ тому назад наш народ на емиграции не мал свого народного руководства, бо його церковны и запомоговы организации такого руководства му дати не могли, бо они не были организованы для культурного поднесения народа и политичного руководства, а для бизнесу и бизнесовой конкуренции, и уж длятого самого не могли утворити єдного руководства. Сознательнійшы нашы люде были рострачены по тых организациях, не могли найти вспольного языка, вспольной народной программы для народного руководства. Таке руководство могла утворити лем чисто народна организация с таком прогроммом, котра могла скупити всіх тых идейнійшых, сознательнійшых бескорыстных людей из всіх другых организаций, штобы они нашлися в большинстві. Лем в єдной нашой организации тоты передовы люде в большинстві, и длятого она може полнити свою роботу честно, идейно, лем длятого она стала природным руководителем народа, длятого єй наука ширится, длятого она могла дойти до той силы, яку сегодня має, до будовы свого культурного центра, до того великого вплыву на корпаторусскы народны массы.

ЯРОСЛАВ КОБАН бывший предсідатель Л. С.

Лемко-Союз народный руководитель не по даякой программі, по статуту. Программа, статут Л. С., то лем средство для скуплення ліпшых, честнійшых, идейнійшых людей в организации. Наша программа, наш статут говорит, што в нашой организации немож рахувати но даяку личну корысть, што корысть приходит лем цілому народу. Наша программа не обіцує за услугы, за жертвы, за роботу ни житьовых ни посмертных нагород для поодинокых членов, лем для цілого народа. И длятого в нашу организацию приходят в большинстві лем такы люде, котры хотят помочи свому народу.

Лемко-Союзу можут не признавати руководящей ролі руководителі запомоговых и церковных организаций, можут вдоволь выступати против нашой организации, клеветати и доносити на ню. Тото не лем не змінят того факта, што Лемко-Союз народный руководитель, а якраз доказує тот факт. Бо коли наша организация не была бы такым руководителем, они бы даже не интеросувалися ньом.

МАКАРИЙ ГЕРЯК бывший предсідатель Л. С.

Значит, на Л. С. смотрят як на народного руководителя не лем його члены и приятелі, але и його неприятелі и тоты неприятелі поборюют го всіми способами, чым лем доказуют, што он стал руководителем и просвітителем карпаторусскых народных масс.

Розумієся, што их усилия побороти народну организацию даремны, бо єй сила природна. Л. С. черпат свою силу с карпаторусскых народных масс, он родился з народа и операт всю свою роботу на народі и для народа, и длятого всякы усилия його неприятелей побороти го-даремны.

Початок Лемко-Союзу дали новы повоєнны емигранты в Канаді 1929 року, в Виннипегу, где они при конці января, съіхавшися на зиму с фарм, зышлися у старшого емигранта Теодора Кохана и основали первый отділ Л. С. Теодора Кохана выбрали предсідателем отділа. Газета “Лемко” уж в тот час выходила, яко місячник, в Филаделфии, так што уряд того первого отділа прислал в газету протокол основания первого отділа и призыв до лемковской карпаторусской емиграции в Америкі основувати дальшы отділы. Дальшы отділы основувалися около газеты “Лемко”. Другий отділ в Газлетон, третий в Детройт, четвертый в Нью Йорку, пятый в Акрон и т. д. Найсильнійший отділ Л. С. из початковых отділов организували лемкы в Кливланд, Огайо, ч. 6, в том самом, 1929 року, где жило и групповалося коло православной церкви много лемковскых емигрантов. Найбольше потрудилися при организации того отділа Михаил Баволяк, родом из Котани, ясельского повіта, послі другий зряду головный предсідатель Л. С., — Стефан Ткач, родом из Устя Русского, горлицкого повіта, первый головный финансовый секретар, Юлиян Федак, родом из Мшаной, кроснянского повіта, первый головный кассир организации. Отділ в Кливланді организувался коло православной церкви, даже настоятель той церкви, о. Капанадзе помагал спочатку в том переконанию, што то буде така сама организация, як и другы — церковны и запомоговы, под контрольом духовенства. Нич дивного, што отділ спочатку дошол до 180 членов, с о. Капанадзе, яко почетным предсідателем. При таком отділі Кливланд стал природным центром, подставом дальшой организацийной роботы. А што газета “Лемко” была органом организации и в Кливланді было найбольше предплатников, с початком 1930 року редакция “Лемка” было перенесена из Филаделфии в Кливланд, где почала газета выходити каждый тыждень.

