ПРИВІТ

Наш отідл Л.С. ч. 44. был основаный в 1933 року, 23 марта. Но я, теперішный предсідатель отділа членом основателем не был, ани я о том не знал, бо я за лемкох не чул и не знал, бо я з угорской, с Пряшевской Руси и там нас о лемкох нигда не учили, хоц мы зме тоже лемкы. Як показує рекорд отділа, то спочатку вписалося 34 членов, но на другий рок остало уж лем 7. Из угорскых руснаков перший вступил у нас членом покойный Николай Бучко. И он раз мі гварит: “Ци ты, Гнате знаш по-русскы читати?” Я гварю што литеры русскы познам, але читати добри не можу, бо нас не учили, лем по-мадьярскы. А Николай Бучко гварит: “Старчит, як знаш русскы литеры!” И вытягат он с кишени новинку и дає мі до рук. Я позерам, написано великыми литерами ЛЕМКО. И читам голосно. А Бучко гварит: “Та ты Василю, читаш, як и я!” Я не гварю нич, лем читам дальше. И ту мі приходит на мысель молитвенник, котрый мама купили от попа, а тот молитвенник пришол з Ужгорода, и был писаный на том самом языку, што и тота новинка. А потом тот молитвенник забрал от нас пан превелебный, а дали нам мадьярскы книжны. Но и от того часу нас так учили, што зме не знали уж ани русске, ани словенске, ани мадьярске. Но але читам я тоту газету дальше, а ту в ней стоит вшытко тото, што я от маленька переживал. Тай собі думам, кто то так потрафил историю мого житя ту списати? Уж и слезы начинаются куляти з очей. А мой сусід Николай Бучко смотрит на мене з великым милосердием и молчит, а я плачу от радости, што я нашол в той газеті таку божу правду, котрой я так долго глядал. Я гварю, што я хочу собі тоту новинку предплатити. А Бучко гварит, што буде скоро митинг Лемко-Союза, то он мене возме на митинг и там собі предплачу, а як я полюбил “Лемка”, то може и до Лемко-Союза запишуся за члена. Но и я стал в Л.С. в 1934 и стою до днес. И дораз мя выбрали предсідателем для тых 7 членов. Повідали мі, што остало лем 7 членох зато бо коли Л.С. робил пикник, то была велика масса народа, а доходу было лем 15 дол. И новый уряд перебрал 7 членов и 7 дол. в кассі. Видно с того ясно, што дакотры патриоты приступили до Л.С. длятого, бо думали собі, што то буде така “патриотична” организация, в котрой не треба буде рахунков здавати. А коли треба было рахункы здавати, то тоты патриоты уж против, уж єден повідат, што он окрестил Л.С., то он го и погребе, другий повідат, што отченаш не учат, и т. д., и такым способом людей от организации отганяли и хотіли конечно наш отділ погребати, як увиділи што не можут корыстати. Но отділ остался, и хоц нас єст тепер лем 9 членов, но майже всі из Пряшевской Руси, такы люде, котры любят свою организацию. Двох членов дало пожичку на Народну Будову по 500 дол. и состоят членами Центра. Мы ани не хочеме назад в организацию тых старых патриотов. Мы глядаме честных людей за членов нашого отділа. Нашы члены: Василий Гнат, Василий Шандала, Михаил Млинарич, Павел Гойдич, Максим Ростоцкий, Мария Ростоцка, Мария Осадчук, Мария Салапов, Магдалена Гавриляк.

Тоты нашы члены засылают сердечный привіт нашой организации Лемко-Союзу и Карпаторусскому Американскому Центру в день нашого Народного Торжества, 28 мая 1939.