МАРИЯ ПЫРЧ бывша місто-предсідателька Л. С.

Но печатание газеты в чужой типографии стоило много, поверх 100 дол. каждый н-р лем сама печать, што значит, што 50 н-ров рочно, лем сама печать стоила бы 5 тысяч долларов, кромі оплаты почты, поміщення для редакции и т. д. А предплатников было всего якых 1,200, то значит, приходило с предплаты всего около половины того, што стоила сама печать. При такой господаркі редактор, котрый сам отповідал за газету, удержати газету не мог.

И ту пришли с помочом сознательнійшы кливландскы члены, они зложили безпроцентну пожичку по 50 и 100 дол. для покупкы потребных машин для печатания газеты. При своих машинах, при помочи другых отділов она уж могла, з бідом, выходити, покаль организация не вскрипнула настолько, што была всилі перебрати издание свого органа на себе.

ЮСТИНА ХАЛОПИЙ бывша місто-предсідателька Л. С.

Первый рок тыждневого издания газеты для редактора был найтруднійший. Каждый собі може представити тоты трудности, коли пришло предплаты около 2,300 дол., а с того треба было заплатити поміщение, роботника, папер, а ище треба было и раты за машины сплачати. 3 великыми трудностями, с помочом ліпшых членов кливландского отділа, удалося дотягнути “Лемка” до конца року 1930, яко тыжневу газету, а тым самым, при помочи газеты, укріпити пару отділов, собрати коло газеты ліпшых нашых людей на емиграции. Был такий час трудный, што сами кливландскы члены стратили надію на успіх их роботы. Тым больше, што коли о. Капанадзе познал, што Лемко-Союз не буде церковном организациом, а культурно-просветительном, народном, што “Лемко” не така газета, яку духовенство хотіло мати, выступил против Л. С. и кинул на него и на “Лемка” “проклятие”. Из 180 членов не остало ани половина. Но тота оставша половина была уж тепер сильнійша, як цілы 180.

Спочатком 1931 року Лемко-Союз уж мог созвати съізд, штобы приняти устав организации и выбрати правление организации. Первый съізд был созваный предсідателем, котрый был выбраный первым отділом Л. С. в Виннипегі, Теодором Коханом и тымчасовым секретарем Л. С. Д-ром Пыжом, на 22 февраля 1931 в Кливланді.

АННА КОНОНЧУК місто-предсідателька Л. С.

В том первом съізді не приняли участь всі отділы, якы до того часу уж существовали. Не было ниякого представителя уз Канады. С того первого отділа в Канаді, в Виннипегу, остался уж лем сам предсідатель, всі рядовы члены розъіхалися за роботом, за куском хліба.

В первом Кливландском съізді приняли участь лем три отділы Л. С. Кливландский, Акронский и Детройтский. Но тот съізд был уж тым важный, што он был первый, што принял устав организации, выбрал правление. До того первого съізда урядникы кливландского отділа вели роботу головного провления.

На том первом съізді головным предсідателем был выбраный Михаил Баволяк, котрый выбрал чартер для организации в Огайо стейті.

Издание газеты осталося дальше на голові редактора. Но съізд постановил помочи изданию через собирание пресс-фонда.

ГЕОРГИЙ ШУФЛЯТ предсідатель Л. С.

Правду сказати, до того первого съізда наша организация выглядала лем штоси тымчасове, як тот первый отділ в Виннипегу, як и другы нашы карпаторусскы организации того рода, котры были початы, но скоро росходилися и заспали. Такы организации починали выдавати газеты, но такы газеты по року — полтора переставали выходити. Мало кто тому вірил, што нашу организацию и газету чекат ліпша судьба. Найменьше тому вірили нашы стары патриоты, котры сами нераз пробували, и то в ліпшы часы, коли наш народ ище вірил в успіх даякой организации. В тоты часы наш народ стратил тоту віру в организацию, и длятого тот початок был такий трудный. Треба было отбудовувати народне довірие до народной организации, треба было тяжко попрацувати початковы рокы, штобы утримати газету и убідити людей в честном ведению организации, треба было усувати от организации тых людей, ку котрым народ не мал довірия.

Тота задача, частично, была выполнена за час меж первым и другым съіздом Л. С., так што на другом съізді в Питтсбургу уж были представлены не лем Огайо и Мичиган, но всі восточны штаты, где жиє наша емиграция. Делегаты отділов были выбраны по уставу организации.

Другий съізд Л. С. был созваный на день 11-го февраля 1933 в Питтсбургу. Съіхалося около 30 выбраных делегатов отділами в Мичиган, Огайо, Пеннсилвании, Нью Джерзи, Нью Йорка, Коннектикот. Тоты люде уж познали, што наша организация не тымчасова, што она не иде на убыток, а розвиватся, кріпне. Найважнійше, што зробил Питтсбургский съізд, то тото, што он перебрал ціле господарство, издание газеты на организацию и выбрал менажера для ведения того господарства. На том съізді организация почула себе в силі вести господарство сама и платити редактора и менажера. Предсідателем Л. С. был выбраный Ярослав Кобан, менажером Антон Цисляк.

Д-р СИМЕОН ПЫЖ ген. секретар Л.С. и К.Р.А. Центра.

От того съізда, от февраля 1933 року наша организация почала быти правдивом народном организациом зо своим народным господарством, свойом печатньом, своим власным органом, и своими двома платными урядниками. Дакотры делегаты того съізда обавялися, ци организация найде столько средств, штобы сама могла вести своє организацийне господарство, но як видиме, их обавы были не на місті. До слідуючого съізда мы не лем покрыли свои росходы доходами, а сплатили часть долга, який тяжил на типографии. Каждый мог видіти, што организация росне и розвиватся, основуются новы отділы, приходят новы члены, всі нашы ліпшы люде, котры уж стратили надію на успіх меж нашым карпаторусскым народом народной организации, наберают віры, приходят в Лемко-Союз, помагают в народной роботі.

Третий съізд Л. С. отбылся в Юнкерс, Н. Й., 13 мая 1934 року. В том съізді приняло участь два разы столько делегатов, як в питтсбургском съізді. На том съізді была представлена уже и Канада. Был росширеный и поправленый устав организации, было постановлено додати ище єдного платного урядника, головного секретаря организации, котрый бы был заразом другым редактором, абы такым способом поширити организацийну и культурно-просвітительну роботу посредством лекций и росширения издательства. Послі того съізда организация почала выпускати, кромі газеты и календаря, и другу литературу, брошюры, книжечкы, переводы из русской литературы. Секретар або редактор могли частійше объізжати колонии з лекциями, котры много причинилися до пробуждения и освідомления нашого народа, а тым самым для дальшого роста организации.

На Йонкерском съізді предсідателем Лемко-Союза был избранный Макарий Геряк из Стамфорд.

Четвертый съізд Л. С. отбылся 30 мая, 1935 року в Олифант, Па.

ДМИТРИЙ ВИСЛОЦКИЙ (Ваньо Гунянка) основатель и редактор “Лемка”.

До олифантского съізда было уж каждому ясно, што центр нашой организации по числу отділов и членов не в Кливланді, а в восточных штатах, где нашы колонии недалеко от себе, так што съізд в Олифанті постановил перенести центр организации с початком 1936 року в Нью Йорк. С початком 1936 року была перенесена до Нью Йорку головна канцелярия организации, печатня и редакция.

На олифантском съізді головным предсідателем Лемко-Союза был избранный Георгий Шуфлят, теперішный наш головный предсідатель. Головным кассиром был избранный Антон Каня. До того часу, от основания организации, гол. кассиром организации был Юлиян Федак в Кливланді.

Пятый съізд Л. С. отбылся в Пассайкі 3 сентября, 1937. На том съізді был поправленый устав и было принято много полезных рішений для дальшого розвития организации и помочи старому краю. Тот съізд закончился надзвычай успішным концертом в переполненой массом народа одной галі, в другой отбывалася забава. Обі галі были переполнены.

До Пассайкского съізда наша организация постоянно росла и кріпла.

Шестый съізд Л. С. отбылся в Нью Йорку от 3 до 5 сентября, 1937. Тот рок между пассайкскым и нью-йоркскым съіздом уж не показал такого роста организации, як попередны рокы, здавалося, што мы уж перестаєме заинтересовувати дальшых людей свойом программом и роботом. Правда, в Канаді скупилося больше нашых повоєнных емигрантов коло Лемко-Союза, особливо почали вступати в члены и предплачати газету емигранты из Пряшевсрой Руси, но в С. Ш. нашому народу треба было дати новый доказ силы и роботы организации, штобы он ширше заинтересовался ньом. Ту треба уж было, кромі программы и культурно-просвітительной роботы показати силу будовы, котра выразнійше говорит к народу от всякой другой программы. Нам здаєся, што єсли бы ѴІ съізд Л. С в Нью Йорку не постановил приступити до Народной Будовы, то наша организация почала бы идти на убыток, а єсли уже не на убыток, то остала бы стояти на одном місті, а коли организация стоит на одном місті, не розвиватся, не сягат дальше в массу свого народа, не будит єй, то така организация помалы замерат.

АНТОН КАНЯ кассир Л. С.

Як нам відомо, тот ѴІ съізд в Нью Йорку рішил приступити до свойой народной будовы, и тым он поставил пред членами Лемко-Союза велику ціль, а пред народом наочный примір житя и прогресса його народной организации. Свідомы противникы народной организации и народной просвіты среди нашого народа, або фальшивы завистникы, порозуміли сейчас, што то значит для нас така народна будова. Розуміли и передовы члены организации, што Л. С. бере на себе трудну роботу, тым больше, што многы члены, а даже делегаты того съізда не вірили в успіх такой будовы, и тоты члены отпадали, яко помочникы.

АНТОН ЦИСЛЯК менажер Л.С.

Но велике большинство делегатов порозуміло справу будовы, так што предложение о будові Карпаторусского Народного Центра в Америкі перешло на том съізді, и тым тот ѴІ съізд в Нью Йорку не лем утвердил нашу организацию, але и увіковічнил карпаторусску емиграцию. ѴІ Съізд Лемко-Союза зробил перелом на нашой емиграции тым, што мы по його рішению уж доказали, што мы так, як и другы культурны народы, можеме будувати не лем для другых, але и для себе самых, для свого народа и його поколіния. Завдякы тому рішению ѴІ съізда мы поднесли свою организацию не лем в очах нашого народа, но и в очах такых организаций другых народностей. Завдякы тому рішению съізда о нашой народной будові наша организация выполнила от ѴІ до ѴІІ съізда таку роботу за єден рок, яку не выполнила за цілый час свого существования.

Яку огромну роботу мы зробили за тот рок от шестого до седмого съізда, найліпшым доказом служит то, што тот седмый съізд отбылся уже в свойом власном домі, в Карпаторусском Американском Центрі в Юнкерс, Н. Й., от 27 до 29 октября 1938 року. И тот ѴІІ наш съізд был из всіх съіздов найуспішнійший, не лем што до числа делегатов, котрых было поверх 70, но и што до єдинодушия и ентузиазма. Тым больше, што за цілый тот рок шкодникы и ненавистникы працували в поті чела над тым, штобы убити в членах довірие до той первой нашой народной будовы, особливо до єй руководителей и руководства организации. Коли делегаты увиділи тоту прекрасну будову, то переконалися, што лем шкодникы и ненавистникы можут рыти под таком роботом. Не лем на съізді не нашлося делегата, котрый бы выступил з даяком критиком той роботы, но на посъіздовом предприятию, при тысячах народа, всім тота наша перва народна будова сподабалася. От того съізда пришли новы членскы пожичкы и жертвы, пришло много новых членов Центра, так што мы были в силі покончити будову и в середині.

ИВАН МАЛЮТИЧ предсідатель К.Р.А. Центра.

ВЛАДИМИР ГОНЧАРИК кассир К.Р.А. Центра.

МИХАИЛ ГАВРАН член Л.С. и отвітственный роботник при будові К.Р.А. Центра.